Sambirani Kufuma mu Mazgu gha Ciuta

Cifukwa Wuli Ciuta Wali na Gulu?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Cifukwa wuli Ciuta wakasora Ŵaisrayeli kuŵa gulu lake?

Ciuta wakasora ŵana ŵa Abrahamu na kuŵazgora mtundu umoza ndipo wakaŵapa malango. Mtundu uwu wakawuthya Israyeli ndipo wakawupa mulimo wa kuvikilira kusopa kwaunenesko na Mazgu ghake, agho ni Malemba Ghatuŵa. (Salmo 147:19, 20) Ntheura, ŵanthu ŵa mitundu yose ŵasanga candulo.—Ŵazgani Genesis 22:18.

Ciuta wakasora Ŵaisrayeli kuŵa ŵakaboni ŵake. Para Ŵaisrayeli ŵapulikira malango gha Ciuta, vinthu vikaŵayenderanga makora. (Duteronome 4:6) Tingamanya vinandi vyakukhwaskana na Ciuta waunenesko para tasambira mdauko wa Ŵaisrayeli.—Ŵazgani Yesaya 43:10, 12.

2. Cifukwa wuli Ŵakhristu ŵaunenesko ŵakwenera kuŵa gulu limoza?

Nyengo yikati yajumphapo, Ciuta wakawuleka mtundu wa Israyeli na kusora mpingo Wacikhristu kuti unjire m’malo ghake. (Mateyu 21:43; 23:37, 38) Ŵaisrayeli ŵakaŵa ŵakaboni ŵa Ciuta. Mazuŵa ghano napo, Ŵakhristu ŵaunenesko mbakaboni ŵa Yehova.—Ŵazgani Milimo 15:14, 17.

Yesu wakasora ŵalondezgi ŵake kuti ndilo liŵe gulu la kucitira ukaboni vya Yehova na kuzgora ŵanthu kuŵa ŵasambiri kufuma mu mitundu yose. (Mateyu 10:7, 11; 24:14; 28:19, 20) Mulimo uwu sono wafika peneko. Aka nkhakwamba kuti Yehova waguze ŵanthu mamiliyoni ghanandi kufuma mu mitundu yose kuti ŵaŵe ŵakukolerana pa kusopa kwa unenesko. (Uvumbuzi 7:9, 10) Ŵakhristu ŵaunenesko nawo ŵali mu gulu limoza kuti ŵakhwimiskanenge na kovwirana yumoza na munyake. Pa caru cose capasi, ŵakusambira vinthu vimoza vyakufuma mu Baibolo pa maungano ghawo.—Ŵazgani Ŵahebere 10:24, 25.

3. Kasi Ŵakaboni ŵa Yehova ŵakamba pawuli?

Gulu la Ŵakaboni ŵa Yehova likamba m’ma 1870. Ŵanthu ŵacoko waka awo ŵakatemwanga kusambira Baibolo ŵakamba kubowozga unenesko wa mu Baibolo uwo ukazgeŵelekera kwa nyengo yitali. Ŵakamanya kuti Yesu wakasora mpingo wa Ŵakhristu kuti upharazgenge. Ntheura ŵakamba kupharazga vya Ufumu pa caru cose. Mu 1931 ŵakamba kucemeka na zina lakuti Ŵakaboni ŵa Yehova.—Ŵazgani Milimo 1:8; 2:1, 4; 5:42.

4. Kasi Ŵakaboni ŵa Yehova ŵakulongozgeka wuli?

Mu nyengo ya Ŵakhristu ŵakwambilira, mipingo iyo yikaŵa mu vyaru vinandi yikalongozgekanga na wupu wakulongozga, uwo ukamanyanga kuti Yesu ndiyo ni Mutu wa mpingo. (Milimo 16:4, 5) Ŵakaboni ŵa Yehova nawo ŵakumanya kuti Yesu ndiyo ni Mulongozgi wawo. (Mateyu 23:9, 10) Nawo ŵakulongozgeka na Wupu Wakulongozga wa ŵanalume ŵakumanya tunthu awo ŵakupeleka cikhwimisko na ulongozgi wa mu Malemba ku mipingo yakujumpha 100,000. Mu mpingo uliwose muli ŵanalume awo ŵakuteŵeta nga mbalara panji ŵalaŵiliri. Ŵanalume aŵa ŵakupwelelera mwacitemwa mskambo wa Ciuta.—Ŵazgani 1 Petrosi 5:2, 3.

Ŵakaboni ŵa Yehova ŵakupharazga makani ghawemi na kuzgora ŵanthu kuŵa ŵasambiri. Iwo ŵakung’anamura, kusindikizga, na kugaŵira mabuku ghakulongosora Baibolo mu viyowoyero vyakujumpha 500 kuti ŵawovwire ŵanthu ŵa mitundu yose. Nawo ŵakupharazga nyumba na nyumba nga umo ŵakacitiranga ŵapositole. (Milimo 20:20) Ŵakujipeleka kuti ŵasambirenge Baibolo na ŵanthu awo ŵakutemwa nadi unenesko. Pakuti ŵanthu ŵa Yehova ŵakuŵikapo mtima kuti ŵamukondweske na kovwira ŵanji, iwo ni gulu la ŵanthu ŵakukondwa.—Ŵazgani Salmo 33:12; Milimo 20:35.

Kuti mumanye vinandi, wonani cipaturo 19 mu buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.