Kasi Muli Kupusikikapo?

VIKUŴINYA comene para mwamanya kuti munthu uyo mukumugomezga wamupusikani. Mungakwiya comene, mungawona nga kuti wamwendani pasi panji kumuyuyurani comene. Utesi ukumazga ubwezi na nthengwa. Ndalama zinandi za ŵanthu zikuryeka waka cifukwa ca utesi.

Kasi mungajipulika wuli usange mungamanya kuti ivyo mukasambira vyakukhwaskana na Ciuta ni vyautesi? Usange mukutemwa comene kusopa, panji namwe mungajipulika nga umo ŵanthu aŵa ŵakajipulikira:

● “Nkhawona nga kuti chalichi lanipusika waka.”—DEANNE

● “Nkhakwiya comene. Nkhawona nga napusikika waka ndipo vyose ivyo nkhalindizganga na ivyo nkhakhumbanga kucita vikabira waka mu maji.”—LUIS

Mungaghanaghana kuti vingacitika yayi kuti ŵanji ŵamupusikani pa vinthu vyakukhwaskana na Ciuta. Panji ivyo mukumanya mukapulika kwa munthu uyo mukumugomezga comene ndipo mukuwona kuti wangamupusikani yayi. Mungaŵa kuti mukavipulika kwa ŵapapi ŵinu, muliska, panji mubwezi winu. Mutepanji kwamba kale comene mukaŵa kuti mukugomezga cisambizgo cinyake. Kweni kasi mungazomerezga yayi kuti fundo yinyake iyo ŵanandi ŵakuyigomezga yingaŵa yautesi? Pulezidenti wakale wa ku United States, Franklin D. Roosevelt wakawona kuti fundo iyi njaunenesko, wakati: “Fundo yautesi nanga yingawerezgeka kanandi uli, yikuŵapo yaunenesko yayi.”

Kasi mungamanya wuli usange muli kupusikika? Pakulomba kwa Ciuta, nyengo yinyake Yesu wakati: “Mazgu ghinu mbunenesko.” (Yohane 17:17) Baibolo lili na fundo zakuzirwa izo zingatovwira kupambaniska unenesko na utesi.

Mwalekeraci kuti musande Baibolo kuti limovwirani kuvumbura mautesi ghankhondi agho ghakuyowoyeka pakukhwaskana na Ciuta? Muwonenge umo unenesko ungasinthira umoyo winu kuti uŵeko makora.