Tingaŵa Paubwezi na Chiuta Para Tingamumanya Makora
Mlengi withu ni nkhongono waka yayi. Iyo wali na mikhaliro yakukondweska. Ndipo wakukhumba kuti timanye vinandi vya iyo na kuŵa nayo paubwezi. (Yohane 17:3; Yakobe 4:8) Lekani wavumbura vinandi vyakukhwaskana na iyomwene.
Mlengi Withu Wali na Zina
“Ŵanthu ŵamanye kuti imwe, mwaŵeneimwe zina linu ni Yehova, ndimwe mwekha Wapachanya Nkhanira pa charu chose chapasi.”—SALIMO 83:18.
Baibolo likuti Yehova yekha ndiyo ni Chiuta waunenesko. Iyo ndiyo wakalenga vinthu vyose kusazgapo umoyo. Ndipo ndiyo yekha uyo tikwenera kumusopa.—Chivumbuzi 4:11.
Yehova Ni Chiuta Wachitemwa
“Chiuta ntchitemwa.”—1 YOHANE 4:8.
Kwizira mu Baibolo kweniso mu vinthu ivyo wali kulenga, Yehova wavumbura mikhaliro yake yinandi. Chitemwa ndiwo mukhaliro wake ukuru. Chilichose icho wakuchita, wakuchita chifukwa cha chitemwa. Para tisambirenge vinandi vya Yehova ndipo timutemwenge chomene.
Yehova Ni Chiuta Wakugowokera
“Imwe ndimwe wakunozgeka kugowokera.”—NEHEMIYA 9:17.
Yehova wakumanya kuti ndise ŵanthu ŵakwananga. Ntheura iyo ‘ngwakunozgeka kutigowokera.’ Para tamuphalira ivyo tabudiska kuti watigowokere na kuŵikapo mtima kuleka kuchita viheni, mbwenu iyo watigowokerenge.—Salimo 103:12, 13.
Yehova Wakukhumba Kuti Tilombenge kwa Iyo
“Yehova wali pafupi na wose awo ŵakumuchema . . . Wakupulika para ŵakulira kuti waŵavwire.”—SALIMO 145:18, 19.
Pakumusopa Yehova wakukhumba kuti tichitenge mwambo wapadera yayi nesi kugwiliskira ntchito vikozgo panji vinthu vinyake. Iyo wakupulika malurombo ghithu nga umo dada wachitemwa wakupulikira ivyo ŵana ŵake ŵakumupempha.