Upharazgi Uwo Ukuŵa na Vyandulo

Nga umo tikucitira nyengo zose, mipingo yizamwamba kucemera ŵanthu ku ungano wa cigaŵa para kwakhala masabata ghatatu. Pali cifukwa ciwemi cakucitira nthena. Awo ŵazomera nchemo iyi, kanandi ŵakukondwa na nkhani izo zikuyowoyeka, ivyo ŵabali na ŵadumbu ŵakujipeleka ŵakucita, na nkharo yiwemi kweniso umoza uwo tikulongora. (Sal. 110:3; 133:1; Yes. 65:13, 14) Kasi kucemera ŵanthu ku ungano kukuŵa na candulo cilicose, comene para awo taŵacema ŵendenge mtunda utali?

Ungano wa cigaŵa wa 2011 wati wamara, ofesi yinyake ya munthavi yikapokera kalata kufuma kwa mwanakazi munyake uyo wakasanga kapepara kakumucemera ku ungano kusi ku cijaro. Kanandi wakabisamanga para Ŵakaboni ŵa Yehova ŵiza pa nyumba yake. Wakalemba kuti: “Nkhaŵa na nyumba yiwemi, mwanalume muwemi, ndipo nkhaghanaghananga kuti nili na cilicose ico cinganipa cimwemwe. Kweni cacitima nchakuti nkhaŵa wakukondwa nadi yayi, ndipo umoyo wane ukaŵavya cilato. Ntheura nkhaghanaghana kuti nilute ku ungano pa Cisulo. Nkhayenda mtunda wa makilomita 320.” Wakasangwa comene na ungano mwakuti wakayimbira foni mfumu wake kumuphalira kuti wagonenge kuti waŵeposo pa Sabata. “Nkhategherezga ku nkhani zose, nkhakumana na Ŵakaboni ŵa Yehova ŵanandi, ndipo nkhakhumbanga yayi kuti ungano umare.” Wati wawelera ku nyumba, wakamba kusambira Baibolo, ndipo pati pajumpha myezi yinayi wakaŵa mupharazgi wambura kubapatizika. “Nili wakukondwa comene kuti nkhasanga kapepara kakunicemera ku ungano kusi ku cijaro ca nyumba yane cifukwa sono umoyo wane uli na candulo.”

Ŵanyake awo muŵapenge tumapepara utu ŵazamuluta ku ungano. Ipo citaniko mwamwamphu mulimo wakuzirwa uwu. Para tumapepara utu twakhalako, muzakayeghe kuti mukagaŵire awo ŵali pafupi na malo gha ungano.

[Bokosi pa peji 5]

Kasi Tizamugaŵira Wuli Tumapepara Utu?

Kuti tizakamalizge kugaŵira tumapepara utu cigaŵa ca mpingo withu, tikwenera kuzakayowoya mwakudumura. Tingayowoya kuti: “Monire. Tikupeleka tumapepara utu pa caru cose, kucemera ŵanthu ku ungano. Namwe kinu aka. Vinandi mupulikenge pa kapepara penepapo.” Yowoyani mwakukhuka. Usange mukupeleka nchemo iyi pa Cisulo panji pa Sabata, mungagaŵiraso magazini apo mphakwenelera.