Chitemwa chikutituma kudangizga vyakukhumba vya ŵanyithu m’malo mwa vithu
Umo Tingalongolera Chitemwa ku Ŵanyithu
Tose ndise ŵanthu ŵa banja limoza chifukwa tili kufuma kwa Adamu. Ŵanthu ŵa mu banja limoza ŵakwenera kutemwana na kuchindikana. Ndipouli, mazuŵa ghano ŵanthu ŵanandi ŵakutemwana yayi. Kweni ivi ndivyo Chiuta wachitemwa wakukhumba yayi.
IVYO MALEMBA GHAKUPATULIKA GHAKUYOWOYA PA NKHANI YA CHITEMWA
“Utemwenge munyako nga umo ukujitemwera wamwene.”—LEVITIKO 19:18.
“Lutilirani kutemwa ŵalwani ŵinu.”—MATEYU 5:44.
UMO TINGALONGOLERA KUTI TIKUTEMWA ŴANYITHU
Wonani umo Chiuta wakulongosolera chitemwa mu Mazgu ghake pa 1 Ŵakorinte 13:4-7:
“Chitemwa chikuzikira ndipo ntchalusungu.”
Ghanaghanirani fundo iyi: Kasi mukujipulika wuli para ŵanji ŵakuchita namwe vinthu mwalusungu kweniso mwakuzikira, nanga ni para mwabudiska?
“Chitemwa chilije sanji.”
Ghanaghanirani fundo iyi: Kasi mukujipulika wuli usange ŵanji ŵakumukayikirani panji kumuchitirani sanji?
Chitemwa “chikupenja vyake pera yayi.”
Ghanaghanirani fundo iyi: Kasi mukujipulika wuli para ŵanji ŵakuchindika maghanoghano ghinu ndipo ŵakwendera vyawo pera yayi?
“Chitemwa chikusunga vyakusingo yayi.”
Ghanaghanirani fundo iyi: Chiuta ngwakunozgeka kugowokera ŵanthu awo ŵamubudira chikuru ŵapera. Malemba Ghakupatulika ghakuti: “Wakhalirenge waka kusanga vifukwa chara, nesi kukwiya muyirayira.” (Salimo 103:9) Tikuwonga chomene usange munthu uyo tamubudira watigowokera. Ntheura nase tikwenera kuŵa ŵakunozgeka kugowokera ŵanyithu awo ŵatibudira.—Salimo 86:5.
Chitemwa “chikusekelera na kwananga yayi.”
Ghanaghanirani fundo iyi: Para tasangana na suzgo linyake, tingatemwa yayi kuti ŵanji ŵakondwenge chifukwa chakuti tikusuzgika. Ntheura nase tikwenera yayi kukondwa para ŵanyithu ŵakusuzgika nanga ŵangaŵa kuti ŵakatichitira viheni.
Kuti Chiuta watitumbike, tikwenera kutemwa munthu waliyose kwambura kusankha mtundu, msinkhu wake panji chisopa chake. Nthowa yimoza iyo tingachitira nthena ndiyo kovwira ŵanthu awo ŵakukhumbikwira wovwiri.