1 Korintofoɔ
12 Na ɛdefa honhom mu akyɛdeɛ+ no ho no, anuanom, mempɛ sɛ mo ani pa soɔ. 2 Monim sɛ berɛ a moyɛ amanaman mufoɔ+ no, wɔnam akwan hodoɔ so twee mo kɔɔ abosom+ a wɔnkasa+ ho. 3 Enti mepɛ sɛ mohunu sɛ obiara nni hɔ a ɔde Onyankopɔn honhom kasa a ɔka sɛ: “Yesu yɛ abusudeɛ!”+ na obiara ntumi nka sɛ: “Yesu ne Awurade!” gye sɛ ɛnam honhom kronkron so.+
4 Akyɛdeɛ no gu ahodoɔ,+ nanso honhom korɔ+ no ara na ɛwɔ hɔ; 5 na ɔsom adwuma gu ahodoɔ,+ nanso Awurade korɔ+ na ɔwɔ hɔ; 6 na dwumadie gu ahodoɔ,+ nanso Onyankopɔn korɔ+ no ara na ɔdi dwuma no nyinaa wɔ nnipa nyinaa mu.+ 7 Na atirimpɔ pa bi nti na wɔda honhom no adi wɔ obiara mu.+ 8 Wɔnam honhom no so ma obi nyansa-kasa,+ na wɔma ɔfoforɔ nso nimdeɛ-kasa+ a ɛnam honhom korɔ no ara soɔ, 9 ɔfoforɔ nso nam honhom korɔ no ara so nya gyidie,+ na ɔfoforɔ nso nam honhom baako no ara so nya ayaresa akyɛdeɛ,+ 10 na obi nso tumi yɛ ahoɔdenneɛ,+ ɔfoforɔ nso nya nkɔmhyɛ,+ ɔfoforɔ nso nya honhom mu nsɛm+ mu nhunumu,+ ɔfoforɔ nso nya kasa hodoɔ,+ na ɔfoforɔ nso nya kasa hodoɔ nkyerɛaseɛ.+ 11 Nanso honhom koro pɛ no ara na ɛdi dwuma yi nyinaa,+ na ɛde obiara deɛ ma+ no sɛdeɛ ɛpɛ.+
12 Na nipadua no yɛ baako nanso ɛwɔ akwaa pii, na sɛdeɛ saa nipadua no akwaa dɔɔso, nanso ne nyinaa yɛ nipadua koro+ no, saa ara na Kristo nso teɛ.+ 13 Asɛm no ne sɛ, Yudafoɔ oo, Helafoɔ oo, nkoa oo, adehyeɛ oo, honhom baako so na wɔnam bɔɔ yɛn nyinaa asu+ kɔɔ nipadua baako mu, na wɔmaa yɛn nyinaa nom+ honhom baako.
14 Nokorɛm no, nipadua no nyɛ kwaa baako; ɛdɔɔso.+ 15 Sɛ ɛnan ka sɛ: “Menyɛ nsa nti menka nipadua no ho” a, yei nkyerɛ sɛ ɛnka nipadua no ho.+ 16 Na sɛ asõ ka sɛ: “Menyɛ ani nti menka nipadua no ho” a, yei nkyerɛ sɛ ɛnka nipadua no ho.+ 17 Sɛ nipadua nyinaa yɛ ani a, anka deɛ wɔde te asɛm wɔ he? Sɛ ne nyinaa yɛ deɛ wɔde te asɛm a, anka deɛ wɔde te hwa wɔ he? 18 Afei Onyankopɔn de akwaa yi mu biara ahyɛ nipadua no mu sɛdeɛ ɔpɛ.+
19 Sɛ ne nyinaa yɛ kwaa baako+ a, anka nipadua no wɔ he? 20 Nanso akwaa pii na ɛwɔ hɔ,+ na nipadua no deɛ, ɛyɛ baako. 21 Ani ntumi nka nkyerɛ nsa sɛ: “Menhia wo”; na saa ara na etire ntumi nka nkyerɛ ɛnan sɛ: “Menhia wo.” 22 Na mmom deɛ ɛteɛ ara ne sɛ nipadua mu akwaa a ayɛ sɛ ɛyɛ mmerɛ+ no na ɛho hia, 23 na nipadua mu akwaa a yɛsusu sɛ ɛnni anidie no, ɛno na yɛde anidie pii hyehyɛ+ no, na akwaa a ɛnyɛ fɛ no na ɛnya ahokeka pii, 24 na yɛn akwaa a ɛyɛ fɛ no nhia hwee. Nanso Onyankopɔn hyehyɛɛ nipadua no de anidie pii maa akwaa a ɛnni bie no, 25 sɛdeɛ ɛbɛyɛ a mpaepaemu biara remma nipadua no mu na mmom akwaa no bɛnya adwenkorɔ ama wɔn ho.+ 26 Na sɛ kwaa baako hunu amane a, akwaa a aka no nyinaa hunu amane+ bi; na sɛ wɔhyɛ kwaa bi animuonyam+ a, akwaa a aka no nyinaa ne no di ahurisie.+
27 Moyɛ Kristo nipadua ne akwaa mmaako mmaako.+ 28 Na Onyankopɔn de ankorankoro asisi hɔ asafo no mu,+ deɛ ɛdi kan ne asomafoɔ;+ deɛ ɛtɔ so mmienu, adiyifoɔ;+ mmiɛnsa, akyerɛkyerɛfoɔ;+ deɛ ɛdi hɔ bio ne ahoɔdenneɛ;+ afei ayaresa+ akyɛdeɛ; ɔsom a wɔde boa afoforɔ,+ sɛdeɛ wɔtoto nneɛma yie,+ ne kasa hodoɔ.+ 29 Nnipa nyinaa na wɔyɛ asomafoɔ anaa? Nnipa nyinaa na wɔyɛ adiyifoɔ? Nnipa nyinaa na wɔyɛ akyerɛkyerɛfoɔ? Nnipa nyinaa na wɔyɛ ahoɔdenneɛ anaa? 30 Obiara na ɔwɔ ayaresa akyɛdeɛ no anaa? Obiara na ɔka kasa hodoɔ?+ Obiara na ɔkyerɛ nsɛm ase anaa?+ 31 Nanso mommɔ mmɔden nhwehwɛ akyɛdeɛ akɛseɛ+ no. Na afei mɛkyerɛ mo ɛkwan a ɛkyɛn soɔ.+