Deuteronomium
20 “Sɛ wo ne w’atamfo rekɔko na wohunu sɛ wɔwɔ apɔnkɔ ne nteaseɛnam+ ne dɔm a wɔdɔɔso sene woɔ a, nsuro wɔn ɛfiri sɛ Yehowa wo Nyankopɔn a ɔyii wo firii Egypt asase soɔ no+ ka wo ho.+ 2 Na sɛ morebɛn akono a, ɔsɔfoɔ no mmɛkasa nkyerɛ ɔman no.+ 3 Ɔnka nkyerɛ wɔn sɛ, ‘Israel montie, ɛnnɛ morebɛn mo atamfo ne wɔn akɔko. Mommma mo akoma nntu,+ monnsuro wɔn na mo ho mmpopo, na mommma wɔn ho nnyɛ mo hu.+ 4 Yehowa mo Nyankopɔn ka mo ho, na ɔne mo atamfo bɛko ama mo na wagye mo.’+
5 “Mpanimfoɔ+ no nso mmɛkasa nkyerɛ ɔman no sɛ, ‘Hwan na wasi fie foforɔ a ɔmmuee ano? Ɔnsan nkɔ ne fie na wankɔwu akono amma obi foforɔ ammue ano.+ 6 Hwan na wayɛ bobeturo a ɔnnya ntee soɔ? Ɔnsan nkɔ ne fie na wankɔwu akono amma obi foforɔ amfa.+ 7 Hwan na wasi ɔbaa bi asiwa a ɔnnya nkɔfaa no? Ɔnsan nkɔ ne fie+ na wankɔwu akono amma ɔbarima foforɔ ankɔfa no.’ 8 Mpanimfoɔ no nsan nka nkyerɛ ɔman no sɛ, ‘Hwan na ɔsuro na n’akoma atuo?+ Ɔnsan nkɔ ne fie na wantu ne nuanom akoma sɛdeɛ n’akoma atuo no.’+ 9 Na sɛ mpanimfoɔ no ne ɔman no kasa wie a, wɔnyiyi asafohene nsisi asraafoɔ no so na wɔnni ɔman no anim.
10 “Sɛ wo ne kuro bi rekɔko a, bɔ dawuro ma no nhunu deɛ ɛbɛtumi ama asomdwoeɛ aba.+ 11 Sɛ kuro no de asomdwoeɛ hyia wo na ɔbue n’apono ma wo a, ɛnneɛ fa emu nnipa nyinaa yɛ nkoa na wɔnsom wo.+ 12 Na sɛ kuro no amfa asomdwoeɛ anhyia wo+ na ɔne wo ko a, ka no hyem, 13 na Yehowa wo Nyankopɔn nso de kuro no bɛhyɛ wo nsa na wode nkrantɛ akunkum emu mmarima nyinaa.+ 14 Na fa kuro no mu mmaa ne mmɔfra nkumaa+ ne nyɛmmoa+ ne biribiara a ɛwɔ hɔ,+ na di w’atamfo a Yehowa wo Nyankopɔn de wɔn ama woɔ no asadeɛ.+
15 “Saa na fa yɛ nkuro a ɛne wo ntam twe paa no nyinaa; ɛnyɛ aman a ɛwɔ ha yi nkuro no bi. 16 Na aman a Yehowa wo Nyankopɔn de ama wo sɛ agyapadeɛ yi deɛ, nnya biribiara a ɛhome wɔ nkuro no mu.+ 17 Sɛe wɔn pasaa: Hitifoɔ ne Amorifoɔ ne Kanaanfoɔ ne Perisifoɔ ne Hiwifoɔ ne Yebusifoɔ,+ sɛdeɛ Yehowa wo Nyankopɔn ahyɛ woɔ no. 18 Sɛe wɔn na wɔankyerɛ mo akyiwadeɛ a wɔyɛ ma wɔn anyame no, na moanyɛ bɔne antia Yehowa mo Nyankopɔn.+
19 “Sɛ worekɔko afa kuro bi na woka no hyem nna pii a, mfa akuma nsɛe ɛhɔ nnua, ɛfiri sɛ ɛso aba no bi na wobɛdie. Enti ntwitwa ngu.+ Adɛn, dua yɛ nipa na woaka no ahyem? 20 Nanso dua a wɔnni n’aba deɛ, twa twene. Sisi akoban+ twa kuro a ɛne wo reko no ho hyia kɔsi sɛ ɛbɛhwe aseɛ.