Sambirani Kufuma Mu Mazgu Gha Ciuta

Cifukwa Wuli Tikwenera Kuzunura Zina la Ciuta?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Cifukwa wuli Ciuta wali na zina?

Tikukayika yayi kuti imwe mukukhumba kuti ŵanthu ŵamucemaninge zina m’malo mwa kumucemani kuti dada, nduna, panji mama. Zina likovwira kuti munthu wamanyikwe. Ciuta wali na mazina gha vithokozo nga ni “Fumu,” “Mlengi,” na “Ciuta Wankhongonozose.” (Genesis 15:2; 17:1; Mupharazgi 12:1) Kweniso wali na zina ilo likutovwira kuti timumanye makora na kuŵa nayo paubwezi. Zina la Ciuta ni Yehova.​—Ŵazgani Yesaya 42:8.

Nangauli ŵang’anamuri ŵanandi ŵa Baibolo mu malo agho mukaŵa zina la Ciuta ŵakuŵikamo mazgu gha nga ni “Ciuta” na “Fumu,” kweni zina ili mu Cihebere cakwambilira likasangikanga mu malo 7,000. Yehova wakukhumba kuti zina lake limanyikwenge.​—Ŵazgani Yesaya 12:4.

2. Cifukwa wuli kumanya zina la Ciuta nkhwakuzirwa?

Kumanya zina la Ciuta kukung’anamura vinandi kuluska kulizunura waka. Kukung’anamura kuŵa nayo paubwezi. Zina lakuti Yehova likung’anamura kuti “Wakupangiska Kuŵako.” Ici cikung’anamura kuti Ciuta wangacita cilicose ico wakukhumba kuti wafiske khumbo lake. Nakuti kumanya zina la Ciuta kukung’anamura kumugomezga kuti wafiskenge malayizgo ghake ghose. (Salmo 9:10) Ŵanthu awo ŵakumanya na kuzunura zina la Ciuta, cipulikano cawo cikuŵakhuŵilizga kuti ŵamugomezgenge na kumuŵika pakwamba mu umoyo wawo. Yehova Ciuta wazamuŵavikilira ŵanthu ŵanthena aŵa.​—Ŵazgani Salmo 91:14.

3. Cifukwa wuli Ciuta wakukhumba kuti zina lake limanyikwenge?

Ciuta wakukhumba kuti ŵanthu ŵamumanye kuti ŵasange candulo. Zina ili likuŵawovwira kuti ŵaŵe paubwezi na Ciuta, kweniso kuŵa na cilindizga ca umoyo wamuyirayira. Lekani Yehova wakukhumba kuti timanyiske ŵanthu zina lake.​—Ŵazgani Yohane 17:3; Ŵaroma 10:13, 14.

Yesu wakawovwira ŵanthu kuti ŵamanye zina la Ciuta pakuŵasambizga nthowa zake, malango ghake, na ivyo walayizga. Mazuŵa ghano, ŵalondezgi ŵa Yesu ŵakulutilira kumanyiska mitundu zina la Ciuta. Ŵakucita mwakukolerana pakuŵa “ŵanthu ŵa zina la [Ciuta].”​—Ŵazgani Milimo 15:14; Yohane 17:26.

4. Kasi Ciuta wazamutuŵiska wuli zina lake?

Yehova Ciuta wakukhumba kutuŵiska zina lake cifukwa ŵanthu ŵaliyowoyera mautesi. Mwaciyelezgero, ŵanthu ŵanji ŵakuti Ciuta wandalengepo vyamoyo, ntheura tikwenera yayi kumupulikira. Ŵanji ŵakuti wakutipwelelera yayi nakuti ndiyo wakwambiska masuzgo. Ŵanthu ŵanthena aŵa ŵakubinkhiska zina la Ciuta. Kweni ŵalutilirenge yayi kucita nthena. Ciuta wazamuŵaparanya awo ŵakuyuyura zina lake.​—Ŵazgani Salmo 83:17, 18.

Yehova wazamutuŵiska zina lake panyengo iyo Ufumu wake uzamumazga maufumu ghose na kwiziska mtende pa caru capasi. (Daniel 2:44) Sonosono apa waliyose wazamumanya kuti Yehova ni Ciuta waunenesko.​—Ŵazgani Ezekiel 36:23; Mateyu 6:9.

Kasi mukwenera kucitaci? Mukwenera kusendelera kwa Ciuta mwakusambira Mazgu ghake na kuwungana na ŵanthu awo ŵakumutemwa. Pakutuŵiska zina lake, Yehova wazamukumbuka ŵateŵeti ŵake ŵakugomezgeka.—Malaki 3:16.

Kuti mumanye vinandi wonani cipaturo 1 ca buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.

[Cithuzithuzi pa peji 16]

Zina la Ciuta mu Cihebere cakwambilira