2 Berɛsosɛm

36 Ɛnna asase no sofoɔ faa Yosia ba Yehoahas,+ na wɔsii no hene maa no dii ne papa adeɛ wɔ Yerusalem.+ 2 Yehoahas bɛdii adeɛ no, na wadi mfeɛ aduonu mmiɛnsa, na ɔdii hene abosome mmiɛnsa wɔ Yerusalem.+ 3 Na Egypt hene bɛtuu no adeɛ so wɔ Yerusalem,+ na ɔmaa asase no tuaa dwetɛ+ dwetikɛseɛ ɔha ne sika dwetikɛseɛ baako. 4 Afei, Egypt hene+ de ɔhene no nua Eliakim+ sii Yuda ne Yerusalem so hene, na ɔsesãã ne din frɛɛ no Yehoiakim. Ne nua Yehoahas deɛ, Neko+ faa no kɔɔ Egypt.+

5 Yehoiakim+ bɛdii adeɛ no, na wadi mfeɛ aduonu nnum, na ɔdii hene mfeɛ dubaako wɔ Yerusalem.+ Ɔyɛɛ Yehowa, ne Nyankopɔn ani so bɔne.+ 6 Ɔno na Babilon hene Nebukadnesar+ baa ne so+ sɛ ɔde kɔbere nkɔnsɔnkɔnsɔn mmienu rebɛgu no na ɔde no akɔ Babilon+ no. 7 Na Nebukadnesar+ sesaa Yehowa fie anwenneɛ+ no bi kɔɔ Babilon, na ɔde kɔguu n’ahemfie wɔ Babilon.+ 8 Yehoiakim ho nsɛm a aka,+ akyiwadeɛ+ a ɔyɛeɛ ne nsɛmmɔne a wɔhunuu wɔ ne ho no, wɔatwerɛ ne nyinaa wɔ Israel ne Yuda Ahemfo Nwoma+ no mu. Ne ba Yehoiakin+ bɛdii n’adeɛ.

9 Yehoiakin+ bɛdii adeɛ no, na wadi mfeɛ dunwɔtwe, na ɔdii hene abosome mmiɛnsa+ ne dadu wɔ Yerusalem. Ɔyɛɛ Yehowa ani so bɔne.+ 10 Na afe kɔ bɛhyiaeɛ+ no, Ɔhene Nebukadnesar soma+ maa wɔkɔfaa no baa Babilon,+ na wɔde Yehowa fie nneɛma a ɛsom boɔ kaa ne ho baeɛ.+ Na ɔde ne papa nua Sedekia+ sii Yuda ne Yerusalem so hene.+

11 Sedekia+ bɛdii adeɛ no, na wadi mfeɛ aduonu baako, na ɔdii hene mfeɛ dubaako wɔ Yerusalem.+ 12 Ɔyɛɛ Yehowa, ne Nyankopɔn ani so bɔne.+ Wammrɛ ne ho ase+ amma odiyifoɔ+ Yeremia+ a ɔkasaa Yehowa asɛm soɔ no. 13 Ɔhene Nebukadnesar a ɔmaa no kaa Onyankopɔn ntam+ no mpo, ɔtee ne so atua;+ ɔkɔɔ so senee+ ne kɔn na ɔmaa n’akoma yɛɛ den,+ na wansan amma Yehowa, Israel Nyankopɔn nkyɛn. 14 Asɔfoɔ mpanimfoɔ+ ne ɔman no nyinaa nso maa wɔn mmarato dɔɔso bebree, na wɔyɛɛ akyiwadeɛ+ a amanaman no yɛeɛ no bi de guu Yehowa fie a wayɛ no kronkron wɔ Yerusalem no ho fĩ.+

15 Na Yehowa, wɔn agyanom Nyankopɔn somaa ne nkoa kɔkasa kyerɛɛ wɔn+ mprɛ pii, ɛfiri sɛ ɔhuu ne man+ ne ne tenabea+ mmɔbɔ. 16 Nanso wɔkɔɔ so goroo+ nokorɛ Nyankopɔn nkoa no ho buu ne nsɛm animtia,+ na wɔdii n’adiyifoɔ no ho fɛ+ kɔsii sɛ Yehowa abufuo+ baa ne man so a wɔannya ayaresa.+

17 Enti ɔmaa Kaldeafoɔ+ hene de nkrantɛ baa wɔn so bɛkunkum wɔn mmeranteɛ+ wɔn kronkronbea+ hɔ, na wanhu aberanteɛ anaa ɔbaabunu, ɔpanin anaa deɛ wagoɔ mmɔbɔ.+ Onyankopɔn de biribiara hyɛɛ ne nsa. 18 Na nokorɛ Nyankopɔn fie anwenneɛ+ nyinaa, akɛseɛ+ ne nketewa, ne Yehowa fie akoradeɛ+ ne ɔhene ne ne mpanimfoɔ akoradeɛ+ nso, ɔde ne nyinaa kɔɔ Babilon. 19 Afei ɔhyee nokorɛ Nyankopɔn fie+ no, na ɔdwirii Yerusalem afasuo no guiɛ;+ n’abantenten ne emu nneɛma a ɛsom boɔ+ nyinaa nso, ɔde gya hyeeɛ, na ɔsɛee hɔ pasaa.+ 20 Bio nso, ɔde wɔn a wɔfiri nkrantɛ ano kaeɛ no kɔɔ Babilon+ nkoasom mu, na wɔyɛɛ nkoa maa ɔne+ ne mma kɔsii sɛ Persia ahennie+ firii aseɛ. 21 Yei maa Yehowa asɛm a ɔde hyɛɛ Yeremia anom no baa mu+ kɔsii sɛ asase no tuaa ne home nna ho ka wieeɛ.+ Nna dodoɔ a ɛyɛɛ amamfõ no, ɛhomee ara kɔsii sɛ mfeɛ aduɔson duruiɛ.+

22 Persia hene+ Kores+ afe a ɛdi kan mu no, sɛdeɛ ɛbɛyɛ a Yehowa asɛm+ a ɔnam Yeremia+ so kaeɛ no bɛba mu nti, Yehowa kanyan Persia hene Kores honhom,+ na ɔmaa wɔbɔɔ dawuro n’ahennie mu nyinaa, na wɔtwerɛɛ+ nso sɛ: 23 “Sɛdeɛ Persia hene Kores+ seɛ nie, ‘Yehowa, ɔsoro Nyankopɔn no, de asase so ahennie nyinaa ama me,+ na ɔno na ahyɛ me sɛ mensi fie mma no wɔ Yerusalem a ɛwɔ Yuda.+ Enti obiara a ɔka mo ho+ a ɔsom no no, Yehowa, ne Nyankopɔn nni n’akyi.+ Ma no mforo nkɔ.’”+