Mafumbo Ghakufuma Ku Ŵaŵazgi

Apo Satana wakaphalira Eva kuti wafwenge yayi para waryenge vya mu khuni la kumanyiska uwemi na uheni, kasi wakamuphaliranga fundo iyo ŵanandi ŵakuyigomezga mazuŵa ghano yakuti mzimu ukufwa yayi?

Yayi. Dyabulosi wakamuphalirapo yayi Eva kuti usange waryenge chipambi chakukanizgika na Chiuta, wafwenge chithupi pera kweni chigaŵa chinyake chambura kuwoneka cha thupi lake (icho ŵanandi mazuŵa ghano ŵakuti mzimu wambura kufwa) chilutilirenge kuŵa na umoyo ku malo ghanyake. Kwizira mu njoka, Satana wakati para Eva waryenge chipambi cha mu khuni ili, ‘wafwenge yayi.’ Pakuyowoya nthena, wakang’anamuranga kuti walutilirenge kuŵa na umoyo, ndipo waŵenge na umoyo uwemi chomene pa charu kwambura kuthemba Chiuta.—Gen. 2:17; 3:3-5.

Usange chisambizgo icho chiliko mazuŵa ghano chakuti mzimu wamunthu ukufwa yayi chikambira mu munda wa Edeni yayi, ipo chikamba pawuli? Tikumanya yayi. Icho tikumanya ntchakuti kusopa kwautesi kukamara pa Chigumula mu nyengo ya Nowa. Pakuti Nowa na mbumba yake ndiwo ŵakapona pa Chigumula kweniso ndiwo ŵakasopanga mwaunenesko, ntheura pakaŵavya chisambizgo chilichose cha chisopa chautesi panyengo iyi.

Ipo chisambizgo chakuti mzimu wamunthu ukufwa yayi chikwenera kuti chikamba pamanyuma pa Chigumula. Chiuta wakati watimbanizga viyowoyero pa Babeli, ŵanthu ŵakambininiskikira “pa charu chose chapasi.” Tikukayika yayi kuti ŵanthu aŵa ndiwo ŵakathandazga chisambizgo chakuti mzimu wamunthu ukufwa yayi. (Gen. 11:8, 9) Nangauli tikumanya makora yayi apo chisambizgo ichi chikambira, kweni tikugomezga kuti Satana Dyabulosi uyo ni “wiske wautesi,” ndiyo wakakhuŵilizga kuti chisambizgo ichi chiŵeko ndipo wakakondwa chomene kuwona kuti chikuthandazgika pa charu chose.—Yoh. 8:44.