1 Korintofoɔ
11 Monsuasua me sɛdeɛ me nso mesuasua Kristo no.+
2 Afei mekamfo mo, ɛfiri sɛ mokae me adeɛ nyinaa mu, na mokura deɛ mo nsa kaeɛ+ no mu sɛdeɛ mede gyaa mo no ara. 3 Nanso mepɛ sɛ mohunu sɛ ɔbarima biara ti ne Kristo;+ ɔbaa nso ti ne ɔbarima;+ Kristo nso ti ne Onyankopɔn.+ 4 Ɔbarima biara a ɔbɔ mpaeɛ anaa ɔhyɛ nkɔm na biribi kata ne ti no hyɛ ne ti aniwuo;+ 5 na ɔbaa biara a ɔbɔ mpaeɛ anaa ɔhyɛ nkɔm+ na ɔnkata ne ti no hyɛ ne ti aniwuo,+ na ɔte sɛ ɔbaa a wɔabɔ no tikwa+ pɛpɛɛpɛ. 6 Na sɛ ɔbaa ankata ne ti a, ma no nyi ne tiri nwi nso; na sɛ ɛyɛ aniwu sɛ ɔbaa bɛyi ne tiri nwi anaa ɔbɛbɔ tikwa+ a, ɛnneɛ ma no nkata ne ti.+
7 Na ɛnsɛ sɛ ɔbarima kata ne ti, ɛfiri sɛ ɔyɛ Onyankopɔn suban+ ne n’animuonyam;+ na ɔbaa deɛ, ɔyɛ ɔbarima animuonyam.+ 8 Na ɔbarima mfiri ɔbaa mu, ɔbaa mmom na ɔfiri ɔbarima mu;+ 9 na bio nso ɛnyɛ ɔbaa nti na wɔbɔɔ ɔbarima, na mmom ɔbarima nti na wɔbɔɔ ɔbaa.+ 10 Ɛno nti na ɛsɛ sɛ ɔbaa nya tumi ho sɛnkyerɛnne wɔ ne tiri so,+ abɔfoɔ+ no nti.
11 Deɛ ɛka ho bio no, Awurade mu no, ɔbarima ntumi nkwati ɔbaa, na ɔbaa nso ntumi nkwati ɔbarima.+ 12 Na sɛdeɛ ɔbaa firi ɔbarima mu+ no, saa ara na ɔbarima nso nam ɔbaa so na ɛbaeɛ;+ nanso nneɛma nyinaa firi Onyankopɔn mu.+ 13 Mo ara mommu atɛn: Ɛfata sɛ ɔbaa bɔ Onyankopɔn mpaeɛ berɛ a ɔnkataa ne ti anaa? 14 Adɛn, awosuo mpo nkyerɛ mo sɛ ɔbarima gya ne tiri nwi kusuu a, ɛnyɛ anidie mma no, 15 na ɔbaa deɛ, sɛ ne tiri nwi dɔɔso a, ɛhyɛ no animuonyam?+ Ɛfiri sɛ wɔde ne nwi no ama no sɛ ne ti nkatasoɔ.+ 16 Nanso sɛ obi po+ amanneɛ yi gye foforɔ tom+ a, yɛn deɛ yɛnni foforɔ biara, Onyankopɔn asafo ahodoɔ no nso saa ara.
17 Nanso, berɛ a merema mo ahyɛdeɛ yi no, ɛnyɛ nkamfoɔ na mede rema mo, ɛfiri sɛ sɛ mohyiam a, ɛnyɛ adepa na moyɛ, na mmom adebɔne.+ 18 Deɛ ɛdi kan koraa no, mate sɛ mohyiam sɛ asafo a, mpaepaemu wɔ mo mu;+ na megye di ɛkwan bi so. 19 Na ɛtwa sɛ fekuo+ ahodoɔ nso ba mo mu, na ama wɔn a wɔfata no ada adi mo mu.+
20 Enti sɛ mohyiam faako a, montumi nni Awurade anwummeduane no,+ 21 ɛfiri sɛ sɛ ɛduru sɛ moredi a, obiara di ɔno ara anwummeduane ansa, ma enti ɛkɔm de obi na ɔfoforɔ nso abo. 22 Monni afie a modidi na monom wom anaa?+ Anaasɛ mobu Onyankopɔn asafo animtia, na mohyɛ wɔn a wɔnni hwee+ no aniwuo? Ɛdeɛn na menka nkyerɛ mo? Menkamfo mo anaa? Yei mu deɛ, merenkamfo mo.
23 Deɛ menya firii Awurade hɔ no ara na me nso mede maa mo, ɛne sɛ anadwo+ a wɔrebɛyi Awurade Yesu ama no, ɔfaa paanoo, 24 na ɔdaa ase wieeɛ no, ɔbubuu mu+ kaa sɛ: “Yei gyina hɔ ma me nipadua+ a wɔde bɛma mo. Monkɔ so nyɛ yei mfa nkae+ me.” 25 Saa ara na ɔyɛɛ kuruwa no+ berɛ a ɔwiee anwummeduane no, na ɔkaa sɛ: “Kuruwa yi gyina hɔ ma apam foforɔ+ a ɛnam me mogya+ soɔ no. Berɛ biara a mobɛnom kuruwa yi ano no, monkɔ so mfa nkae+ me.” 26 Na berɛ biara+ a mobɛdi paanoo yi anom kuruwa yi ano no, na morepae mu aka Awurade wuo+ no akɔsi sɛ ɔbɛba.+
27 Ne saa nti obiara a ɔdi paanoo no anaa ɔnom Awurade kuruwa no ano ɛkwan a ɛnsɛ soɔ no bɛdi Awurade nipadua ne ne mogya+ ho fɔ.+ 28 Deɛ ɛdi kan no, ma onipa nhwehwɛ ne mu mfa nsɔ ne ho nhwɛ+ ansa na wadi paanoo no anom kuruwa no ano. 29 Na deɛ ɔdi na ɔnom a ɔnnim deɛ nipadua no kyerɛ no, ɔdi nom de atemmuo+ ba ɔno ara ne so. 30 Ɛno nti na mo mu bebree ayɛ mmerɛ na wɔyareyareɛ, na ebinom nso adeda+ wɔ owuo mu no. 31 Na sɛ yɛtumi hunu nipa ko a yɛyɛ a, ɛnneɛ wɔremmu yɛn atɛn.+ 32 Nanso sɛ wɔbu yɛn atɛn+ a, Yehowa tene yɛn so+ sɛdeɛ ɛbɛyɛ a wɔremmu yɛn fɔ+ nka wiase no ho.+ 33 Ne saa nti me nuanom, sɛ mohyiam sɛ morebɛdi+ a, montwɛn mo ho mo ho. 34 Sɛ ɛkɔm de obi a, ma no nnidi wɔ fie,+ na moammɛhyiam ammɛnya atemmuo.+ Na nsɛm a aka no deɛ, sɛ meba hɔ a na mɛtoto no yie.