Ghanaghanirani Ivyo Yehova Wamucitirani

PAKATI pajumpha nyengo yicoko waka Yesu wati wawuskika, ŵasambiri ŵake ŵaŵiri ŵakendanga kufuma ku Yerusalemu kuya ku Emausi. Buku la Luka likuti: “Apo ŵakayowoyeskananga na kudumbiskana, Yesu iyomwene wakiza na kwamba kulongozgana nawo; kweni ŵakamumanya makora cara.” Pamanyuma Yesu wakati kwa iwo: “‘Kasi ni nkhani wuli izo mukudumbiskana mwaŵene uku mukwenda?’ Ndipo ŵakimilira na visko vyacitima.” Cifukwa wuli ŵakaŵa na citima? Ŵasambiri aŵa ŵakaghanaghananga kuti Yesu wathaskenge Israyeli nyengo yeneyira ku muwuso wa ŵamitundu, kweni ndivyo vikacitika yayi. M’malo mwake, Yesu wakakomeka. Lekani ŵakaŵa na citima.—Luka 24:15-21; Mil. 1:6.

Yesu wakamba kudumbiskana na ŵasambiri aŵa. “Kwambira na ivyo Mozesi na Zinchimi zose zikalemba, wakaŵalongosolera vinthu vyakukhwaskana na iyo mu Malemba ghose.” Vinthu vinandi vyakuzirwa ndiposo vyakukhozga cipulikano vikacitika mu nyengo ya uteŵeti wa Yesu. Ŵasambiri aŵa ŵakati ŵapulika ivyo Yesu wakalongosora, citima cawo cikamara ndipo ŵakambaso kukondwa. Pamanyuma ŵakati: “Asi mitima yithu yaphyanga apo wayowoyanga nase mu nthowa, apo watilongosoleranga Malemba makoraghene?” (Luka 24:27, 32) Kasi ivyo ŵakacita ŵasambiri aŵa vikutisambizgaci?

Kasi Ivyo Vindafiskike Vikutikhwaska Wuli?

Ŵasambiri ŵaŵiri aŵa ŵakaŵa na citima cifukwa cakuti ivyo ŵakalindiliranga vikacitika yayi. Lekani lemba la Zintharika 13:12 likuti: “Ico cagomezgeka kweni cacedwa kwiza cikulwariska mtima.” Mwakuyana waka, taŵanji ise tateŵetera Yehova vilimika vinandi, tikughanaghana kuti “suzgo yikuru” yacedwa. (Mat. 24:21; Uvu. 7:14) Kughanaghana nthena nkhwananga yayi, cifukwa para ivyo talindizganga vindacitike tingaŵa na citima.

Kweni kumbukani kuti ŵasambiri ŵaŵiri aŵa ŵakambaso kukondwa pamanyuma pakuti Yesu waŵaphalira kuti ŵaghanaghanirenge maucimi agho ghakaŵa kuti ghafiskika kale, nanga ni agho ghakafiskikanga mu nyengo yawo. Ndimo nase tingacitira kuti tilutilire kuŵa ŵakukondwa ndiposo kuti tileke kugongowa. Mkhristu munyake zina lake Michael, wakati: “Lekani kughaghanaghanira comene ivyo Yehova wandacite. Kweni mughanaghanirenge ivyo wacita kale.” Uwu mbulongozgi uwemi nadi!

Ivyo Yehova Wacita

Wonani vinyake ivyo Yehova wacita kale. Yesu wakati: “Uyo wakupulikana mwa ine, iyo uyu wacitengeso milimo iyo ine nkhucita; ndipo wacitenge milimo yikuru kuluska iyi.” (Yoh. 14:12) Mazuŵa ghano, ŵateŵeti ŵa Ciuta ŵakufiska mulimo ukuru comene uwo undacitikepo nakale. Ŵanthu ŵakujumpha 7 miliyoni ŵakulindilira kuzakapona pa nyengo ya suzgo yikuru. Aka nkhakwamba kuti ŵateŵeti ŵa Yehova ŵanandi nthena ŵaŵe ŵa mwamphu pakucita mulimo uwu pa caru cose capasi. Nga umo Yesu wakayowoyera, Yehova wawovwira ŵanthu ŵake kuti ŵacite “milimo yikuru kuluska iyi.”

Kasi Yehova waticitiraso vici? Wawovwira ŵanthu ŵawemi mitima kuti ŵafumeko ku caru ciheni, na kwiza ku paradiso wauzimu. (2 Kor. 12:1-4) Wonani vinthu vinyake ivyo tikusangwa navyo mu paradiso uyu. Mwaciyelezgero, ghanaghanirani unandi wa mabuku agho ghali pa layibulare yinu panji ya ku Nyumba ya Ufumu. Tili na Watch Tower Pulications Index, ndiposo Watchtower Library pa kompyuta. Paliso maseŵero gha mu Baibolo agho ghali kujambulika mu matepi panji ma CD. Ghanaghaniraniso umo tikandulira na ungano wa cigaŵa uwo wajumpha. Kweniso umo mukusangwira para mukucezga na ŵabali na ŵadumbu. Yehova watipa cakurya cinandi cauzimu ndiposo ubali wa pa caru cose. Tili nadi mu paradiso wauzimu!

Wamasalmo Davide wakati: “A Yehova, Ciuta wane, milimo yinu njakuzizwiska iyo mwayandaniska; maghanoghano naghoso agho ghakutipwelera.” (Sal. 40:5) Para tikughanaghanira viwemi ivyo Yehova waticitira kale, ndiposo para tikumanya kuti wakutighanaghanira, tisangengeso nkhongono zakuzizipizgira apo tikumuteŵetera na mtima wose.—Mat. 24:13.

[Cithuzithuzi pa peji 31]

Yesu wakaphalira ŵasambiri ŵake kuti ŵaghanaghanire comene ivyo Yehova wakaŵacitira kale

[Vithuzithuzi pa peji 32]

Ghanaghanirani umo tikandulira na ungano wa cigaŵa uwo wajumpha