Kasi Yesu Wakuponoska Wuli Ŵanthu?

Ivyo Baibolo likuyowoya

Yesu wakaponoska ŵanthu ŵakugomezgeka apo wakapeleka umoyo wake kuŵa sembe yakuwombora. (Mateyu 20:28) Lekani Baibolo likuyowoya kuti Yesu ni “Mponoski wa charu.” (1 Yohane 4:14) Likuyowoyaso kuti: “Palije munyake uyo wangatiponoska, chifukwa palije zina linyake pa charu chapasi ilo Chiuta wasankha pakati pa ŵanthu kuti watiponoske nalo.”—Milimo 4:12.

Yesu ‘wakacheta nyifwa m’malo mwa munthu waliyose’ uyo wali na chipulikano mwa iyo. (Ŵahebere 2:9; Yohane 3:16) Pamanyuma ‘Chiuta wakamuwuska ku ŵakufwa,’ ndipo wakawelera kuchanya nga ntchilengiwa chauzimu. (Milimo 3:15) Kuchanya, Yesu “wakumanya kuŵaponoska awo ŵakusendelera kwa Chiuta kwizira mwa iyo, chifukwa ngwamoyo nyengo zose ndipo wakuŵaŵeyelelera kwa Chiuta.”—Ŵahebere 7:25.

Chifukwa wuli Yesu wakwenera kutiŵeyelelera kwa Chiuta?

Chifukwa tose ndise ŵakwananga. (Ŵaroma 3:23) Kwananga kuli nga ni mpanda uwo ukutijanda kwa Chiuta, ndipo tikufwa chifukwa cha kwananga. (Ŵaroma 6:23) Kweni Yesu ni “movwiri” wa awo ŵali na chipulikano mu sembe yakuwombora. (1 Yohane 2:1) Wakuŵeyelera m’malo mwawo, na kupempha Chiuta kuti wapulike malurombo ghawo, kweniso kuti waŵagowokere zakwananga zawo kwizira mu sembe ya Yesu. (Mateyu 1:21; Ŵaroma 8:34) Chiuta wakupulika maŵeyelero gha Yesu chifukwa ghakukolerana na khumbo lake. Chiuta wakatuma Yesu pa charu, “kuti charu chiponoskeke kwizira mwa iyo.”—Yohane 3:17.

Kasi tikwenera kugomezga waka mwa Yesu kuti tizakaponoskeke?

Yayi. Nangauli tikwenera kugomezga Yesu kuti tizakaponoskeke, kweni pali vinandi ivyo tikwenera kuchita. (Milimo 16:30, 31) Baibolo likuti: “Thupi kwambura mzimu ndakufwa, chipulikano nacho kwambura milimo ntchakufwa.” (Yakobe 2:26) Ntheura kuti tizakaponoskeke, tikwenera:

• Kumanya Yesu kweniso Awiske, Yehova.—Yohane 17:3.

• Kuŵa na chipulikano mwa iwo.—Yohane 12:44; 14:1.

• Kupulikira ivyo ŵakukhumba kuti tilongore chipulikano chithu mwa iwo. (Luka 6:46; 1 Yohane 2:17) Yesu wakasambizga kuti ni waliyose yayi uyo wakumuchema kuti “Fumu” wazamuponoskeka, kweni ŵekha awo ŵakuchita khumbo la Adada [ŵake] awo ŵali kuchanya.”—Mateyu 7:21.

• Kulutilira kulongora chipulikano visuzge viti wuli. Yesu wakalongosora makora chomene apo wakati: “Uyo wazizipizgenge m’paka kuumaliro ndiyo wazamuponoskeka.”—Mateyu 24:13.