Pa Malici 17 Tizamwamba Kucemera Ŵanthu ku Cikumbusko
1. Kasi tambenge kucitaci pa Malici 17?
1 Para tiza pa Cikumbusko, tikuthuwuska nyifwa ya Yesu. (1 Kor. 11:26) Lekani tikukhumba kuti ŵanyithu nawo ŵazakaŵepo mwakuti tizakapulikire lumoza vya sembe yakuwombora iyo Yehova watipa cifukwa cakuti wakutitemwa. (Yoh. 3:16) Cilimika cino, upharazgi wapadera wakucemera ŵanthu ku Cikumbusko wambenge pa Cisulo, Malici 17. Kasi namwe muzamucitako mwakukwana mulimo wapadera uwu?
2. Kasi tingayowoyaci pakucemera ŵanthu ku Cikumbusko?
2 Ivyo Tingayowoya: Nchiwemi kuyowoya mwakudumura. Tingayowoya kuti: “Tamusangani! Tati timupaniko kapepara aka. Imwe na mbumba yinu mukucemeka ku ungano wakuzirwa comene uwo ucitikenge pa caru cose capasi, pa Epulero 5. Ku ungano uwu, tamupulika candulo ico tikusanga cifukwa ca nyifwa ya Yesu na ivyo iyo wakucita pasono. Pa kapepara aka palembeka malo gha ungano na nyengo yakwambira.” Pa Cisulo na pa Sabata, tingapelekaso magazini apo mphakwenelera.
3. Kasi tingacitaci kuti ticeme ŵanthu ŵanandi?
3 Cemani Ŵanthu Ŵanandi: Cilato cithu nchakuti ticeme ŵanthu ŵanandi. Ntheura cemani awo mukusambira nawo Baibolo, awo mukuwelerako, ŵabali ŵinu, awo mukugwira nawo nchito, awo mukusambira nawo sukulu, ŵazengezgani na ŵanji awo mukumanyana nawo. Ŵalara ŵamovwiraninge umo mungacitira kuti mufiske cigaŵa cinu cose. Pakuŵa vyandulo usange tikucemera ŵanthu ku Cikumbusko. Cilimika camara, mulinda wakakhumbanga kovwira mama munyake uyo wakiza pa Cikumbusko kuti wasangane na mupharazgi uyo wakamucema. Kweni mama yura wakati wakumanyapo waliyose yayi. Iyo wakapokera waka kapepara kwa munthu uyo wakapelekanga tumapepara utu ku nyumba na nyumba namlenji.
4. Pali vifukwa wuli vyakuŵira ŵamwamphu pa mulimo wakucemera ŵanthu ku Cikumbusko?
4 Ŵanji ŵangiza pa Cikumbusko cifukwa ca tumapepara uto imwe muzamuŵapa. Kwali ŵanthu ŵize kwali yayi, ukaboni uzamupelekeka nipera cifukwa ca mwamphu winu. Ndipo nchemo izo mupelekenge zizamovwira ŵanthu kumanya kuti Yesu ni Themba lankhongono. Mwamphu winu uzamuŵa ukaboni wakuti mukuwonga sembe ya Yesu. Ŵanji awo ŵazamuwona ukaboni uwu ni ŵanthu awo ŵakukhala mu cigaŵa cinu, ŵabali na ŵadumbu, kweniso kuluska wose, Yehova.—Kol. 3:15.