Kasi Mukukumbuka?
Kasi muli kuŵazgapo magazini gha Gongwe la Mulinda gha sonosono apa? Yezgani kuzgora mafumbo agha:
• Cifukwa wuli Mesiya wakeneranga kufwa?
Nyifwa ya Yesu yikalongora kuti munthu wakufikapo wangalutilira kusopa Ciuta mwakujipeleka nangauli wangayezgeka comene. Kweniso wali kulipira mulandu wa kwananga uwo ŵana ŵa Adamu ŵakahara, na kuŵajulira nthowa ya ku umoyo wamuyirayira.—12/15, peji 22-23.
• Kasi munthu uyo ŵakumwa phere mwakujumphizga ŵangacita wuli kuti ŵaleke?
Wangawovwirika usange wangalomba kwa Ciuta kweniso kusambira Baibolo. Wakwenera kujikora, kusankha ŵabwezi ŵawemi, na kujiŵikira mphaka. Uyo wasankha kumwa wajiŵikire mphaka ndiposo wasambire kukana usange munyake wakumukoserezga kuti wamwe mwakujumphizga.—1/1-CN, peji 7-9.
• Kasi mungacita wuli kuti mudumbiskanenge mwakufwatuka na ŵana ŵinu?
Kuti muyowoye na ŵana mwakufwatuka, pali vinandi padera pa kuyowoya nawo waka. Muŵafumbenge mafumbo na kutegherezga comene para ŵakuzgora. Mbumba zinandi zawona kuti nyengo yakulyera yikuŵapa mpata uwemi wa kudumbiskana.—1/15, peji 18-19.
• Pakuti Yehova ngwakufikapo, cifukwa wuli nyengo zinyake wakudandawura?
Nyengo zinyake Yehova wakusintha maghanoghano pakucita vinthu na ŵanthu. Mwaciyelezgero, Ŵaisrayeli ŵakamugalukira kanandi waka na kwamba kusopa ŵaciuta ŵanyake. Ntheura, Yehova wakalekanga kuŵavikilira. Kweni para ŵajinyumwa na kumulomba kuti waŵawovwire, ‘wakaŵafwiranga citima.’ (Ŵeru. 2:18)—2/1-CN, peji 21.
• Kasi munthu wangabapatizikaso pa vifukwa wuli?
Wangabapatizikaso usange pa nyengo iyo wakabapatizikiranga, wakacitanga nipera vinthu viheni kuubendi, vyeneivyo wakatenge wasezgekerengepo mu mpingo wawenge kuti ngwakubapatizika.—2/15, peji 22.
• Ni mitundu wuli yitatu ya kwiba iyo ŵanthu ŵakuwona kuti nkhwananga yayi?
Ŵanyake ŵakughanaghana kuti kwiba cifukwa ca ukavu nkhwananga yayi. Ŵanji ŵakuti para ndimo ŵanyawo ŵakucitira ndikuti nkhwiba yayi. Ŵanji ŵakuti kusora nkhwiba yayi. Baibolo likuti mtundu uliwose wa kwiba nkhwananga.—3/1-CN, peji 12-14.
• Mu ntharika ya Yesu ya tirigu na duru, kasi kuseŵa panji kuti kupanda mbuto yiwemi kukwimira vici?
Apo wakaŵa pa caru capasi, Mwana wa munthu, uyo ni Yesu, wakalima munda. Kufuma pa Pentekoste, mu 33 C.E. kuya munthazi, wakamba kuseŵa mbuto yiwemi, apo Ŵakhristu ŵakaphakazgika kuŵa ŵana ŵa Ciuta, awo mbana ŵa Ufumu.—3/15, peji 20.
• Kasi tirigu wa ntharika ya Yesu wakulongeka wuli mu nthamba ya Yehova? (Mat. 13:30)
Kufiskika kwa ivyo vikuyowoyeka mu ntharika iyi kukucitika mu nyengo yaumaliro wa mgonezi uno. Ŵana ŵakuphakazgika ŵa Ufumu, awo ni tirigu, ŵakulongeka mu nthamba ya Yehova para ŵiza mu mpingo Wacikhristu panji para ŵakupokera njombe yawo yakucanya.—3/15, peji 22.
• Kasi ni njani uyo wakasankha mabuku gha mu Tesitamenti Lasono?
Mbalongozgi ŵa chalichi yayi. Kweni ŵakaŵa Ŵakhristu ŵaunenesko, awo ŵakalongozgeka na mzimu utuŵa wa Ciuta. Ivi vikukolerana na fundo yakuti cimoza mwa vyawanangwa vyakuzizwiska vya mzimu ivyo vikapelekeka ku Ŵakhristu ŵakwambilira cikaŵa “kumanya makora mazgu ghakuyowoyeka mwa mzimu.” (1 Kor. 12:4, 10)—4/1, peji 28.