Asomafoɔ Nnwuma
18 Yeinom akyi no, ɔfirii Atene kɔɔ Korinto. 2 Na ɔhunuu Yudani bi a wɔfrɛ no Akwila,+ Pontoni bi a na ɔfiri Italia+ baeɛ nkyɛreeɛ, ne ne yere Priskila, ɛfiri sɛ na Klaudio+ ahyɛ sɛ Yudafoɔ nyinaa mfiri Roma. Enti ɔkɔɔ wɔn nkyɛn 3 na ɛsiane sɛ na ɔne wɔn yɛ adwuma korɔ nti, ɔtenaa wɔn fie yɛɛ adwuma,+ ɛfiri sɛ na wɔyɛ ntomadanyɛfoɔ. 4 Nanso, homeda biara na ɔka asɛm wɔ hyiadan+ mu ma Yudafoɔ ne Helafoɔ gye di.
5 Afei berɛ a Silas+ ne Timoteo+ nyinaa firi Makedonia bɛduruiɛ no, Paulo de ne berɛ nyinaa kaa asɛm no, na ɔdii Yudafoɔ adanseɛ kyerɛɛ sɛ Yesu ne Kristo no.+ 6 Berɛ a wɔne no dii asie na wɔkasa tiaa no+ no, ɔporoporoo n’atadeɛ mu+ ka kyerɛɛ wɔn sɛ: “Mo mogya+ ngu mo ara mo atifi. Me deɛ, me ho afi.+ Ɛfiri nnɛ merekɔ amanaman mufoɔ nkyɛn.”+ 7 Enti ɔfirii hɔ kɔɔ ɔbarima bi a ɔsom Onyankopɔn a ne fie ne hyiadan no bɔ ho a wɔfrɛ no Titio Yusto fie. 8 Na Krispo+ a ɔyɛ hyiadan mu panin no gyee Awurade diiɛ, na ne fiefoɔ nyinaa nso yɛɛ saa ara. Na Korintofoɔ a wɔteeɛ no pii gye diiɛ maa wɔbɔɔ wɔn asu. 9 Afei, anadwo no Awurade ka kyerɛɛ Paulo+ wɔ anisoadehunu mu sɛ: “Nsuro, kɔ so kasa, nka w’ano ntom, 10 ɛfiri sɛ meka wo ho+ na obiara ntumi mfa ne nsa nka wo nyɛ wo bɔne biara; na mewɔ nnipa pii wɔ kuro yi mu.” 11 Enti ɔtenaa hɔ afe ne abosome nsia kyerɛkyerɛɛ wɔn Onyankopɔn asɛm.
12 Afei berɛ a Galio yɛ Akaia amrado+ no, Yudafoɔ no yɛɛ baako sɔre tiaa Paulo de no kɔɔ atemmuo adwa no anim+ 13 kɔkaa sɛ: “Saa nipa yi dane nkurɔfoɔ adwene+ ma wɔfa kwan foforɔ so som Onyankopɔn a ɛne mmara no nhyia.” 14 Berɛ a Paulo yɛɛ sɛ ɔrebue n’ano no, Galio ka kyerɛɛ Yudafoɔ no sɛ: “O Yudafoɔ, sɛ ɛyɛ bɔne anaa amumuyɔdeɛ bi a, anka mɛte mo aseɛ. 15 Na mmom sɛ ɛyɛ nsɛm ne edin+ ne mo mmara+ ho akyinnyegyeɛ deɛ a, ɛnneɛ mo ara monhwɛ nka. Mempɛ sɛ mɛyɛ nsɛm yi ho ɔtemmufoɔ.” 16 Ɛnna ɔpamoo wɔn firii atemmuo adwa no anim. 17 Enti wɔn nyinaa to hyɛɛ Sostene+ a ɔyɛ hyiadan mu panin no so firii aseɛ hwee no atemmuo adwa no anim. Nanso Galio anyɛ ho hwee.
18 Nanso berɛ a Paulo dii nna kakra kaa ho wɔ hɔ no, ɔne anuanom no dii nkra na ɔde ɛpo so hyɛn firii hɔ kɔɔ Siria a Priskila ne Akwila ka ne ho, na ɔyii ne ti maa no kɔɔ fam+ wɔ Kenkrea,+ ɛfiri sɛ na wahyɛ bɔ. 19 Enti wɔkɔɔ Efeso, na ɔgyaa wɔn hɔ; na ɔno deɛ ɔkɔɔ hyiadan+ mu ne Yudafoɔ no kɔsusuu nsɛm ho. 20 Wɔsrɛɛ no sɛ ɔntena wɔn nkyɛn kakra deɛ, nanso wampene so, 21 na ɔne wɔn dii nkra+ ka kyerɛɛ wɔn sɛ: “Sɛ Yehowa pɛ+ a, mɛba mo nkyɛn bio.” Na ɔfirii Efeso faa po so 22 kɔɔ Kaesarea. Na ɔkɔkyeaa asafo no, na ɔtoaa so kɔɔ Antiokia.
23 Berɛ a ɔtenaa hɔ kakra no, ɔfirii hɔ tutuu akwan faa Galatia+ ne Frigia+ nsase so hyehyɛɛ asuafoɔ no nyinaa den.+
24 Afei Yudani bi a wɔfrɛ no Apolo+ a ɔfiri Aleksandria, ɔbarima a n’ano ateɛ, baa Efeso, na na ɔnim Twerɛnsɛm no mu yie.+ 25 Ná wɔakyerɛkyerɛ no Yehowa kwan so, na ɛsiane sɛ na honhom ahyɛ no mã+ nti, ɔkaa Yesu ho asɛm kyerɛkyerɛɛ mu pɛpɛɛpɛ, nanso na Yohane asubɔ+ no nko ara na ɔnim. 26 Na onipa yi firii aseɛ de akokoɔduro kasaa wɔ hyiadan no mu. Berɛ a Priskila ne Akwila+ tee deɛ ɔreka no, wɔfaa no kaa wɔn ho kyerɛkyerɛɛ Onyankopɔn akwan no mu pefee kyerɛɛ no. 27 Afei, ɛsiane sɛ na ɔpɛ sɛ ɔtwa kɔ Akaia nti, anuanom twerɛɛ asuafoɔ no srɛɛ wɔn sɛ wɔnnye no fɛ so. Enti berɛ a ɔduruu hɔ no, ɔboaa+ wɔn a wɔnam Onyankopɔn adom+ so agye adie no paa; 28 ɔde nnam daa no adi pefee wɔ badwam sɛ Yudafoɔ no afom kwan, na ɔde Twerɛnsɛm+ no kyerɛɛ sɛ Yesu ne Kristo+ no.