Deuteronomium
23 “Ɔbarima biara a ne hwewa mu aba apɛkyɛ+ anaa deɛ ne barima so atwa+ ntumi mma Yehowa asafo mu.
2 “Obiara a ɔyɛ adwaman+ ba ntumi mma Yehowa asafo mu. N’awoɔ ntoatoasoɔ a ɛtɔ so du a wɔbɛdi n’akyi aba mpo ntumi mma Yehowa asafo mu.
3 “Ammonni anaa Moabni biara ntumi mma Yehowa asafo mu.+ Wɔn awoɔ ntoatoasoɔ a ɛtɔ so du a wɔbɛdi wɔn akyi aba mpo ntumi mma Yehowa asafo mu da, 4 ɛfiri sɛ berɛ a mofiri Egypt reba no wɔamfa aduane ne nsuo ammɛhyia mo kwan so.+ Afei wɔbɔɔ Beor ba Balaam a ɔfiri Petor a ɛwɔ Mesopotamia paa sɛ ɔnnome wo.+ 5 Nanso Yehowa wo Nyankopɔn antie Balaam,+ na Yehowa wo Nyankopɔn danee nnome no yɛɛ no nhyira maa wo,+ ɛfiri sɛ Yehowa wo Nyankopɔn dɔ wo.+ 6 Wo nkwa nna nyinaa, nhwehwɛ wɔn asomdwoeɛ ne wɔn yiedie da.+
7 “Nanso ntan Edomni biara ɛfiri sɛ ɔyɛ wo nua.+
“Na ntan Egyptni biara nso ɛfiri sɛ na woyɛ hɔhoɔ wɔ ne kurom.+ 8 Awoɔ ntoatoasoɔ a ɛtɔ so mmiɛnsa a wɔbɛwo wɔn no bɛtumi aba Yehowa asafo mu.
9 “Sɛ wokɔsoɛ baabi sɛ wo ne w’atamfo rebɛko a, twe wo ho firi bɔne biara ho.+ 10 Sɛ obi wɔ wo mu na ne ho gu fĩ anadwo a,+ ne ho nte, enti ɔnkɔ nsraban no akyi. Ɛnsɛ sɛ ɔba nsraban no mu.+ 11 Na ɛrekɔ anwummerɛ no, ɔmfa nsuo nnware, na sɛ awia kɔtɔ a, afei ɔmmra nsraban no mu.+ 12 Siesie baabi nsraban no akyi na woakɔyɛ wo ho yie wɔ hɔ. 13 Nya sɔsɔ wɔ wo nneɛma mu na sɛ worekɔgya w’anan mfikyire hɔ a, wode atu amena, na wowie a wode akata wo tiafi so.+ 14 Hwɛ, Yehowa wo Nyankopɔn nam wo nsraban mu sɛ ɔbɛgye wo+ na ɔde w’atamfo ahyɛ wo nsa.+ Enti ma wo nsraban mu nyɛ kronkron+ na wammɛhunu atantanneɛ biara wo mfimfini na wantwe ne ho amfiri wo ho.+
15 “Sɛ akoa dwane firi ne wura nkyɛn ba wo hɔ a, mfa no nsan nkɔma ne wura no.+ 16 Ma no ntena wo nkyɛn wo nkuro no mu baabiara+ a ɔpɛ. Na hwɛ na woanteetee no.+
17 “Israelni baa biara nnnane asɔrefie dwamanfoɔ,+ na saa ara na Israelni barima biara nso nnnane asɔrefie dwamanfoɔ.+ 18 Mfa odwamanfoɔ akatua+ anaa kraman* boɔ+ mma Yehowa wo Nyankopɔn fie sɛ bɔhyɛ adeɛ, ɛfiri sɛ nneɛma mmienu yi nyinaa yɛ Yehowa wo Nyankopɔn akyiwadeɛ.
19 “Mma wo nua nntua biribiara ho nsiho,+ sika ho nsiho, aduane ho nsiho,+ anaa biribi foforɔ biara a wɔgye ɛho nsiho. 20 Wobɛtumi agye ɔhɔhoɔ+ nsiho, nanso wo nua deɛ, nnye no nsiho+ na ama Yehowa wo Nyankopɔn ahyira biribiara a wobɛyɛ no asase a worekɔtena soɔ no so.+
21 “Sɛ wohyɛ Yehowa wo Nyankopɔn bɔ a,+ ntwentwɛn wo nan ase sɛ wobɛtua,+ ɛfiri sɛ Yehowa wo Nyankopɔn bɛhwehwɛ afiri wo hɔ, na ɛbɛdane bɔne ama wo.+ 22 Na sɛ woanhyɛ bɔ a, ɛnneɛ wonyɛɛ bɔne biara.+ 23 Hwɛ di asɛm biara a ɛbɛfiri w’anom aba so,+ na biribiara a wode bɛhyɛ Yehowa wo Nyankopɔn bɔ sɛ wofiri wo pɛ mu de bɛbɔ afɔdeɛ ama no no, yɛ deɛ wode w’ano aka no pɛpɛɛpɛ.+
24 “Sɛ wokɔ wo yɔnko bobeturom a, di aba dodoɔ a ɛbɛmee woɔ, nanso mfa bi ngu w’adeɛ mu.+
25 “Sɛ wokɔ wo yɔnko ayufuo mu a, fa wo nsa pempan deɛ anyini no bi, nanso hwɛ na woantwe kantankrankyi anto wo yɔnko ayufuo so.+