‘Zina Liwemi Ndakuzirwa Kuluska Usambazi Unandi’

ZINA panji kuti lumbiri luwemi ndakuzirwa chomene mwakuti ŵanthu ŵanyake ŵakuyezga kulivikilira. Wangavikilira lumbiri lwawo ku awo ŵangalemba panji kuyowoya viheni vya iwo. Lekani Baibolo likuti: “Zina liwemi [lumbiri luwemi] ndakukhumbikwa kuluska usambazi unandi. Ntchiwemi kuchindikika kuluska kuŵa na siliva na golide.” (Zintharika 22:1) Kasi tingachita wuli kuti tiŵe na lumbiri luwemi kweniso kuti ŵanthu ŵatichindikenge? Baibolo lili na fundo izo zingatovwira pa nkhani iyi.

Wonani ivyo Baibolo likuyowoya pa Salimo 15. Pakuzgora fumbo lakuti, “Kasi ni njani wangaŵa mulendo mu hema [la Chiuta]?” wamasalimo wakati: “[Ni] uyo . . . wakuchita icho ntchakwenelera, na kuyowoya unenesko mu mtima wake. Wakusesa chara . . . . wakumuchitira chiheni chara mzengezgani wake, nanga nkhulengeska ŵabwezi ŵake. Wakukana waliyose uyo ni mukazuzi. Wakusintha yayi pa ivyo walayizga, nanga ni para vimuŵikenge paheni. . . . Wakupokera chara chimbundi.” (Salimo 15:1-5) Kasi mungatemwa yayi kukhala na munthu uyo wakulondezga fundo ziwemi izi?

Chinyake icho chingawovwira kuti ŵanthu ŵatichindikenge nkhujiyuyura. Lemba la Zintharika 15:33 likuti: “Pambere uchindami undafike pali kujiyuyura.” Munthu wakujiyuyura wakuwona ivyo wakutondeka na kulimbikira kuti wachite mwakora. Kweniso wakuŵa wakunozgeka kuphepiska para wakhuŵazga ŵanji. (Yakobe 3:2) Kweni wakujikuzga ndimo waliri yayi, iyo wakukwiya luŵiro. Lemba la Zintharika 16:18 likuti: “Para munthu wakujikuzga ndikuti wali pafupi kuparanyika, ndipo para wamba mzimu wakujituntha wali pafupi kuwa.”

Kweni kasi mungachita wuli para munthu munyake wakunanga lumbiri lwinu? Kasi nyengo yeneyiyo mungachitapo kanthu chifukwa chakuti mwakwiya? Jifumbani kuti, ‘Para nkhuchimbilira kuvikilira lumbiri lwane, kasi ŵanthu ŵaghanaghanenge vichi?’ Nangauli nyengo zinyake ntchiwemi kutolera nkhani ku khoti, kweni Baibolo lili na ulongozgi uwemi. Likuti: “Ungachimbiliranga chara kumangara ku mphara,” m’malo mwake ‘dumbirana mulandu wako na mzengezgani wako.’ (Zintharika 25:8, 9)a Fundo iyi njiwemi chomene chifukwa mungananga ndalama yayi zakwendeskera mulandu ku khoti.

Baibolo ni buku ilo lingamovwilirani pa umoyo winu. Wose awo ŵakulondezga ulongozgi wake ŵakuŵa na mikhaliro yiwemi, ndipo ŵanthu ŵakuŵachindika chifukwa cha zina liwemi.