Kugaŵira Tumapepara Twakucemera Ŵanthu ku Cikumbusko Kwambenge pa Epulero 2
1. Kasi tizamwamba pawuli kugaŵira tumapepara twakucemera ŵanthu ku Cikumbusko cilimika ici, ndipo cifukwa wuli upharazgi uwu ngwakuzirwa?
1 Kwambira pa Epulero 2 mpaka Epulero 17, tizamugaŵira tumapepara twakucemera ŵanthu ku cakucitika cakuzirwa comene mu cilimika, ico Nchikumbusko ca nyifwa ya Khristu. Kumasinda uku, ŵakunweka ŵanandi ŵakiza tikati taŵacema. Mwaciyelezgero, pa zuŵa la Cikumbusko, mwanakazi munyake wakimbira foni ofesi ya munthavi ndipo wakati: “Nafika waka sono pa nyumba, ndipo nasanga kuti kusi ku cijaro kuli kapepara kakunicemera ku ungano winu unyake. Nkhukhumba kuluta, kweni nyengo nkhuyimanya makora yayi.” Mbali wakamulongosolera apo palembeka nyengo pa kapepara aka. Paumaliro mwanakazi uyu wakalayizga kuti, “Namise, nkhuluta ku ungano winu uwu.”
2. Kasi tingayowoyaci pakugaŵira tumapepara utu?
2 Umo Tizamucitira: Pakuti tili na nyengo yicoko kuti timalizge cigaŵa cithu, nchiwemi kuyowoya mwakudumura. Tingayowoya kuti: “Monire. Tikukhumba kumupani kapepara aka kakumucemerani ku ungano wakuzirwa comene mu cilimika, uwo uzamucitika pa caru cose pa Sabata pa Epulero 17. [Mupani kapepara.] Zuŵa ili ndakukumbukira nyifwa ya Yesu. Kwamuŵa nkhani yakufuma mu Baibolo yakulongosora umo tingasangira candulo na sembe yakuwombora ya Khristu. Pa kapepara aka talembapo malo na nyengo iyo ungano uwu uzamucitikira mu cigaŵa cithu.”
3. Kasi tingacita wuli kuti tizakaceme ŵanthu ŵanandi?
3 Usange mpingo winu uli na cigaŵa cikuru, ŵalara ŵangamuphalirani kuti muzakalekerengethu tumapepara utu pa nyumba izo mundasangepo ŵanthu, ndipo mukaŵike pa malo ghawemi apo ŵanthu ŵanyake ŵangaleka kukawona. Woneseskani kuti mwacema awo mukuwelerako, ŵabali winu, awo mukugwira nawo nchito, awo mukusambira nawo sukulu, ndiposo ŵanji awo mukuŵamanya. Para mukugaŵira tumapepara utu pa Cisulo na pa Sabata, mungagaŵiraso magazini para nchakwenelera. Kasi mungazakacita upayiniya wakanyengo mu Epulero mwakuti muzakaciteko comene upharazgi wakukondweska uwu?
4. Cifukwa wuli tikukhumba kuti ŵakunweka ŵazakafike pa Cikumbusko?
4 Ŵakunweka awo ŵazamwiza ŵazamusambira vinthu vyakuzirwa. Ŵazamupulika za citemwa cikuru ico Yehova wali kulongora pakutipa sembe yakuwombora. (Yoh. 3:16) Ŵazamusambira umo Ufumu wa Ciuta uzamovwilira ŵanthu. (Yes. 65:21-23) Ŵazamupemphekaso kuti ŵakumane na ŵalinda para ŵakukhumba kusambira Baibolo kuti ŵamanye vinandi. Lurombo lwithu ndwakuti, mphanyi ŵanthu ŵanandi ŵamitima yiwemi ŵazakiza ku Cikumbusko.