IVYO ŴACHINYAMATA ŴAKUFUMBA
Kuŵa Pachibwezi—Chigaŵa 1: Kasi Nili Wakunozgeka Kuŵa Pachibwezi?
Ivyo vili mu nkhani iyi
Kasi kuŵa pachibwezi ni vichi?
Ŵanthu ŵanyake ŵakuwona chibwezi kuti ni ntchezgo waka. Kweni mu nkhani iyi para tikuyowoya za chibwezi tikuyowoya za nyengo iyo mwanalume na mwanakazi ŵakumalira lumoza kuchezga na chilato chakuti ŵawone usange ŵangazakatorana. Ntheura pakuŵa chilato para munthu wali pachibwezi, kuti ni nkhani yakukopana waka yayi.
Ndipo para nyengo yajumphapo vingamovwirani kusankha makora, kuwona usange mungatorana panji yayi. Ntheura para ukwamba chibwezi ukwenera kunozgekera vyose viŵiri.
Fundo yikuru: Usange ukujiwona kuti ndiwe wakunozgeka kuŵa na chibwezi ukweneraso kujiwona kuti ndiwe wakunozgeka kuti ungatora.
Kuŵa pachibwezi kwambura kuŵa na chilato chakutora panji kutengwa, vingayana waka na kuluta ku maintavyu uku ulije chilato chakuti ukambe ntchito
Kasi ndiwe wakunozgeka kuŵa na chibwezi?
Pakuti chilato cha chibwezi ntchakuti munthu watore panji kutengwa, ipo ntchiwemi kughanaghaniraso mikhaliro iyo yingakhozga panji kunanga ubwezi winu. Mwachiyelezgero, wonani fundo zakulondezgapo izi:
Ŵachibali. Umo ukuchitira vinthu na ŵapapi ŵako kweniso ŵana ŵanyako para wasuzgika maghanoghano, kanandi vikuvumbura umo uzamuchitiraso kwa munyako wamunthengwa.
Fundo ya mu Baibolo: “Wuskaniko kwa imwe mtima wa thinkho, ukali, kutukutwa, kukolomoka, na kayowoyero kaheni, pamoza na uheni wose.”—Ŵaefeso 4:31.
Jifumbani kuti: ‘Kasi ŵapapi na ŵana ŵanyane ŵangayowoya kuti nkhuchita nawo vinthu mwantchindi? Para yumoza wawo napambana nayo maghanoghano, kasi nkhudumbiskana nayo makora waka, panji nkhukwiya na kuchita vinthu mwaukali?’
Usange ukutondeka kuchita vinthu mwamahara na ŵapapi ŵako para wapambana nawo maghanoghano, ntchilongolero kuti ndimo uzamuchitiraso na munyako wamunthengwa.
Kujinora. Para watora panji kutengwa ukwenera kughanaghanira ivyo munyako wamunthengwa wakukhumba m’malo mwakujighanaghanira wekha.
Fundo ya mu Baibolo: “Waliyose waleke kupenja icho ntchachandulo kwa iyo, kweni icho ntchachandulo kwa munthu munyake.”—1 Ŵakorinte 10:24.
Jifumbani kuti: ‘Kasi nyengo zose nkhungangamira kuti vinthu vichitikenge umo ine nkhukhumbira? Kasi ŵanji ŵakuniwona kuti nkhuchita vinthu mwamahara? Kasi nkhulongora wuli kuti nkhudangizga vyakukhumba vya ŵanji m’malo mwa vyakukhumba vyane?’
Kujiyuyura. Mfumu panji muwoli uyo ngwakujiyuyura wakuzomera ivyo wabuda na kuphepiska kwa munyake wamunthengwa.
Fundo ya mu Baibolo: “Tose tikubuda nyengo zinandi.”—Yakobe 3:2, mazgu ghamusi.
Jifumbani kuti: ‘Kasi nkhuzomera luŵiro ivyo nabudiska panji nkhusanga vifukwa vyakujigowokera? Kasi nkhukhuŵara luŵiro para ŵanji ŵakunipa ulongozgi wakovwira?’
Ndalama. Munthu uyo wakuchita mwamahara pa nkhani ya ndalama ni viŵi yayi kwambana na munyake wa munthengwa pa nkhani ya vyandalama.
Fundo ya mu Baibolo: “Ni njani wa imwe uyo wakukhumba kuzenga chigongwe kwambura kukhala dankha pasi na kupendesera mtengo, kuti wawone usange wali na ndalama zakukwana kuti wachimalizge?”—Luka 14:28.
Jifumbani kuti: ‘Kasi ningachepeskako ndalama izo nkhugwiliskira ntchito panji kanandi nkhunjira mu ngongole? Kasi ningalongora wuli kuti nkhugwiliskira ntchito ndalama mwamahara?’
Umoyo wauzimu. Usange ndiwe yumoza wa Ŵakaboni ŵa Yehova ukwenera kusambira Baibolo mwakukhazikika kweniso kusangikapo pa maungano.
Fundo ya mu Baibolo: “Mbakukondwa awo ŵakumanya kuti ŵali na njara yauzimu.”—Mateyu 5:3.
Jifumbani kuti: ‘Kasi nkhuchitapo kanthu kuti nilutilire kuŵa na chipulikano chakukhora? Kasi nkhuŵika vinthu vyauzimu panthazi panji nkhuzomerezga kuti vinthu vinyake vinitimbanizge?’
Fundo yikuru: Munthu uyo utorenge panji kutengwako wakwenera kuŵa munthu muwemi. Para ukuŵikapo mtima kuŵa munthu wanthena, mbwenu chiŵenge chipusu kusanga munthu uyo wakuchita nga ndiwe.