Leviticus

18 Yehowa san ka kyerɛɛ Mose sɛ: 2 “Ka kyerɛ Israelfoɔ sɛ, ‘Mene Yehowa mo Nyankopɔn.+ 3 Motenaa Egypt; monhwɛ na moamfa Egypt kwan so.+ Mede mo rekɔ Kanaan; monhwɛ na moamfa Kanaan kwan so,+ na monnyɛ wɔn amanneɛ. 4 M’atemmusɛm+ so na monnie, na m’ahyɛdeɛ+ mu na monnanteɛ.+ Mene Yehowa mo Nyankopɔn. 5 Monni m’ahyɛdeɛ ne m’atemmusɛm so, na moyɛ saa a, monam so bɛnya nkwa.+ Mene Yehowa.+

6 “‘Obiara nnkɔ ne busuani ho nnkɔyi n’adagya so.+ Mene Yehowa. 7 Nyi wo papa anaa wo maame adagya so.+ Ɔyɛ wo maame. Nyi n’adagya so.

8 “‘Nyi wo papa yere adagya so.+ Ɛyɛ wo papa adagya.

9 “‘Wo nuabaa, wo papa babaa anaa wo maame babaa, sɛ wɔwoo no fikorɔ no ara mu oo, wɔwoo no baabi oo, nyi n’adagya so.+

10 “‘Nyi wo babarima babaa anaa wo babaa babaa adagya so, ɛfiri sɛ ɛyɛ w’adagya.

11 “‘Wo papa yere babaa a ɔne wo papa awo no yɛ wo nuabaa; nyi n’adagya so.

12 “‘Nyi wo papa nuabaa adagya so. Ɔne wo papa yɛ mogya korɔ.+

13 “‘Nyi wo maame nuabaa adagya so, ɛfiri sɛ ɔne wo maame yɛ mogya korɔ.

14 “‘Nyi wo papa nuabarima adagya so; nkɔ ne yere ho. Ɔyɛ wo papa yere.+

15 “‘Nyi w’asebaa adagya so.+ Ɔyɛ wo ba yere. Nyi n’adagya so.

16 “‘Nyi wo nua yere adagya so.+ Ɛyɛ wo nua adagya.

17 “‘Nyi ɔbaa ne ne babaa adagya so.+ Na nkɔ ne babarima babaa anaa ne babaa babaa ho nkɔyi n’adagya so. Wɔyɛ mogya korɔ. Woyɛ saa a, ɛyɛ ahohwibra.+

18 “‘Nware ɔbaa nka ne nuabaa ho mma wɔmmɛyɛ akorafoɔ,+ na nyi n’adagya so nka ne ho berɛ a ɔte aseɛ.

19 “‘Nkɔ ɔbaa a wayɛ bra ho+ nkɔyi n’adagya so.+ Ne ho nte.

20 “‘Mfa wo ho nsuo mma wo yɔnko yere na mo ho angu fĩ.+

21 “‘Mfa wo ba mmɔ afɔdeɛ+ mma Molek.+ Nyɛ saa mfa ngu wo Nyankopɔn din ho fĩ.+ Mene Yehowa.+

22 “‘Wo ne ɔbarima+ nnna sɛdeɛ wo ne ɔbaa da.+ Ɛyɛ akyiwadeɛ.

23 “‘Na mfa wo ho nsuo mma aboa+ na wo ho angu fĩ, na ɛnsɛ sɛ ɔbaa gyina aboa anim de ne ho ma no.+ Ɛyɛ akyiwadeɛ.

24 “‘Mfa yeinom biara ngu wo ho fĩ, ɛfiri sɛ yei na ama aman a merepamo wɔn afiri w’anim yi ho agu fĩ.+ 25 Enti asase no so agu fĩ, na mede ne bɔne ho asotwe bɛba ne so, na ɛbɛfe ɛso nnipa agu.+ 26 Na mo deɛ, monni m’ahyɛdeɛ ne m’atemmusɛm so,+ na monnyɛ akyiwadeɛ yi biara bi. Kuromanni oo, ɔhɔhoɔ a wabɛsoɛ mo mu+ oo, obiara nnyɛ bi. 27 Akyiwadeɛ yi nyinaa na asase no sofoɔ a wɔdii mo anim no yɛeɛ,+ enti na asase no so agu fĩ no. 28 Monngu asase no so fĩ na amfe mo angu sɛ aman a wɔdii mo anim no.+ 29 Obiara a ɔbɛyɛ akyiwadeɛ yi bie no, wɔbɛtwa ɔkra a ɔte saa no afiri ne man mu.+ 30 Monhwɛ nni m’ahyɛdeɛ so na moanyɛ amanneɛ tantan a wɔn a wɔdii mo anim no yɛeɛ no bi,+ na angu mo ho fĩ. Mene Yehowa mo Nyankopɔn.’”