Upharazgi Wapadera Ukenda Makora ku Bulgaria
“Vuna njinandi, kweni ŵanchito mbacoko. Ntheura lombani Mweneco wa vuna kuti watume ŵanchito ku vuna yake.”—MAT. 9:37, 38.
MAZGU gha Yesu agha ghakukolerana comene na umo vinthu viliri mu caru ca Bulgaria. Caru ici cili na ŵanthu ŵakujumpha 7 miliyoni, ndipo ŵanchito ŵanandi ŵakukhumbikwa kuti ŵapharazge makani ghawemi mu caru ici. Mu Bulgaria muli ŵapharazgi pafupifupi 1,700, kweni ŵakukwaniska yayi kupharazga cigaŵa cose. Ntheura, Wupu Wakulongozga ukazomerezga kuti Ŵakaboni ŵa Yehova awo ŵakuyowoya ciyowoyero ca ku Bulgaria, awo ŵali mu vyaru vya ku Europe ŵakaciteko upharazgi wapadera mu 2009. Upharazgi uwu ukacitika kwa masabata ghankhondi na ghaŵiri, ndipo ukamara apo Ungano wa Cigaŵa wa mutu wakuti: “Muŵenge Maso!” ukaŵa pafupi kwamba. Ungano uwu ukacitikira ku Sofia, pa Ogasiti 14-16, 2009.
Ŵanandi Ŵakazomera
Ofesi ya munthavi ku Sofia yikamanyanga yayi unandi wa ŵabali awo ŵafumenge ku France, Germany, Greece, Italy, Poland, na Spain. Ŵapharazgi aŵa ŵakeneranga kujilipilira ulendo wa kuluta ku Bulgaria kweniso kugwiliskira nchito mazuŵa ghawo gha holide. Cikaŵa cakukondweska comene kuwona kuti sabata yiliyose ŵapharazgi ŵanandi ŵakapemphanga kuti ŵaciteko upharazgi wapadera uwu, mwakuti ŵapharazgi ŵakufuma ku vyaru vinyake ŵakakwana 292. Cifukwa cakuti awo ŵakajipeleka ŵakaŵa ŵanandi, cikaŵa camacitiko kupharazga mu misumba ya Kazanlak, Sandanski, na Silistra. Ŵalaŵiliri ŵa dera mu Bulgaria nawo ŵakapempha ŵapayiniya na ŵapharazgi kuti ŵawovwirepo pa upharazgi wapadera uwu. Ŵapharazgi 382 ŵa mu Bulgaria ŵakajipeleka kuti ŵaciteko upharazgi uwu mu vigaŵa ivyo ŵakapharazgangako viŵi yayi.
Ŵabali ŵa mipingo ya pafupi ŵakadangirako kuti ŵakanozge malo ghakufikira ŵalendo. Ŵakacita renti nyumba na mahotelo ghakuchipirapo. Ŵabali aŵa ŵakafwilirapo kovwira ŵabali ŵakufuma mu vyaru vinyake. Mu misumba yose yitatu iyi, malo agho ŵakakumanangako ghakaŵa ghakulipira. Ŵabali ŵakufuma mu vyaru vinyake ndiwo ŵakalongozganga maungano gha mpingo. Cikaŵa cakukondweska comene kuwona kuti nanga nkhu malo uko kulijirethu Ŵakaboni ŵa Yehova, ŵapharazgi 50 ŵakawungananga kuti ŵalumbe Yehova.
Ŵabali ŵa ku vyaru vinyake aŵa ŵakaŵa ŵamwamphu comene. Mu cihanya, ku Bulgaria kukocha comene. Ndipouli, ŵabali na ŵadumbu aŵa ŵakaleka yayi kupharazga. Mu masabata ghatatu ghakwambilira, ŵakamalizga kupharazga mu msumba wa Silistra, uwo wuli na ŵanthu ŵakujumpha 50,000. Ntheura, ŵabali aŵa ŵakapharazgaso ku mizi ya pafupi na msumba uwu, ŵakafika mpaka ku Tutrakan, mtunda wa makilomita 55 kufuma ku Silistra. Kanandi ŵakambanga uteŵeti 9:30 mulenji. Para ŵarya cakurya ca muhanya, ŵakalutizganga mpaka 7 koloko mise panji kujumpha apa. Mwakuyana waka, ŵabali awo ŵakapharazganga ku Kazanlak na Sandanski, ŵati ŵamalizga kupharazga mu misumba iyi, ŵakapharazgaso mu vikaya na misumba yinyake iyo yikaŵa pafupi.
Ivyo Upharazgi Uwu Ukafiska
Mu sabata zinkhondi na ziŵiri izi, ukaboni ukapelekeka mwakukwana. Nga umo ŵanji ŵakayowoyera mu nyengo ya ŵapositole, ŵanthu ŵa mu misumba iyi nawo ŵakenera kuyowoya kuti: ‘Mwazuzga misumba yithu na cisambizgo cinu.’ (Mil. 5:28) Pa nyengo ya upharazgi uwu, ŵabali ŵakagaŵira magazini pafupifupi 50,000 na kwambiska masambiro gha Baibolo 482. Cakukondweska nchakuti pa Seputembala 1, 2009, mu Silistra mukapangika mpingo, ndipo ku Kazanlak na Sandanski kukapangika tumagulu. Nchakukondweska kuti ŵanthu awo pa umoyo wawo wose kakaŵa kakwamba kupulika makani ghawemi pa nyengo ya upharazgi uwu ŵakulutilira kukura mwauzimu.
Mu sabata yakwamba ya upharazgi uwu, mudumbu wa ku Spain, uyo ni mupayiniya wapadera wakapharazgira mwanakazi munyake zina lake Karina, uyo wakaguliskanga nyuzipepara mu msumba wa Silistra. Karina wakalongora kunweka ndipo wakaluta ku maungano. Wakazomera kusambira Baibolo. Mfumu wake wakugomezga yayi kuti kuli Ciuta, ntheura Karina wakapempha kucitira sambiro ku paki. Pa sambiro pakaŵangaso ŵana ŵake ŵasungwana ŵaŵiri. Mulara, zina lake Daniela wakapulikiskanga comene unenesko wa mu Baibolo. Mu sabata yimoza pera wakamalizga kuŵazga buku lose la Baibolo Likusambizgaci? ndipo mwaluŵiro wakamba kulondezga ivyo Baibolo likuyowoya pa nkhani ya kusopa vikozgo. Pamasinda wakamba kuphalirako ŵanyake ivyo wakasambiranga. Pakati pajumpha sabata zitatu kufuma apo wakambira kuluta ku maungano, wakaphalira uyo wakasambiranga nayo kuti: “Nkhujiwona nga ndimwe. Ningacitaci kuti nane nambe kupharazga?” Daniela, munung’una wake na ŵanyina, wose wakulutilira kukura mwauzimu.
Ku Kazanlak, Mbali Orlin uyo wakafuma ku Italy, pakufuma mu uteŵeti wakasanga ŵanalume ŵaŵiri, ndipo wakaŵapharazgira. Wakaŵagaŵira buku la Baibolo Likusambizgaci? na kuŵaphalira kuti wamuweraso zuŵa lakulondezgapo. Wati wawelerako, wakamba kusambira Baibolo na Svetomir, ndipo ŵakapanganaso kuzakalutizga zuŵa lakulondezgapo. Mu mazuŵa ghankhondi na ghanayi, Orlin wakasambira na Svetomir nyengo zakukwana zinkhondi na zitatu. Svetomir wakati: “Mazuŵa ghaŵiri pambere nindakumane namwe, nkhalomba Ciuta kuti wanovwire kuti nimumanye. Ndipo nkhalayizga kuti usange wanovwira ninjipatulirenge kwa iyo.” Orlin wakati wawelera ku Italy, mbali munyake wa ku Bulgaria wakalutilira kusambira nayo, ndipo Svetomir wakukura mwauzimu.
Vitumbiko Ivyo Ŵakasanga
Kasi awo ŵakajipeleka kukapharazga makani ghawemi ku Bulgaria ŵakajipulika wuli pamanyuma? Mbali mulara uyo wakafuma ku Spain wakati: “Upharazgi uwu wawovwira kuti ŵabali ŵa mu Bulgaria awo ŵali ku Spain ŵaŵe pamoza. Ŵabali awo ŵakacitako upharazgi uwu ŵakakhozgeka comene.” Mbumba yinyake ya ku Italy yikati: “Uwu wanguŵa mwezi wapadera comene mu umoyo withu.” Ŵakatiso: “Upharazgi uwu wasintha umoyo withu. Sono tili nga umo tikaŵira kale yayi.” Mbumba iyi yikamba kughanaghanira vya kusamira ku Bulgaria kuti yikateŵetere uko kukukhumbikwa ŵapharazgi ŵanandi. Carina uyo ni mupayiniya wanyengozose ku Spain ndipo ngwambura kutengwa, wakacitako upharazgi uwu ku Silistra. Pamasinda wakaleka nchito iyo wakagwiranga ku Spain na kusamira ku Bulgaria kuti wakawovwire mpingo uphya. Wakasunga ndalama zakukwana zakuti zingamovwira kukhala mu Bulgaria kwa cilimika cimoza. Pakulongosora ivyo wakasankha, Carina wakati: “Ndine wakukondwa comene kuti Yehova wanizomerezga kuteŵetera kuno ku Bulgaria, ndipo nili na cigomezgo cose kuti nikhalenge nyengo yitali. Nambapo kale kusambira Baibolo na ŵanthu ŵankhondi, ndipo ŵatatu ŵakuwungana.”
Mudumbu munyake wa ku Italy wakakhumbanga kuti wakaciteko upharazgi uwu, kweni wakaŵa kuti wamba waka nchito mwakuti wangatora yayi holide. Ndipouli, wakapempha holide yambura malipiro, ndipo ŵamukanirenge, wakaŵa wakunozgeka kuleka nchito. Wakatindikika apo bwana wake wakati: “Ulute, kweni nkhukupempha cinthu cimoza, para wafika ukanitumireko cithuzi ca ku Bulgaria.” Mudumbu uyu wakawona kuti Yehova wazgora lurombo lwake.
Mudumbu munyake muwukirano zina lake Stanislava wa mu msumba wa Varna ku Bulgaria, wakagwiranga nchito ya malipiro ghawemi, wakatora holide kuti wakaciteko upharazgi uwu ku Silistra. Wakati wawona cimwemwe ico ŵapayiniya ŵakufuma kutali ŵakaŵa naco, wakalira comene. Wakamba kusanda ivyo wakacitanga na umoyo wake. Pamanyuma pa sabata ziŵiri wakawelera kukwake ndipo wakaleka nchito iyo wakagwiranga na kwamba upayiniya wanyengozose. Sono ngwakukondwa comene cifukwa wakukumbuka Mlengi wake mu mazuŵa gha uphya wake.—Muph. 12:1.
Ni thumbiko lapadera comene kuteŵetera Yehova na nkhongono zithu zose. Palije cinyake ico mungacita kuluska kupeleka nyengo yinu na nkhongono zinu kuti movwire pa mulimo wakuzirwa wa kusambizga na kupharazga makani ghawemi. Kasi pali nthowa zinyake izo mungacitirako mwakukwana mulimo wa kuponoska umoyo uwu? Mu caru cinu panji mungaŵa vigaŵa vinyake ivyo vili na ŵapharazgi ŵacoko. Kasi mungajipeleka kukateŵetera ku malo ghanthena? Panji mungasambira ciyowoyero cinyake kuti movwire ŵanthu awo ŵali na nyota yauzimu. Kwali mungasintha vinthu wuli manyani kuti Yehova wamutumbikaninge comene.—Zinth. 10:22.
[Bokosi/Cithuzithuzi pa peji 32]
Zuŵa Lambura Kuluwika
Ŵanandi awo ŵakafuma mu vyaru vinyake kuti ŵazakaciteko upharazgi wapadera uwu, ŵakaŵapo pa Ungano wa Cigaŵa wa mutu wakuti: “Muŵenge Maso!” uwo ukacitikira ku Sofia. Ŵabali na ŵadumbu ŵa mu Bulgaria ŵakakhozgeka comene kuŵira lumoza na ŵabali ŵakufuma mu vyaru vinyake. Ŵanthu 2,039 awo ŵakaŵa pa ungano uwu ŵakakondwa comene apo Mbali Geoffrey Jackson wa mu Wupu Wakulongozga wakapharazga za kufumiskika kwa Baibolo lose la Malemba Ghakupatulika mu Mang’anamuliro gha Caru Ciphya mu ciyowoyero ca ku Bulgaria. Wose awo ŵakaŵapo pa Cinkhondi ŵakawonga comene, ndipo ŵakakuŵa mapi kwa nyengo yitaliko. Ŵanandi ŵakalira na kulira wuwo. Baibolo ili lili kung’anamulika mwambura kusuzga kupulikiska ndipo lovwirenge ŵanthu ŵa mitima yiwemi ŵa ku Bulgaria kuti ŵamumanye Yehova.
[Mapu pa peji 30, 31]
(Mu magazini yakusindikizga ndimo vikuwoneka makora)
BULGARIA
SOFIA
Sandanski
Silistra
Kazanlak
[Vithuzithuzi pa peji 31]
Upharazgi ukenda makora comene mu sabata zinkhondi na ziŵiri