Nchivici Cingamovwirani Kuti Mupulikiske Baibolo?

2. Ŵazgani na Mtima Wakukhumba Kumanya

Kasi mubwezi winu wali kumuphaliranipo viheni vya munthu munyake uyo mundamuwonepo? Para mwakumana na munthu uyu, kasi ivyo mubwezi winu wakamuphalirani vikumupangiskani kuti muleke kuwona luso lwake panji mikhaliro yiwemi iyo wali nayo? Ndivyo vingacitika usange mukukhumba kuŵazga Baibolo.

MPOSITOLE Paulosi wakayowoya ivyo vingacitika usange tikutondeka kuŵazga Baibolo na mtima wakukhumba kumanya. Pakuyowoya za Ŵayuda ŵa mu nyengo yake, Paulosi wakalemba kuti: “Nkhuŵacitira ukaboni kuti ŵali na mwamphu pakuteŵetera Ciuta; kweni mwakuyana na kumanya makora cara.”—Ŵaroma 10:2.

Ŵayuda ŵanyake ŵakakhumbanga yayi kuzomera kuti Yesu ni Mesiya, nangauli Malemba gha Cihebere ghakamuvumbura pakweru. Yesu wa ku Nazarete wakafiska vyose ivyo Malemba ghakayowoya ndiposo maucimi agho ghakayowoyerathu ivyo wazamucita. Ŵayuda ŵa mu nyengo ya Yesu ŵakatondeka kupulikiska Mazgu gha Ciuta cifukwa ŵakaŵavya mtima wakukhumba kumanya.

Kasi tingasambirapo vici pa nkhani ya mu Baibolo iyi? Nchakuzirwa kuti tiŵazgenge Baibolo na mtima wakukhumba kumanya. Munthu wangatondeka kupulikiska unenesko wa mu Baibolo usange walije mtima wakukhumba kumanya.

Mwaciyelezgero, nkhwantha yinyake ya masambiro ghakukhwaskana na visopa ku North Carolina, U.S.A., yikati, Baibolo ni ‘buku ilo likalembeka na ŵanthu ndipo lili na maghanoghano gha ŵanthu. Fundo zinandi zikususkana nakuti mulije fundo zakugomezgeka izo zingatovwira kuti tikhalenge makora.’ Usange munthu wakuŵazga Baibolo nga ni buku ‘ilo likalembeka na ŵanthu,’ asi wasulengeko fundo ndiposo ulongozgi uwo wakukolerana nawo yayi?

Kweni, Baibolo likuticiska kuti tiŵenge ŵakunweka pakuliŵazga. Pakuyowoya za Ŵabereya, ŵa mu nyengo ya Paulosi, Malemba ghakuti: “Ŵakapokera mazgu na kunweka kukuru, kusanda Malemba mwakupwelelera zuŵa na zuŵa kuwona usange vinthu ivi ndimo vikaŵira.” (Milimo 17:11) Nga Mbabereya, wuskaniko ivyo vingamujandizgani kuti muleke kupulikiska Baibolo. Ŵazgani Mazgu gha Ciuta na mtima wakukhumba kumanya, ndipo nwekani kuti mumanye uthenga wa Ciuta.