Kugaŵira Tumapepara Twakucemera Ŵanthu ku Cikumbusko
1. Mbupharazgi wuli wapadera uwo wanozgeka kuti uzakacitike pa caru cose pambere Cikumbusko cindacitike?
1 “Lutilirani kucita ici kuti munikumbukenge.” (Luka 22:19) Cifukwa cakuti awo ŵakusopa Yehova ŵakupulikira languro la Yesu ili, pa Malici 30, 2010 ŵazamuwungana pamoza na ŵanji kuti ŵazakakumbikire nyifwa ya Yesu. Kwambira pa Malici 13 mpaka Malici 30, pa caru cose pazamuŵa upharazgi wapadera wa kucemera ŵanthu ku Cikumbusko.
2. Kasi tingagaŵira wuli tumapepara twakucemera ŵanthu ku Cikumbusko?
2 Umo Tizamucitira: Mungamupa munthu kapepara aka mwakuti wawone vithuzithuzi, ndipo yowoyani kuti: “Pa Malici 30 namise, ŵanthu ŵanandi pa caru cose ŵazamuwungana kuti ŵakumbukire nyifwa ya Yesu. Niza pano kuti nimupani kapepara aka, kumucemani imwe na mbumba yinu kuti muzakawungane nase. Mungizaso na ŵabwezi ŵinu. Nyengo na malo uko Cikumbusko camucitikira ni ivi vyalembeka apa.” Kuyana na umo mwawonera, mungamuŵazgira lemba la Luka 22:19 kuti mumulongore languro la Yesu. Ndipouli, kumbukani kuti tili na nyengo yicoko yakuti tigaŵire tumapepara utu mu cigaŵa cithu cose, ntheura nchiwemi comene kuyowoya mwakudumura.
3. Kasi tingazakagaŵira anjani?
3 Usange mpingo winu uli na cigaŵa cikuru, ŵalara ŵangamuphalirani kuti muzakalekerengethu tumapepara utu pa nyumba izo mundasangepo ŵanthu. Para nchakwenelera, mungazakagaŵiraso magazini pamoza na tumapepara utu. Woneseskani kuti muzakagaŵire ŵanthu awo mukuwelerako, awo mukusambira nawo Baibolo, ŵanyinu ŵa ku nchito, ku sukulu, ŵabali ŵinu, ŵazengezgani ŵinu, ndiposo ŵanji awo mukumanyana nawo.
4. Para tikuwonga citemwa ca Yehova pakutipa sembe yakuwombora, kasi ticiskikenge kucita vici?
4 Nozgekerani Kuzakapharazga Mwakukwana: Nyengo ya Cikumbusko njiwemi comene kuti tizakasazgireko uteŵeti withu. Kasi mungasintha vinthu vinyake mwakuti muzakacite upayiniya wakanyengo? Kasi muli na ŵana panji ŵasambiri ŵa Baibolo awo ŵakucita makora mwauzimu? Usange ni nthena, phalirani ŵalara kuti ŵaŵawone usange mbakwenelera kuŵa ŵapharazgi ŵambura kubapatizika mwakuti ŵaciteko upharazgi wapadera uwu. Para tikuwonga citemwa ca Yehova pakutipa sembe yakuwombora, ticiskikenge kuti tizakaŵepo pa Cikumbusko na kufwilirapo kucema ŵanthu ŵanandi kuti ŵazakawungane nase.—Yoh. 3:16.