SAMBIRO 38
Kasi Tingalongora Wuli Kuti Tikuwonga Chawanangwa cha Umoyo?
Pali vinthu vinandi chomene ivyo tingachita kuti tikondwenge na umoyo. Nangauli tikusangana na masuzgo, kweni pali vinthu vinyake ivyo tikukondwa navyo. Kasi tingalongora wuli kuti tikuwonga chawanangwa cha umoyo icho Yehova wali kutipa? Ndipo chifukwa wuli tikwenera kuwonga chawanangwa ichi?
1. Chifukwa wuli tikwenera kuchindika umoyo?
Tikwenera kuchindika chomene umoyo chifukwa ntchawanangwa chakufuma kwa Dada withu wachitemwa, Yehova. Iyo ‘ntchisimi cha umoyo,’ ndiyo wakalenga vyamoyo vyose. (Salimo 36:9) “Wakupeleka ku ŵanthu wose umoyo na mvuchi na vinthu vyose.” (Milimo 17:25, 28) Kweniso wakutipa vyose ivyo tikukhumbikwira kuti tiŵe ŵamoyo. Iyo wakutipa vyose ivi kuti tikondwenge na umoyo.—Ŵazgani Milimo 14:17.
2. Kasi tingalongora wuli kuti tikumuwonga Yehova chifukwa cha kutipa umoyo?
Yehova wakamba kumupwelelerani kufuma waka apo amama ŵinu ŵakatolera nthumbo. Davide wakaphalira Yehova kuti: “Maso ghinu ghakaniwona nkhati namba waka kupangika mu nthumbo.” (Salimo 139:16) Yehova wakuwona kuti umoyo winu ngwakuzirwa chomene. (Ŵazgani Mateyu 10:29-31.) Iyo wakukwiya chomene para munthu wajikoma panji wakoma ŵanyake mwadala.a (Ekisodo 20:13) Yehova wakukwiyaso chomene para munthu wakuŵikira dala umoyo wake panji wa ŵanyake pangozi. Tingalongora kuti tikuwonga chawanangwa cha umoyo icho Yehova wali kutipa para tikupwelelera umoyo withu kweniso wa ŵanyithu.
MANYANI VINANDI
Wonani nthowa zinyake izo mungalongolera kuti mukuwonga chawanangwa cha umoyo.
3. Pwelelerani umoyo winu
Ŵakhristu awo ŵali kujipeleka kwa Yehova ŵakuchita chilichose icho ŵangafiska kuti ŵamuteŵetere na umoyo wose. Iwo ŵakupeleka mathupi ghawo kuŵa sembe kwa Chiuta. Ŵazgani Ŵaroma 12:1, 2, kufuma apo dumbiskanani mafumbo agha:
Chifukwa wuli mukwenera kupwelelera umoyo winu?
Kasi mungalongora wuli kuti mukupwelelera umoyo winu?
4. Jivikilirani kuti muleke kujipweteka panji kujikoma
Baibolo likutichiska kuti tikwenera kugega vinthu ivyo vingaŵika umoyo withu pangozi. Wonelerani VIDIYO kuti mumanye vinthu vinyake ivyo mungachita kuti mujivikilire.
Ŵazgani Zintharika 22:3, kufuma apo dumbiskanani ivyo mungachita kuti mujivikilire kweniso kuvikilira ŵanyinu para . . .
muli panyumba.
muli ku ntchito.
mukuchita maseŵero.
mwakwera panji mukwendeska galimoto, njinga, boti na vinyake.
5. Chindikani umoyo wa mwana uyo wandababike
Davide wakalemba powemu ya umo Yehova wakuwonera umoyo wa mwana uyo wandababike. Ŵazgani Salimo 139:13-17, kufuma apo dumbiskanani fumbo ili:
Kasi Yehova wakuwona kuti umoyo wa munthu ukwambira pa nyengo iyo mama watolera waka nthumbo panji para mwana wababika?
Malango agho Yehova wakapeleka ku Ŵaisrayeli ghakavikiliranga mwanakazi wa nthumbo kweniso mwana uyo wandababike. Ŵazgani Ekisodo 21:22, 23, kufuma apo dumbiskanani mafumbo agha:
Kasi Yehova wakamuwonanga wuli munthu uyo mwangozi wakoma mwana uyo wandababike?
Kasi wakujipulika wuli para munthu wakomera dala mwana uyo wandababike?b
Kasi mukujipulika wuli na umo Chiuta wakuyiwonera nkhani iyi?
Nanga ni mwanakazi uyo wakuwona kuti umoyo ngwakuzirwa chomene, nayo nyengo zinyake wangawona kuti kufumiska nthumbo ndiyo ni nthowa yekha iyo wangamazgira suzgo. Ŵazgani Yesaya 41:10, kufuma apo dumbiskanani mafumbo agha:
Para mwanakazi wakuchichizgika kuti wafumiske nthumbo, kasi ni nkhu uko wangasanga wovwiri? Chifukwa wuli?
IVYO ŴANYAKE ŴAKUYOWOYA: “Mwanakazi wali na wanangwa wakusankha kufumiska nthumbo panji yayi, chifukwa thupi ndake.”
Kasi ntchivichi chikumukhorweskani kuti Yehova wakuwona kuti umoyo wa mwanakazi wa nthumbo kweniso mwana uyo wandababike ngwakuzirwa chomene?
MWAKUDUMURA
Baibolo likutiphalira kuti tikwenera kutemwa, kuchindika, na kuvikilira chawanangwa cha umoyo icho Yehova wali kutipa. Kung’anamura umoyo withu kweniso wa ŵanyithu.
Kuweleramo
Chifukwa wuli Yehova wakuwona kuti umoyo wa munthu ngwakuzirwa chomene?
Kasi Yehova wakujipulika wuli usange munthu wajikoma panji wakoma munyake mwadala?
Chifukwa wuli imwe mukuwonga chawanangwa cha umoyo?
SANGANI FUNDO ZAKUSAZGIKIRA
Kasi tingamuwonga wuli Yehova chifukwa cha chawanangwa cha umoyo?
Sangani zgoro la fumbo lakuti, Kasi Yehova wangagowokera mwanakazi uyo wali kufumiskapo nthumbo?
“Kasi Baibolo Likuti Wuli pa Nkhani ya Kufumiska Nthumbo?” (Nkhani ya pa Intaneti)
Para tamanya umo Chiuta wakuwonera umoyo, vitovwirenge kuti tisankhenge makora vyakusanguluska.
“Kasi Mukwenera Kuchitako ‘Maseŵero Ghakuŵika Umoyo Pangozi?’” (Wukani!, Okutobala 8, 2000)
Wonani umo Baibolo lingawovwilira munthu uyo wakukhumba kujikoma.
“Kasi Baibolo Linganovwira Para Nkhukhumba Kujikoma?” (Nkhani ya pa Intaneti)
a Yehova wakupwelelera chomene wose awo ŵasweka mtima. (Salimo 34:18) Wakumanya umo ŵakujipulikira ŵanthu awo ŵali na maghanoghano ghakukhumba kujikoma, ndipo wakukhumba chomene kuŵawovwira. Kuti muwone umo Yehova wakovwilira ŵanthu awo ŵali na maghanoghano ghakukhumba kujikoma, wonani nkhani ya mutu wakuti “Kasi Baibolo Linganovwira Para Nkhukhumba Kujikoma?” pa chigaŵa chakuti Sangani Fundo Zakusazgikira mu sambiro ili.
b Ŵanthu awo ŵali kufumiskapo nthumbo ŵakwenera yayi kukhalira waka kujiyimba mulandu, chifukwa Yehova wangaŵagowokera. Kuti mumanye vinandi, wonani nkhani yakuti “Kasi Baibolo Likuti Wuli pa Nkhani ya Kufumiska Nthumbo?” iyo yili pa chigaŵa chakuti Sangani Fundo Zakusazgikira mu sambiro ili.