Sambizgani Ŵana Ŵinu
Apo Tikwenera Kuŵa Maso
NAWE ungazomerezga kuti nchakukhumbikwa kuŵa maso para uli ku sukulu. Ŵanandi ŵakusiwa para ŵali mu kilasi, kweni kuti usambire ukwenera kuŵa maso. Padera pa kuluta ku sukulu, panyake ukulutaso ku maungano uko ukukasambira Baibolo.
Kasi ukuwona kuti nchivici cingakovwira kuti uŵenge maso?—a Cinthu cimoza ico cingakovwira nchakuti ugonenge luŵiro. Nyengo zinyake ungagonapo pacoko namuhanya. Tiye tiwone ivyo vikacitikira munyamata munyake uyo wakagona apo mpositole Paulosi wakayowoyanga nkhani yake usiku. Tiwonengeso ivyo nkhani iyi yikutisambizga. Jura Baibolo pa Milimo cipaturo 20 vesi 7 mpaka 12, ndipo wona ivyo vikacitika.
Paulosi wakenderanga mpingo uwo ukaŵa mumphepete mwa nyanja mu msumba wa Trowa. Baibolo likuti Paulosi “wakafumangapo zuŵa lakulondezgapo.” Ntheura “wakayowoya nyengo yitali mpaka usiku pakati.” Tikuŵazga kuti: “Pa cidangazi pakakhala munyamata zina lake Yutiko uyo wakagona tulo tuzito apo Paulosi wakalutilira kuyowoya.” Kasi nchivici cikamucitikira?—
Yutiko “wakawa pasi kufuma pa nyumba yacitatu yakudikanya.” Paulosi na ŵanthu ŵanyake ŵakakhira mwaluŵiro kufuma pa nyumba yapacanya apo ŵakaŵa. Ŵakasanga kuti Yutiko wafwa. Kasi ungaghanaghanira citima ico ŵanthu aŵa ŵakaŵa naco?— Baibolo likuti Paulosi wakamunyamura Yutiko na kumuvumbatira. Pamanyuma Paulosi wakacemerezga mwakukondwa kuti: ‘Kufipa mtima yayi, ngwamoyo.’ Ciuta wakamuwuska Yutiko kuti waŵeso wamoyo.
Kasi ivyo vikacitikira Yutiko vikutisambizga kuti Ciuta wali wuli?— Sambiro limoza ndakuti Yehova, uyo ni Dada withu wakucanya, wangawuska ŵakufwa, ndipo wangawuska na ŵana wuwo. Yehova wakukupulikiska ndipo wakukutemwa comene, kuluska ŵapapi ŵako. Apo Yesu wakaŵa pa caru capasi, wakalongora umo Ŵadada ŵake ŵaliri. Wakanyamuranga ŵana na kuŵatumbika. Wakawuskaso ŵana awo ŵakafwa, yumoza wake wakaŵa msungwana wa vyaka 12.
Kasi ukujipulika wuli pakumanya kuti Adada ŵako ŵakucanya ŵakukutemwa?— Enya, cikupangiska kuti tiŵatemwenge na kupulikira ivyo ŵakuyowoya. Kasi ukumanya umo tingalongolera kuti tikuŵatemwa?— Nthowa yimoza njakuti tiyowoyenge kuti tikuŵatemwa. Yesu wakati: “Nkhutemwa Ŵadada.” Kweni Yesu wakacita vinandi padera pakuyowoya kuti wakutemwa Ŵadada ŵake.Wakacita vinthu vyakulongora kuti wakuŵatemwa.
Yesu wakapulikiranga Ciuta. Iyo wakati: “Nyengo zose nkhucita vinthu vyakukondweska kwa iyo.” Usange ndimo nase tikucitira, mbwenu tiyezgeyezgenge kuŵa maso pa nyengo yakwenelera, mwakuti tikondweske Yehova na Mwana wake, Yesu.
Ŵazga mu Baibolo Lako
[Mazgu ghamusi]
a Usange mukuŵazgira mwana, kamuzere ka kuumaliro kakumukumbuskani kuti muyime dankha na kuciska mwana winu kuti wayowoyepo maghanoghano ghake.