Kuchemera Ŵanthu ku Ungano

1. Kasi tizamwamba pawuli kuchemera ŵanthu ku ungano wa chigaŵa?

¹ Usange pakunozgera chakurya ŵabali panji ŵabwezi ŵinu mwamalirapo nkhongono na ndalama zinandi, mukukondwa pakuŵachema. Mwakuyana waka, pakaŵa ntchito yikuru chomene pakunozga chakurya chauzimu icho chizamuŵa pa ungano wa chigaŵa wa 2015. Tizamwamba kuchema ŵanthu para kwakhala sabata zitatu kuti ungano uchitike. Kasi ntchivichi icho chizamutichiska kuti tichemereko ŵanji ku ungano?

2. Kasi ntchivichi icho chizamutichiska kuti tichemereko ŵanji ku ungano?

² Icho chizamutichiska kuti tichemereko ŵanji ku ungano wa chigaŵa nkhughanaghanira vyandulo ivyo tikusanga ku chakurya chauzimu icho Yehova wakutipa pa maungano agha. (Yes. 65:13, 14) Tikweneraso kukumbuka kuti tikuphyoka pawaka yayi para tikuchemera ŵanthu ku ungano wa chigaŵa. (Wonani bokosi lakuti “Pakuŵa Vyandulo.”) Ŵanyake awo tizamuŵachema ŵazamwiza. Kweni kwali ŵanthu ŵazamwiza kwali yayi, Yehova wazamulumbika chifukwa cha ivyo tizamuchita pakuchemera ŵanthu ku ungano.—Sal. 145:3, 7; Uvu. 22:17.

3. Kasi tizamuchita wuli pakugaŵira tumapepara twakuchemera ŵanthu ku ungano?

³ Wupu wa ŵalara ukwenera kuwona umo mpingo ungachitira kuti ugaŵire chigaŵa chikuru tumapepara twakuchemera ŵanthu ku ungano. Ukweneraso kuwona usange ŵapharazgi ŵangaleka tumapepara pa nyumba izo ŵandasangepo munthu panji kugaŵira uko kukusangika ŵanthu ŵanandi. Para mukugaŵira tumapepara utu pa Chisulo na pa Sabata, mungagaŵiraso magazini apo mphakwenelera. Para tichemerengeko ŵanthu ŵanandi ku ungano kuti ŵakarye nase chakurya chauzimu icho Yehova watinozgera, tizamuŵa ŵakukondwa chomene.

Pakuŵa Vyandulo

Kumanyuma uku, mudumbu munyake wakakayikanga usange ŵanthu awo waŵachema ŵangiza ku ungano. Wakajifumba kuti ‘Kasi ŵanthu awo tikuŵachema ŵazamwiza ku ungano?’ Kweni pa Chisulo mulenji wakawona mwanalume munyake wachisopa cha Sikh wakhala pafupi na iyo. Ntheura mudumbu uyu wakamuphalira zina lake. Wakamanya kuti mwanalume uyu wakiza ku ungano chifukwa chakuti wakachemeka. Wakafumba mafumbo ghanandi ndipo mudumbu wakamuzgora. Mwanalume uyu wakayowoya kuti wakakondwa na ungano, kweniso kavwaliro na nkharo ya awo ŵakaŵa pa ungano uwu. Mudumbu uyu wakadumbiskanaso na mbumba yinyake iyo wakakhala nayo pafupi. Nawo ŵakapokera kapepara kakuŵachemera ku ungano, ndipo ŵakiza ku ungano pa basi. Ŵakasangwa chomene na ungano ndipo ŵakaghanaghana kuti ŵakizeso pa Sabata. Mudumbu uyu wakamanya kuti mulimo withu wa kuchemera ŵanthu ku ungano ngwakuzirwa.
Pa ungano wa chigaŵa wasonosono, mbumba yinyake iyo yikuchita upayiniya wanyengozose yikajilongosora ku mbumba yinyake yichekuru. Mbumba yichekuru iyi yikati nkhakwamba kwiza pa ungano wa Ŵakaboni ŵa Yehova. Ŵapayiniya ŵakafumba mbumba iyi kuti, “Kasi mukamanya wuli kuti kuli ungano?” Mbumba yichekuru yikati, “Zuŵa linyake apo tikafikanga pa nyumba, tikasanga kapepara pa mulyango.” Ŵakaŵazga kapepara aka na kusayina kachigaŵa kakupemphera sambiro la Baibolo ako kali ku umaliro. Ŵabali ŵakaŵapako chakurya. Mbumba iyi yikakondwa chomene na ungano, ndipo yikati yizengeso machero ghake. Ŵapayiniya ŵakapangana nawo kuti ŵazakakumaneso.