Chiuta Wakutumbika Awo Ŵakumupulikira

Ntchimi Mozesi yikati Chiuta watitumbikenge para tikupulikira malango ghake. (Dotoronome 10:13; 11:27) Tikupulikira Chiuta chifukwa chakopa kuti wangatilanga yayi. Kweni tikumupulikira chifukwa chakuti tikumutemwa ndipo tikukhumba yayi kuchita vinthu ivyo vingamukwiyiska. Malemba Ghakupatulika ghakuti: “Ili ni ng’anamuro la kutemwa Chiuta lakuti tisungilire malango ghake.”—1 Yohane 5:3.

Kweni kasi tikutumbikika wuli para tikupulikira Chiuta? Tiyeni tiwone nthowa ziŵiri.

1. TIKUŴA NA MAHARA PARA TIKUPULIKIRA CHIUTA

“Ine Yehova, ndine Chiuta winu, Uyo wakumusambizgani kuti musange chandulo, . . . Uyo wakumulongozgani mu nthowa iyo mukwenera kwendamo.”—YESAYA 48:17.

Yehova Mlengi withu wakutimanya makora, ndipo wakutipa ulongozgi uwo tikukhumbikwira. Para tikukhumba kuti Yehova watilongozgenge, tikwenera kuŵerenga Malemba Ghatuŵa, kuti timanye ivyo wakukhumba na kuyezgayezga kuchita.

2. TIŴENGE ŴAKUKONDWA PARA TIKUPULIKIRA

“Ŵakukondwa ni awo ŵakupulika mazgu gha Chiuta na kughasungilira!”—LUKA 11:28.

Mazuŵa ghano ŵanthu ŵanandi awo ŵakupulikira Mazgu gha Chiuta mbakukondwa zanadi. Wonani chiyelezgero cha mwanalume munyake wa ku Spain, uyo wakaŵa mukali chomene ndipo wakachitiranga nkhaza ŵanyake kweniso muwoli wake. Zuŵa linyake wakaŵerenga nkhani iyo yikalemba ntchimi Mozesi, yakukhwaskana na Yosefe mwana wa Yakhobe uyo wakachitanga vinthu mwakuzika. Yosefe wakaguliskika kuŵa muzga kweniso wakakakika kwambura mulandu. Ndipouli, wakalutilira kuŵa wakuzika, wamtende kweniso kugowoka. (Genizesi, vipaturo 37-45) Mwanalume wa ku Spain yura wakayowoya kuti: “Kughanaghanira nkhani ya Yosefe, kwanovwira kuti niŵe wakuzika, walusungu kweniso wakujikora. Ntheura sono nili wakukondwa.”

Malemba Ghakupatulika ghali na fundo zinandi izo zingatovwira kukhala makora na ŵanyithu. Tiwonenge fundo izi mu Nkhani yakulondezgapo.