UMO MUNGACHITIRA PARA MUKUSUZGIKA MAGHANOGHANO
Kusuzgika Maghanoghano Kuzamumara
Vinjeru vya mu Baibolo vingatovwira kuti tileke kusuzgika waka maghanoghano na chilichose. Taŵanthu patekha tingamazga yayi vinthu ivyo vikutipangiska kuti tisuzgikenge maghanoghano. Kweni Mlengi withu wangamazga. Iyo wali kwimika munthu munyake na chilato chakuti watovwire. Munthu uyu ni Yesu Khristu. Sonosono apa wachitenge vinthu vinandi vyakuzizwiska pa charu chose chapasi kuluska ivyo wakachita apo wakaŵa pa charu chapasi. Mwachiyelezgero:
WAZAMUCHIZGA ŴALWARI NGA UMO WAKACHITIRA.
“Ŵanthu ŵakamuyeghera wose awo ŵakasuzgikanga na matenda ghakupambanapambana . . . , ndipo wakaŵachizga.”—MATEYU 4:24.
YESU WAZAMOVWIRA WALIYOSE KUTI WAŴE NA NYUMBA KWENISO CHAKURYA.
“[Ŵanthu awo ŵazamulamulirika na Khristu] ŵazamuzenga nyumba na kukhalamo, ndipo ŵazamupanda minda ya mpheska na kurya vipambi vyake. Ŵazamuzenga chara, munyake na kukhalamo, nanga nkhupanda, ŵanyake na kurya.”—YESAYA 65:21, 22.
APO YESU WAZAMULAMULIRA, PA CHARU CHOSE CHAPASI PAZAMUŴA MTENDE NA CHIVIKILIRO.
“Mu mazuŵa ghake ŵarunji ŵazamutikitira, ndipo kuzamuŵa mtende wakuzara, m’paka mwezi umare. Wazamuwusa kwamba ku nyanja m’paka ku nyanja, kufuma ku Mlonga m’paka ku vigoti vya charu chapasi. . . . Ŵalwani ŵake ŵazamumyanga fuvu.”—SALIMO 72:7-9.
YESU WAZAMUMAZGA VINTHU VYAMBURA URUNJI.
“Wazamuchitira chitima wakuyuyuka na mukavu, ndipo wazamuponoska umoyo wa ŵakavu. Wazamuŵathaska ku kuyuzga na nkhaza.”—SALIMO 72:13, 14.
YESU WAZAMUMAZGA MASUZGO NA NYIFWA.
“Nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”—CHIVUMBUZI 21:4.