Kucitira Vinthu Pamoza Kukovwira Kuti Mukure Mwauzimu

KUTI mbumba yitemwenge ndiposo kusopa Yehova, kucitira vinthu pamoza nkhwakuzirwa comene. Apo Yehova wakalenga ŵanthu ŵaŵiri ŵakwambilira, wakalongora kuti ŵakakhumbikwiranga kucitira vinthu pamoza. Eva wakeneranga kucita vinthu lumoza na Adamu nga ni “movwiri wakumwenelera.” (Gen. 2:18) Mfumu na Muwoli ŵakwenera kovwirana. (Muph. 4:9-12) Kuti ŵapapi ndiposo ŵana ŵafiske mulimo uwo Yehova wali kuŵapa ŵakwenera kukolerana.

Kusopera Lumoza nga Ni Mbumba

Barry na Heidi ŵali na ŵana ŵankhondi. Iwo ŵakuwona kuti kucita sambiro la mbumba nyengo zose kukovwira kuti ŵakure mwauzimu. Barry wakati: “Nyengo na nyengo, nkhuŵapa ŵana vinthu vyakuti ŵacite pa sambiro la mbumba. Nyengo zinyake nkhuŵaphalira kuti ŵazakayowoyepo ivyo ŵasambira mu Galamukani! Tikuyezgelera umo tamupharazgira, mwakuti waliyose wakuŵa wakunozgeka.” Heidi wakati: “Tose tili kulemba vilato vithu vyauzimu vyakuti tifiske, ndipo pa sambiro la mbumba tikuweleramo, kuwona umo tikucitira.” Mbumba iyi yikuwona kuti kuleka kulaŵilira TV namise mazuŵa ghanyake kukovwira kuti ŵaŵazgenge.

Maungano gha Mpingo

Mike na Denise ŵali kulera ŵana ŵanayi. Kasi mbumba yawo yakasanga candulo wuli cifukwa ca kucitira vinthu pamoza? Mike wakuti: “Nyengo zinyake, nangauli tikanozgekeranga kuti tikafike pa maungano mu nyengo yiwemi, tikatondekanga. Kweni kukolerana kukatovwira comene kuti tifikenge pa maungano mu nyengo yake.” Denise wakulongosora kuti: “Apo ŵana ŵithu ŵakakuranga, waliyose wakamanyanga mulimo wakuti wacite. Mwana withu msungwana, Kim wakaphikanga ndiposo kunozga pa thebulu.” Michael weakati: “Pa ciŵiri namise, mu nyumba yithu mukacitikiranga ungano wa mpingo. Ntheura tikaphyeranga mu nyumba na kuŵika mipando mu malo ghakwenelera.” Matthew wakati: “Madazi agho tikaŵanga na maungano namise, Ŵadada ŵakawoneseskanga kuti ŵafika luŵiro ku nyumba, mwakuti ŵaticiske kuti tinozgekere luŵiro ungano.” Kasi nchivici cacitika cifukwa ca kucitira vinthu lumoza?

Pali Nadi Vyandulo

Mike wakati: “Mu 1987, Denise na ine tikamba upayiniya. Pa nyengo iyo, ŵana ŵithu ŵatatu ŵakaŵa kuti ŵacali kukhala nase. Ŵaŵiri ŵakamba upayiniya, ndipo ŵanyake ŵakawovwira pa mulimo wa kuzenga Beteli. Cimwemwe cithu nchikuru comene cifukwa cakuti tawovwira ŵanthu 40 kumanya Yehova na kubapatizika. Mbumba yithu yaŵaso na mwaŵi wa kovwira pa mulimo wa kuzenga nanga ni mu vyaru vinyake.”

Para mbumba yikucitira vinthu pamoza yikusanga vyandulo vinandi comene. Kasi mukuwona kuti pali vinthu vinyake ivyo mungacitiranga lumoza na mbumba yinu? Namwe muwonenge kuti kucitira vinthu pamoza kovwirenge mbumba yinu kukura mwauzimu.

[Cithuzithuzi pa peji 28]

Kuyezgelera kukovwira kuti mupharazgenge makora