‘Sandani Vinthu Vyakuzirwa Comene’

1, 2. Kasi ni ucimi wuli wakukhwaskana na mazuŵa ghaumaliro uwo ukwenera kuti ukazizika ŵasambiri ŵa Yesu, ndipo cifukwa wuli?

PETROSI, Yakobe, na Yohane ŵakaŵa na Fumu yawo kwaŵekha. Mazgu gha Yesu ghakuti tempile lizamubwanganduka ghakaŵasuzga comene mu maghanoghano. (Mrk. 13:1-4) Ntheura ŵakafumba kuti: “Mutiphalire, Vinthu ivi vizamuŵako pawuli, ndipo nchivici cizamuŵa cimanyikwiro ca kuŵapo kwinu na ca umaliro wa mgonezi?” (Mat. 24:1-3) Yesu wakamba kuŵaphalira vyakucitika, panji vinthu ivyo vizamupangiska kuti umoyo usinthe, kweniso ivyo vizamulongora kuti mazuŵa ghaumaliro gha mgonezi wa Satana ghamba. Cakucitika cimoza cikwenera kuti cikazizika ŵasambiri ŵa Yesu. Wakati wayowoya vinthu vyakusuzga nga ni nkhondo, njara, na kusazgikira kwa ucikanamalango, Yesu wakayowoyerathu kuti cinthu cinyake ciwemi naco cizamuŵa cilongolero ca mazuŵa ghaumaliro. Wakati: “Makani ghawemi agha gha ufumu, ghazamupharazgika mu caru cose kuti uŵe ukaboni ku mitundu yose; penepapo ndipo umaliro wizenge.”—Mat. 24:7-14.

² Ŵasambiri ŵa Yesu ŵakasangwanga kupharazga makani ghawemi gha Ufumu lumoza na Khristu. (Luka 8:1; 9:1, 2) Ŵakwenera kuti ŵakakumbuka kuti wakati: “Nadi, vuna njinandi, kweni ŵanchito mbacoko. Ntheura lombani Mweneco wa vuna kuti watume ŵanchito kuti ŵaye ku vuna yake.” (Luka 10:2) Kweni kasi ŵakate ŵapharazgenge wuli “mu caru cose” na kucitira “ukaboni ku mitundu yose”? Kasi ŵanchito ŵakate ŵafumenge nkhu? Usange ŵalaŵiskenge kunthazi apo ŵakaŵa na Yesu zuŵa lira, mphanyi ŵakazizwa kuwona kufiskika kwa mazgu agha, gheneagho tikughaŵazga mazuŵa ghano pa Mateyu 24:14.

3. Kasi lemba la Luka 21:34 likufiskika wuli mazuŵa ghano, ndipo tikwenera kujifumba mafumbo wuli kuti tijisande?

³ Tili mu nyengo iyo ucimi wa Yesu ukufiskika. Ŵanthu mamiliyoni ghanandi ŵakucitako mulimo wa kuzuzga caru capasi na makani ghawemi gha Ufumu. (Yes. 60:22) Ndipouli, Yesu wakalongora kuti ŵanji vizamuŵasuzga kuŵa maso mu mazuŵa ghaumaliro agha. Ŵazamutimbanizgika ndiposo “kuzotofyeka.” (Ŵazgani Luka 21:34.) Tikuwonaso kuti mazgu agha nagho ghakufiskika. Ŵanji pakati pa ŵanthu ŵa Ciuta ŵakutimbanizgika na vinthu vinyake. Ukaboni wa fundo iyi ni ivyo ŵakusankha pa nkhani ya nchito, masambiro ghapacanya, ndiposo pa nkhani ya kusanga vinthu vyakuthupi, kweniso nyengo iyo ŵakumalira pa maseŵero na vyakusanguluska. Ŵanyake ŵakuvuka cifukwa ca masuzgo na vyenjezgo vya umoyo wa zuŵa na zuŵa. Jifumbani kuti: ‘Kasi ine nkhucita wuli? Kasi ivyo nkhusankha vikulongora kuti nkhuŵika mtima comene pa vici?’

4. (a) Kasi Paulosi wakaŵalombera vici Ŵakhristu ŵa ku Filipi, ndipo cifukwa wuli? (b) Kasi mu nkhani iyi na yakulondezgapo tidumbiskanenge vici, ndipo cilato cakusambilira ivi nchakuti wuli?

⁴ Ŵakhristu ŵakwambilira ŵakeneranga kufwilirapo kuti ŵalutilire kuŵika vinthu vyauzimu pakwamba. Mpositole Paulosi wakawona kuti nchakukhumbikwa kuti walombere Ŵakhristu ŵa ku Filipi kuti ŵasande “ivyo ni vinthu vyakuzirwa comene.” (Ŵazgani Ŵafilipi 1:9-11.) Nga ni mpositole Paulosi, Ŵakhristu ŵanandi mu nyengo yakale ŵakalongoranga “kukhwima mtima comene pakuyowoya mazgu gha Ciuta kwambura wofi.” (Fil. 1:12-14) Ntheura pera, taŵanandi mazuŵa ghano tikupharazga mwacikanga Mazgu gha Ciuta. Ndipouli, kasi tingawovwirika yayi kuti tiŵikenge mahara pa nchito yakuzirwa comene ya kupharazga, para tingaghanaghanirapo pa ivyo gulu la Yehova likufiska sono? Tingawovwirika nadi. Mu nkhani iyi, tiyeni tiwone ndondomeko iyo Yehova wapanga kuti wafiske lemba la Mateyu 24:14. Kasi cilato ca gulu lake nchakuti wuli, ndipo kasi kumanya ici kungaticiska wuli ise na mbumba zithu? Mu nkhani yakulondezgapo, tizamudumbiskana ivyo vingatovwira kuti tizizipizge ndiposo kuti tilutilire kwendera lumoza na gulu la Yehova.

CIGAŴA CA KUCANYA CA GULU LA YEHOVA CIKUGWIRA NCHITO

5, 6. (a) Cifukwa wuli Yehova wakapeleka mboniwoni zakukhwaskana na cigaŵa ca kucanya ca gulu lake? (b) Kasi Ezekiyeli wakawona vici mu mboniwoni?

⁵ Pali vinthu vinandi ivyo Yehova wakasankha kuti vileke kulembeka mu Mazgu ghake. Mwaciyelezgero wakayowoya yayi vinthu vyakukhwaskana na umo wongo ukugwilira nchito panji umo vinthu vikwendera mu mlengalenga, nangauli nkhani iyi mphanyi yikaŵa yakuzukumiska comene. M’malo mwake, Yehova wali kupeleka vinthu vyekha ivyo ni vyakukhumbikwa kuti tipulikiske khumbo lake na kucita vinthu mwakuyana na khumbo ili. (2 Tim. 3:16, 17) Ipo nchakukondweska comene kuti Baibolo likuyowoya vya cigaŵa ca kucanya ca gulu la Yehova. Tikukondwa para tikuŵazga nkhani zakulembeka na Yesaya, Ezekiyeli, na Daniyeli kweniso za mu Uvumbuzi wa Yohane izo zikulongosora umo Yehova wakwendeskera vinthu kucanya. (Yes. 6:1-4; Ezek. 1:4-14, 22-24; Dan. 7:9-14; Uvu. 4:1-11) Vili nga ni para Yehova wawuskako ketani na kutizomerezga kuti tiwone kucanya. Cifukwa wuli wali kutiphalira vinthu ivi?

⁶ Yehova wakukhumba kuti tileke kuluwa kuti tili cigaŵa ca gulu lake. Pali vinandi ivyo vikucitika kukhozgera khumbo la Yehova ivyo tikuleka kuviwona. Mwaciyelezgero, Ezekiyeli wakawona cigaŵa ca kucanya ca gulu la Yehova, ico cikawoneka nga ni galeta likuru la kucanya. Galeta ili likacimbiranga comene ndipo likakonanga luŵiro comene. (Ezek. 1:15-21) Para mikombelo panji matayala ghake ghazweta kamoza ghakamaranga mtunda utali comene. Mu mboniwoni, Ezekiyeli wakawonaso uyo wakakwera pa galeta. Wakati: “Nkhawona ngati cisulo cakuphya, ngati mawonekero gha moto zingilizge . . . Agha ndigho mawonekero gha cikozgo ca ucindami wa Yehova.” (Ezek. 1:25-28) Mboniwoni iyi yikwenera kuti yikamuzukumiska comene Ezekiyeli. Wakawona kuti Yehova wakulilongozga makora gulu lake kwizira mu mzimu wake utuŵa. Galeta la mu mboniwoni nchiyelezgero cakukondweska comene ca umo cigaŵa ca kucanya ca gulu la Yehova cikugwilira nchito.

7. Kasi mboniwoni iyo yikapelekeka kwa Daniyeli yikutipa wuli cigomezgo?

⁷ Daniyeli nayo wakawona vinthu vinandi vyakuti vitipe cigomezgo. Wakazomerezgeka kuwona Yehova uyo wakaŵa nga ni “Mulara wa Mwaka” wakhala pa cizumbe ico cikaŵa na madimi gha moto. Cizumbe ici cikaŵa na mikombelo. (Dan. 7:9) Yehova wakakhumbanga kuti Daniyeli wawone kuti gulu la Yehova likukhala waka cete yayi, kweni likufiska khumbo la Yehova. Kweniso Daniyeli wakawona “yumoza ngati mwana wa munthu,” uyo ni Yesu, wakupika mulimo wa kulaŵilira cigaŵa ca pa caru capasi ca gulu la Yehova. Muwuso wakufikapo wa Khristu ngwa vyaka vicoko waka yayi. Kweni “kuwusa kwake nkhwa muyirayira, uko kuti kumare cara, ndipo ufumu wake kuti uparanyikenge cara.” (Dan. 7:13, 14) Tikuciskika kugomezga Yehova na kumanya ivyo wakufiska. Wakapeleka “kuwusa na nchindi na ufumu” kwa Yesu, Mwana wake, uyo wakayezgeka na kulongora kuti ngwakugomezgeka. Yehova wakumugomezga comene Mwana wake. Ntheura, nase tingagomezga udangiliri wa Yesu.

8. Kasi mboniwoni zakufuma kwa Yehova zikamukhwaska wuli Ezekiyeli ndiposo Yesaya, ndipo ise zikwenera kutikhwaska wuli?

⁸ Kasi vinthu ivi vyakukhwaskana na cigaŵa ca kucanya ca gulu la Yehova vikwenera kutikhwaska wuli? Nga ni Ezekiyeli, tikuzukuma na kujicefya na ivyo Yehova wakufiska. (Ezek. 1:28) Para tikughanaghanirapo pa gulu la Yehova tingaciskika kuti nase ticitepo kanthu, nga umo wakacitira Yesaya. Mwaŵi wakuti wakaphalire ŵanji ivyo Yehova wakucita ukati wasangika, wakacitapo kanthu mwaluŵiro. (Ŵazgani Yesaya 6:5, 8.) Yesaya wakaŵa na cigomezgo cose kuti na wovwiri wa Yehova, wangamarana na suzgo lililose ilo wangakumana nalo. Mwakuyana waka, vinthu ivyo tamanya vyakukhwaskana na cigaŵa ca kucanya ca gulu la Yehova vikwenera kuticitiska wofi na kuticiska kuti ticitepo kanthu. Nchakukhozga comene kughanaghanirapo pa gulu ili, leneilo nyengo zose likugwira nchito, ndipo likuŵika maghanoghano ghake ghose pa kufiska khumbo la Yehova.

CIGAŴA CA PA CARU CAPASI CA GULU LA YEHOVA

9, 10. Cifukwa wuli nchakukhumbikwa kuti paŵe cigaŵa ca pa caru capasi ca gulu la Yehova?

⁹ Kwizira mwa Mwana wake, Yehova wakambiska cigaŵa ca pa caru capasi ca gulu lake ico cikugwira nchito mwakukolerana na cigaŵa ca kucanya ca gulu ili. Cifukwa wuli cigaŵa ca pa caru capasi ca gulu la Yehova cikaŵa cakukhumbikwa kuti mulimo uwo ukuyowoyeka pa Mateyu 24:14 ufiskike? Wonani vifukwa vitatu.

¹⁰ Cakwamba, Yesu wakayowoya kuti mulimo uwu wa kupharazga uzamufika “ku vigaŵa vyakutali comene vya caru capasi.” (Mil. 1:8) Caciŵiri, pakakhumbikwiranga ndondomeko ya kupeleka cakurya cauzimu na kupwelelera awo ŵacitenge mulimo uwu. (Yoh. 21:15-17) Cacitatu, pakeneranga kuŵa ndondomeko yakuti awo ŵapharazgenge makani ghawemi ŵawunganenge pamoza kuti ŵasope Yehova na kusambizgika umo ŵangacitira mulimo uwu. (Heb. 10:24, 25) Vilato ivi mphanyi vyangufiskika yayi paŵenge kuti palije ndondomeko yiliyose. Kuti ŵalondezgi ŵa Khristu ŵacite makora, mulimo ukeneranga kunozgeka makora.

11. Kasi tikulongora wuli kuti tikukhozgera ndondomeko zakunozgeka na gulu la Yehova?

¹¹ Kasi tikulongora wuli kuti tikukhozgera ndondomeko zakunozgeka na gulu la Yehova? Nthowa yimoza njakuti nyengo zose tigomezgenge awo Yehova na Yesu ŵali kuŵimika kuti ŵadangilirenge pa mulimo withu wa kupharazga. Mu caru mazuŵa ghano muli milimo yinandi panji vinthu ivyo vingakhumba phwelelero la awo ŵakulongozga pakati pithu. Ndipouli, kasi cigaŵa ca pa caru capasi ca gulu la Yehova calutilira kuŵika mtima pa vici?

LIKUŴIKA MAHARA PA “VINTHU VYAKUZIRWA COMENE”

12, 13. Kasi ŵalara ŵakucita wuli milimo yawo, ndipo cifukwa wuli ici nchakukhozga kwa imwe?

¹² Pa caru cose capasi, ŵalara ŵimikika kuti ŵalaŵilire na kukhozgera mulimo wa kupharazga Ufumu mu vyaru ivyo ŵakuteŵetera. Apo ŵabali aŵa ŵakudumura nkhani zinyake, ŵakupenja ulongozgi wa mu Mazgu gha Ciuta pakuŵa ‘nyali ku malundi ghawo na muliko wa mu nthowa yawo,’ na kulomba ulongozgi wa Yehova kufumira pasi pa mtima.—Sal. 119:105; Mat. 7:7, 8.

¹³ Nga ni awo ŵakalongozganga mu nyengo ya Ŵakhristu ŵakwambilira, ŵalara awo ŵakulaŵilira mulimo wa kupharazga mazuŵa ghano ŵakujipeleka “ku uteŵeti wa mazgu.” (Mil. 6:4) Ŵakukondwa comene para ŵakuwona kuti mulimo wa kupharazga makani ghawemi ukwenda makora mu cigaŵa ca mpingo wawo kweniso pa caru cose. (Mil. 21:19, 20) Ŵakuŵika malango ghanandinandi yayi. M’malo mwake, ŵakulondezga Malemba na ulongozgi wa mzimu utuŵa wa Ciuta apo ŵakupanga ndondomeko izo ni zakukhumbikwa kuti mulimo wa kupharazga wende makora. (Ŵazgani Milimo 15:28.) Pakucita nthena, ŵabali aŵa ŵakupeleka cakuwonerapo ciwemi ku wose mu mipingo yawo.—Efe. 4:11, 12.

14, 15. (a) Kasi ni milimo wuli iyo yikucitika kukhozgera mulimo wa kupharazga pa caru cose? (b) Kasi mukujipulika wuli na mulimo uwo mukucita kuti mukhozgere mulimo wa kupharazga Ufumu?

¹⁴ Ŵanandi ŵakuwona yayi mulimo ukuru uwo ukucitika pakunozga cakurya cauzimu ico cikuŵa mu mabuku ghithu, pa maungano, na maungano ghakuru. Ŵanthu ŵakujipeleka masauzandi ghanandi ŵakugwira nchito kwambura kuvuka ya kung’anamura cakurya cauzimu mu viyowoyero 600 kuti ŵanthu ŵanandi ŵasambire “vinthu vikuru vya Ciuta” mu ciyowoyero cawo na cawo. (Mil. 2:7-11) Ŵabali na ŵadumbu ŵaciwukirano ŵakujipeleka kupanga mabuku ghithu pa makina ghankhongono comene ghakusindikizgira. Kufuma apo, mabuku agha ghakutumizgika mu mipingo nanga ni iyo yili mu vigaŵa vyakutali comene vya caru capasi.

¹⁵ Pali milimo yakupambanapambana yakuti yitovwire kuti tiŵikenge mtima comene pa mulimo wa kupharazga makani ghawemi lumoza na mpingo withu. Mwaciyelezgero, ŵateŵeti ŵanandi ŵakujipeleka, ŵakovwira pakuzenga Nyumba za Ufumu, kuzenga Malo gha Ungano, kovwira awo masoka gha cilengiwa ghaŵawira panji awo ŵasangana na vyamabuci ku cipatala, kunozga maungano gha mu dera, na maungano ghakurughakuru, ndiposo kusambizga mu masukulu gha Ciuta. Iyi njicoko waka mwa milimo iyo yikucitika kwambura ŵanji ŵa ise kumanya. Kasi cilato ca milimo yose iyi nchakuti wuli? Nkhovwira kuti mulimo wa kupharazga makani ghawemi wendenge makora, kovwira awo ŵakucita mulimo uwu kuti ŵaŵe na umoyo uwemi wauzimu, ndiposo kuti kusopa kwaunenesko kulutilire. Kasi cigaŵa ca pa caru capasi ca gulu la Yehova cikuŵika nadi mtima pa vinthu vyakuzirwa comene? Enya.

LONDEZGANI CIYELEZGERO CA GULU LA YEHOVA

16. Kasi imwe na mbumba yinu mungasambira vinthu wuli pa sambiro linu la Baibolo?

¹⁶ Kasi nyengo na nyengo tikughanaghanirapo pa milimo iyo gulu la Yehova likucita? Ŵanji ŵasankha kuti pa nyengo yakusopera ya mbumba panji pa sambiro la iwoŵene ŵaŵenge na nyengo yakupenjelezgera na kughanaghanirapo pa nkhani izi. Mboniwoni izo zikapelekeka kwa Yesaya, Ezekiyeli, Daniyeli, na Yohane lingaŵa sambiro lakukondweska comene. Buku la Jehovah’s Witnesses—Proclaimers of God’s Kingdom na vinyake, panji ma DVD ivyo vilipo mu ciyowoyero cinu vingamovwirani comene kuti mulimanye makora gulu.

17, 18. (a) Kasi mwasanga candulo wuli na nkhani iyi? (b) Kasi ni mafumbo wuli agho tikwenera kujifumba?

¹⁷ Nchiwemi comene kughanaghanirapo pa vinthu ivyo Yehova wakufiska kwizira mu gulu lake. Pamoza na gulu lakukondweska ili, mphanyi taŵikapo mtima kuti tilutilire kuŵika mahara pa vinthu vyakuzirwa comene. Para ticitenge nthena, tikhozgekenge kuti tiŵikepo mtima nga ni Paulosi, uyo wakalemba kuti: “Pakuti tili na uteŵeti uwu mwakuyana na cisungusungu ico cikalongoreka kwa ise, tikugongowa cara.” (2 Kor. 4:1) Kweniso wakaciska ŵanchito ŵanyake kuti: “Tingagongowanga cara pakucita ico nchiwemi, cifukwa mu nyengo yakwenelera tizamuvuna usange tikuvuka cara.”—Gal. 6:9.

¹⁸ Kasi vilipo vinthu vinyake ivyo tikukhumbikwira kusintha ise patekha panji mbumba yithu, kuti tisande vinthu vyakuzirwa comene pa milimo yithu ya zuŵa na zuŵa? Kasi tingacepeskako vyakukhumba pa umoyo withu panji kucepeskako vyakutimbanizga mwakuti tiŵike mtima comene pa nchito yakuzirwa comene ya kupharazga? Mu nkhani yakulondezgapo tizamudumbiskana vinthu vinkhondi ivyo vingatovwira kuti tilutilire kwendera lumoza na gulu la Yehova.