Ŵakatumbikika Cifukwa ca Kuŵa Ŵakunozgeka
KASI mukuŵa ŵakunozgeka kupharazgira ŵalendo awo ŵiza mu cigaŵa ca mpingo winu? Ndimo ŵabali ŵithu ŵa mu msumba wa Turku ku Finland ŵakacitira, ndipo ŵakatumbikika comene.
Ŵabali ŵa ku Turku ŵakawona kuti mu msumba wawo, mwiza ŵanthu ŵa ku Asia kuti ŵazakamalizge kupanga sitima yikuru. Pamasinda, mbali munyake wakamanya hotelo iyo ŵanthu aŵa ŵakafikira. Wakawonaso kuti pakuluta ku nchito, mulenji uliwose ŵakwenda pa basi. Mwaluŵiro, wakamanyiska ŵabali ŵa mpingo wa ciyowoyero ca Cingelezi.
Ŵalara ŵa mpingo uwu ŵakawona kuti kwiza kwa ŵalendo aŵa kukaŵapa mwaŵi wakuti ŵaŵapharazgire uthenga wa Ufumu, ndipo mwaluŵiro ŵakanozga upharazgi wapadera. Upharazgi uwu ukacitika pa zuŵa la Sabata, ndipo ukamba seveni koloko mulenji. Ŵapharazgi 10 ndiwo ŵakanjira mu uteŵeti. Ŵakacita kuluta ku malo agho ŵanthu aŵa ŵakakweleranga basi. Apo ŵakafikanga pa malo ghakukwelera basi, ŵanchito aŵa ŵakaŵa kuti ŵandafike. Ntheura, ŵabali ŵakajifumba kuti, ‘Kasi tachedwa comene? Panji ŵali kuwelera kwawo?’ Kanyengo kacoko waka ŵakawona wanchito munyake wakwiza, wavwara ovoloro. Na nyengo wuwo yayi, munyakeso baa, mbwenu gulu lose nyomi! Ŵanthu aŵa ŵakawunjikana pa malo ghakukwelera basi. Nyengo yeneyiyo, ŵapharazgi nawo ŵakambapo nchito yawo, ndipo ŵakaŵagaŵira mabuku gha Cingelezi. Mwamwaŵi, basi zikacedwa kunyamuka, ici cikawovwira ŵabali kuti ŵayowoye na ŵanandi mwa ŵanthu aŵa. Apo basi zikanyamukanga, ŵabali ŵakaŵa kuti ŵagaŵira ŵanthu aŵa tumabuku 126 na magazini 329.
Pakuti upharazgi uwu ukenda makora, ŵabali ŵakakhuŵilizgika kuti ŵaŵeso na upharazgi wapadera sabata yakulondezgapo, iyo mulaŵiliri wa dera wakacezgeranga mpingo wawo. Mulenji, hafu sikisi, mulaŵiliri wa dera wakacitiska ungano wa kunozgekera uteŵeti wa m’munda. Nangauli pa zuŵa ili kukaŵa vula, kweni ŵapharazgi 24 ŵakaluta ku malo ghakukwelera basi ghara. Pa zuŵa ili, ŵapharazgi ŵakayeghako mabuku gha ciyowoyero ca Tagalog, cifukwa pa ulendo wakwamba ŵakasanga kuti ŵanandi mwa ŵanthu aŵa mba ku Philippines. Pa zuŵa ili ŵapharazgi ŵakagaŵira mabuku 7, tumabuku 69, na magazini 479. Ghanaghanirani waka cimwemwe ico ŵabali na ŵadumbu aŵa ŵakaŵa naco cifukwa ca kucita upharazgi wapadera uwu!
Pambere ŵanchito aŵa ŵandawelere kwawo, ŵabali ŵakacezgapo na ŵanandi ŵa iwo ku hotelo uko ŵakagonanga, mwakuti ŵaŵalongosolere vinandi vyakukhwaskana na uthenga wa Ufumu. Ŵanchito ŵanyake ŵakayowoya kuti ŵali kukumanapo kale na Ŵakaboni ku vyaru vinyake. Ŵanchito aŵa ŵakawonga comene ŵabali cifukwa cakuti ŵakaŵapharazgira.
Kasi ndimwe ŵakunozgeka kupharazgira ŵalendo awo ŵangiza mu cigaŵa ca mpingo winu? Kasi mukuyezgayezga kupharazgira ŵanthu ŵa mitundu yakupambanapambana? Usange mukucita nthena, namwe mutumbikikenge nga mbabali ŵithu ŵa ku Turku.
[Mapu/Cithuzithuzi pa peji 32]
(Mu magazini yakusindikizga ndimo vikuwoneka makora)
FINLAND
HELSINKI
Turku