Asomafoɔ Nnwuma
20 Na afei basabasa no ano brɛɛ ase, na Paulo soma kɔfrɛɛ asuafoɔ no, na berɛ a ɔhyɛɛ wɔn nkuran na ɔne wɔn dii nkra+ no, ɔsii kwan so kɔɔ Makedonia.+ 2 Berɛ a ɔkɔfaa hɔnom na ɔkaa nsɛm bebree de hyɛɛ wɔn a wɔwɔ hɔ no nkuran+ no, ɔbaa Hela. 3 Ɔdii abosome mmiɛnsa wɔ hɔ, na ɔresan akɔ no, ɔyɛɛ n’adwene sɛ ɔbɛkɔ akɔfa Makedonia mmom, ɛfiri sɛ berɛ a ɔrebɛkɔ Siria no Yudafoɔ no bɔɔ ne ho pɔ.+ 4 Ná wɔn a wɔka ne ho ne Beroiani Piro ba Sopata,+ Aristarko+ ne Sekundo a wɔyɛ Tesalonikafoɔ, Derbeni Gaio, Timoteo,+ ne Tihiko+ ne Trofimo+ a wɔfiri Asia mantam mu no. 5 Yeinom tutuu so kɔtwɛn yɛn wɔ Troa;+ 6 na paanoo a mmɔreka nnim+ nna no akyi no, yɛtenaa hyɛn mu firii Filipi, na nnanum ntam no, yɛkɔtoo wɔn wɔ Troa;+ na yɛdii nnanson wɔ hɔ.
7 Da a ɛdi kan+ wɔ nnawɔtwe no mu, berɛ a na yɛahyiam rebɛdidie no, Paulo firii aseɛ kasa kyerɛɛ wɔn, ɛfiri sɛ na ɔbɛfiri hɔ da a ɛdi hɔ no; na ɔtoaa ne kasa no so kɔsii dasuom. 8 Enti ná nkanea pii wɔ abansoro dan+ a yɛahyiam wom no mu. 9 Paulo gu so rekasa no, aberanteɛ bi a wɔfrɛ no Eutiko a na ɔte mpomma ano no faa mu daa hatee, na nna no mu no, ɔfirii abansoro a ɛtɔ so mmiɛnsa no so bɛhwee fam, na wɔmaa ne soɔ no, na wawu. 10 Na Paulo siane kɔɔ fam kɔbutuu ne so,+ na ɔbam no kaa sɛ: “Monnyae gyegyeegye no na ne kra wɔ ne mu.”+ 11 Afei ɔforoo abansoro no, na ɔfaa aduane firii aseɛ diiɛ, na ɔbɔɔ nkɔmmɔ ara kɔduruu ahemadakye, na afei ɔfirii hɔ kɔeɛ. 12 Enti wɔde aberanteɛ no kɔeɛ a ɔwɔ nkwa mu, na wɔn werɛ kyekye boroo so.
13 Afei yɛdii kan kɔtenaa hyɛn mu kɔɔ Aso, baabi a na yɛayɛ adwene sɛ yɛbɛfa Paulo no, ɛfiri sɛ berɛ a ɔka kyerɛɛ yɛn sɛ yɛnyɛ saa no, ɔno ara yɛɛ n’adwene sɛ ɔbɛnante akɔ. 14 Enti berɛ a ɔne yɛn hyiaa wɔ Aso no, yɛfaa no ne no kɔɔ Mitilene; 15 n’adekyeeɛ a yɛtu firii hɔ no, yɛkɔɔ Kio ntentensoɔ, na da a ɛdi hɔ no, yɛduruu Samo, na adeɛ kyeeɛ no, yɛkɔɔ Mileto; 16 ɛfiri sɛ na Paulo asi gyinaeɛ sɛ ɔrennyina Efeso,+ sɛdeɛ ɛbɛyɛ a ɔrensɛe berɛ wɔ Asia mantam no mu; ɛfiri sɛ na ne ho pere no sɛ sɛ ɔbɛtumi a anka ɔbɛduru Yerusalem+ Pentekoste afahyɛ da no.
17 Nanso, ɔfiri Mileto soma kɔɔ Efeso kɔfrɛɛ asafo mu mpanimfoɔ+ no. 18 Wɔbaeɛ no ɔka kyerɛɛ wɔn sɛ: “Mo ara monim sɛdeɛ ɛfiri da a ɛdi kan a mebaa Asia+ mantam mu no, metenaa mo nkyɛn saa berɛ no nyinaa,+ 19 na mede ahobrɛaseɛ adwene+ kɛseɛ ne nisuo ne sɔhwɛ a ɛtoo me ɛsiane sɛ Yudafoɔ bɔɔ me ho pɔ+ nti no som+ Awurade; 20 na mamfa deɛ mfasoɔ wɔ so a ɛsɛ sɛ meka kyerɛ mo, ne kyerɛ a ɛsɛ sɛ mekyerɛkyerɛ+ mo badwam ne afie+ afie no biara ankame mo. 21 Na mmom medii Onyankopɔn fam adwensakra+ ne yɛn Awurade Yesu mu gyidie ho adanseɛ fekɔfekɔ+ kyerɛɛ Yudafoɔ ne Helafoɔ nyinaa. 22 Afei, hwɛ! honhom no ahyɛ me+ ama merekɔ Yerusalem, ɛwom sɛ mennim deɛ ɛbɛto me wɔ hɔ deɛ, 23 nanso ɛno ara ne sɛ kuro biara mu no, honhom kronkron+ no kɔ so di me adanseɛ sɛ mpokyerɛ ne ahohiahia retwɛn me.+ 24 Nanso, me kra ho nhia me pii+ sɛ wie a mɛwie m’ammirikatuo+ ne ɔsom adwuma+ a menya+ firii Awurade Yesu hɔ sɛ menni Onyankopɔn adom+ ho asɛmpa no ho adanseɛ fekɔfekɔ no.
25 “Afei, hwɛ! Menim sɛ mo a mekaa ahennie no ho asɛm wɔ mo mu no nyinaa renhunu m’anim bio. 26 Enti meyi mo adansefoɔ nnɛ da yi sɛ me ho afi, nnipa nyinaa mogya ho,+ 27 ɛfiri sɛ mamfa Onyankopɔn agyinatuo+ biara ankame mo. 28 Momma mo ani mmra+ mo ho+ ne nnwankuo+ a honhom kronkron ayi mo ahwɛfoɔ+ wɔ wɔn mu no nyinaa so, sɛ monhwɛ Onyankopɔn asafo+ a ɔde ɔno ara ne Ba mogya+ tɔeɛ no so yie. 29 Menim sɛ me kɔ akyi no, mpataku+ bɔne* bɛhyɛn mo mu a wɔrenyɛ nnwankuo no brɛbrɛ, 30 na mo ara mo mu na mmarima bɛsɔre akasa akyinkyim nsɛm+ de atwe asuafoɔ no adi wɔn akyi.+
31 “Enti monwɛn, na monkae sɛ mfeɛ mmiɛnsa+ nie, awia ne anadwo, mannyae sɛ mede nisuo bɛtu mo mu biara foɔ.+ 32 Afei mede mo hyɛ Onyankopɔn ne asɛm a ɛfiri n’adom mu no ase,+ asɛm a ɛbɛtumi ahyɛ mo den+ na ama moanya agyapadeɛ wɔ wɔn a wɔate wɔn ho nyinaa mu.+ 33 M’ani mmeree obiara dwetɛ anaa sika anaa atadeɛ.+ 34 Mo ara monim sɛ nsa yi na ama me ne wɔn a wɔka me ho no anya deɛ yɛhia.+ 35 Mada no adi akyerɛ mo adeɛ nyinaa mu sɛ ɛtwa sɛ moyɛ adwumaden+ saa de boa wɔn a wɔyɛ mmerɛ+ no, na ɛsɛ sɛ mokae asɛm a Awurade Yesu no ara kaeɛ no sɛ, ‘Ɔma+ mu wɔ anigyeɛ pii sene ɔgyeɛ.’”
36 Na ɔkasa wieeɛ no, ɔne wɔn nyinaa buu nkotodwe+ bɔɔ mpaeɛ. 37 Nokorɛm no, wɔn nyinaa suu yie, na wɔsosɔɔ Paulo kɔn+ mu fee n’ano,+ 38 ɛfiri sɛ asɛm a ɔkaeɛ sɛ wɔrenhu no+ bio no yɛɛ wɔn ya yie. Enti wɔgyaa no kwan+ de no kɔtenaa hyɛn no mu.