Vinthu Viheni Vyose Vizamumara

CIUTA wali kutipa Mazgu ghake, agho ghakutiphalira vifukwa ivyo ŵanthu ŵakucitira vinthu viheni. Wali kutipaso wanangwa wa kusankha kweniso wali kutilenga mu nthowa yakuti tingajikora, mwakuti tingasankha kuleka kucita vinthu viheni. (Duteronome 30:15, 16, 19) Cifukwa cakuti tili kulengeka mu nthowa iyi, tingamanya maghanoghano ghalighose ghaheni agho tingaŵa nagho na kucitapo kanthu kuti ghafumemo. Ndipo para tindacite ciheni, taŵene tiŵenge ŵakukondwa kusazgaposo ŵanyithu.—Salmo 1:1.

Nangauli ise tingafwilirapo kuti tileke kucita vinthu viheni, kweni vinthu viheni vicitikenge nipera mu caru cifukwa ŵanji ŵakuvicita. Baibolo likuticenjezga kuti: “Umanye ceneici, kuti mu mazuŵa ghaumaliro kuzamuŵa nyengo zinonono na zakusuzga.” Pakulongosora ico cikupangiska nyengo izi kuti ziŵenge “zakusuzga,” Baibolo likulutilira kuti: “Ŵanthu ŵazamuŵa ŵakujitemwa iwoŵene, ŵakutemwa ndalama, ŵakujituntha, ŵakujikuzga, ŵakuyuyura Ciuta, ŵambura kupulikira ŵapapi, ŵambura kuwonga, ŵambura kugomezgeka, ŵambura citemwa cakawiro, ŵanonono, ŵakusesa, ŵambura kujikora, ŵakofya, ŵambura kutemwa uwemi, ŵakwendera mphiska, ŵakajilangi, ŵakujitukumura cifukwa ca kunotha, ŵakutemwa vyakusanguluska m’malo mwa kutemwa Ciuta, ŵakuŵa na kawonekero ka kusopa Ciuta mwakujipeleka kweni ŵakukana nkhongono zake; ndipo ku aŵa upatukeko.”—2 Timote 3:1-5.

Mu ucimi uwo uli mu lemba ili, panji mwawona mazgu ghakuti “mazuŵa ghaumaliro.” Kasi mazgu agha ghakung’anamuraci? Nga umo tikumanyira, mazgu ghakuti “mazuŵa ghaumaliro” ghakulongora kuti cinthu cinyake cili pafupi kumara. Kasi ni mazuŵa ghaumaliro wa vici? Wonani ivyo Ciuta walayizga mu Baibolo.

Ŵaheni wose ŵazamuparanyikirathu.

“Kwakhala kanyengo, ndipo muheni kuti tiwaŵepo cara; tiuŵanike malo ghake kweni iye ntha waŵengemo. Ŵakuzika ndiwo tiŵaharenge caru, tiŵakondwenge na kusakata comene.”—SALMO 37:10, 11.

“Yehova wakusunga wose awo ŵakumutemwa; kweni ŵaheni wose tiwaŵaparanyenge.”—SALMO 145:20.

Kuzamuŵavya kuyuzgana.

“Wakuthaska musauci para wacema, na mukavu, na uyo walije movwiri. Wakuwombora mizimu yawo ku kuyuzga na ukali.”—SALMO 72:12, 14.

“Cilengiwa icocene cizamufwatukaso ku wuzga wa kuvunda na kuŵa na wanangwa waucindami wa ŵana ŵa Ciuta.”—ŴAROMA 8:21.

Ŵanthu ŵazamuŵa na cilicose ico ŵakukhumbikwira.

“Tiwakhale munthu yose musi mwa mpheska yake na musi mwa mkuyu wake, kulije yumoza wakuŵawofya.”—MIKA 4:4.

“Tiŵazenge nyumba na kukhalamo; tiŵapande mpheska na kurya vipasi. Kuti ŵazengenge cara munyake ndiye wakhalengemo; ntha tiŵapande munyake warye; cifukwa nga ndi mazuŵa gha khuni ndimo ghaŵirenge mazuŵa ghawo, ndipo ŵakusoleka ŵane tiŵasekelerenge swi na milimo ya mawoko ghawo.”—YESAYA 65:21, 22.

Kuzamuŵa urunji.

“Ipo nadi, asi Ciuta wacitiskenge urunji kucitikira ŵakusoleka ŵake awo ŵakulilira kwa iyo muhanya na usiku . . . ? Nkhumuphalirani, Wacitiskenge urunji kuŵacitikira mwaluŵiro.”—LUKA 18:7, 8.

“Yehova wakutemwa urunji; kuti tiwaside ŵatuŵa ŵake cara. Ŵakunyoloka tiŵasungirizgike muyirayira.”—SALMO 37:28.

Urunji uzamunjira m’malo mwa kujighanaghanira.

‘Ŵanthu ŵenecaru ŵazamusambira urunji.’—YESAYA 26:9.

“Kuli macanya ghaphya na caru capasi ciphya ivyo tikulindilira kwakuyana na layizgo lake, ndipo mu ivi muzamukhala urunji.”—2 PETROSI 3:13.

Ŵanthu Ŵakusintha Nanga ni Sono

Nchakuwonekerathu, kuti tose tikukondwa na malayizgo agha. Kweni nchivici cikulongora kuti ghazamufiskika nadi? Nanga ni sono tili nawo ukaboni wakuti ivyo Ciuta wali kulayizga vizamucitika nadi. Ukaboni wake ngwakuti wuli? Ngwakuti ŵanthu ŵanandi pa caru cose ŵali kuleka vya kujighanaghanira ŵekha, mikhaliro yaukazuzi, panji kutemwa nkhaza ndipo ŵasambira kuŵa ŵakugomezgeka, ŵamtende ndiposo ŵalusungu. Mazuŵa ghano, Ŵakaboni ŵa Yehova, awo ŵalipo ŵakujumpha 7 miliyoni pa caru cose, ŵali paubali ndipo ŵakuzomerezga yayi kuti fuko, mtundu, caru ico ŵakufumira, ndyali, panji cuma ciŵagaŵaniske. Vinthu ivi ndivyo kwamba kale vikupangiska kuti paŵenge kutinkhana, viwawa, na kukomana.a Para ŵanthu ŵakusintha mikhaliro yiheni panyengo yasono, tikuŵa na cigomezgo cakuti ivyo Ciuta walayizga vizamucitika nadi.

Kweni nchivici cikupangiska kuti ŵanthu ŵasinthenge mikhaliro yiheni? Zgoro likusangika mu ucimi unyake wa mu Baibolo, uwo ukalembeka na nchimi Yesaya. Wakalemba kuti:

“Mphumphi yamkukhala pamoza na kanamberere, ntholomi yamkugona pasi na kanambuzi, tholi na nkhalamu na ng’ombe yakututuŵa zose pamoza, ndipo mwana mucoko waziliskenge. . . . Nkhalamu yamkurya utheka nga ndi nkhambako. Bonda wakonkha wamkusoŵera pa khululu la cipiri, mwana wakulumuka tiwaŵike woko pa mcembo wa mamba. Ntha vyamkupwetekana nesi kuparanyana mu lupiri lwane lose lwakupatulika; cifukwa caru camkuzura na kumumanya Yehova umo maji ghakuzuzgira nyanja.”—Yesaya 11:6-9.

Kasi ucimi uwu ukuyowoya waka za nyengo apo vinyama vizamuŵa pamtende na ŵanthu? Yayi, pali vinandi. Wonani kuti cigaŵa caumaliro cikulongora ico cizamupangiska kuti vinthu visinthe, cikuti: “Caru camkuzura na kumumanya Yehova.” Kasi vinyama vingasintha nkharo cifukwa ca kumanya Ciuta? Yayi. Ŵanthu ndiwo ŵangasintha. Ucimi uwu ukung’anamura kuti ŵanthu awo ŵali na mtima wakuyana na vinyama ŵazamusintha na kuŵa na mikhaliro Yacikhristu cifukwa ca kusambira na kulondezga ivyo Baibolo likusambizga.

Mwaciyelezgero, wonani umo Pedrob wakasinthira. Wakagomezganga kuti wakulwera urunji apo wakanjira gulu linyake la vigeŵenga. Wakati wasambizgika mu gulu ili, wakatumika kuti wakaphuliske malo ghakukhala ŵapolisi. Apo wakanozgekeranga kukacita ici, wakakakika. Pedro wakakhala cilimika na myezi 6 mu jere, ndipo wali ku jere, wakalutilira kunozga ciŵembu ici. Pa nyengo iyi, muwoli wake wakamba kusambira Baibolo na Ŵakaboni ŵa Yehova. Pedro wakati wafuma mu jere, nayo wakamba kusambira Baibolo, ndipo ivyo wakasambira vyakukhwaskana na Yehova Ciuta vikamupangiska kuti wasinthe nkharo yake ndiposo umo wakawoneranga umoyo. Pedro wakati wafuma mu jere, nayo wakamba kusambira Baibolo, ndipo ivyo wakasambira vyakukhwaskana na Yehova Ciuta vikamupangiska kuti wasinthe nkharo yake ndiposo umo wakawoneranga umoyo. Pedro wakuti: “Nkhuwonga Yehova kuti pa nyengo iyo nkhaŵa cigeŵenga nkhakomapo munthu waliyose yayi. Sono nkhugwiliskira nchito Baibolo, ilo ni lupanga lwauzimu, kuti nipharazgire ŵanthu uthenga wakuyowoya za mtende weneco na urunji, uwo ni makani ghawemi gha Ufumu wa Ciuta.” Pedro wakaluta nanga nkhu malo ghakukhalako ŵapolisi agho wakakhumbanga kuphuliska kuti wakaŵaphalireko uthenga wakuyowoya za mtende uwo uzamuŵa mu caru cambura viwawa.

Mazgu gha Ciuta ghali na nkhongono ya kusintha umoyo wa ŵanthu, ndipo ici nchifukwa cikuru ico tingagomezgera layizgo la Ciuta lakuti vinthu viheni vizamumara nadi. Enya, ŵanthu ŵacitenge viheni kwamuyirayira yayi kweni ŵazamuleka. Sonosono apa, Yehova wawuskengepo Satana Dyabulosi, uyo wakupangiska viheni mu caru. Baibolo likuti: “Caru cose cikugona mu nkhongono za muheni.” (1 Yohane 5:19) Kweni sonosono apa wafumiskikengepo. Ŵanthu awo ŵakukana kuleka viheni nawo ŵazamuparanyika. Cizamuŵa cakukondweska comene kuzakaŵako panyengo iyo.

Kasi munthu wakwenera kucitaci kuti wazakaŵeko panyengo iyo? Kumbukani kuti ŵanthu mazuŵa ghano ŵakusintha nkharo yawo cifukwa ca ‘kumanya Yehova’ ndipo nanga nkhunthazi nako ŵanthu wose ŵazamusintha nkharo yawo cifukwa ca kumanya Yehova. Para mungamanya unenesko uwo Baibolo likusambizga na kuwulondezga nga umo wakacitira Pedro, namwe mungalindizga kuzakaŵa mu caru ico “muzamukhala urunji.” (2 Petrosi 3:13) Ntheura tikumuciskani kuti musange nyengo ya kusambira za Ciuta na Yesu Khristu, cifukwa para mwacita nthena ndipo muzamusanga umoyo wamuyirayira.—Yohane 17:3.

[Mazgu ghamusi]

[Mazgu Ghakukhozgera pa peji 9]

Namwe mungalindizga kuzakaŵa mu caru ico “muzamukhala urunji.”​—2 PETROSI 3:13