Krataa a Ɛdi Kan a Ɔde Kɔmaa Tesalonikafoɔ

1 Me Paul, me ne Silwano,*+ ne Timoteo,+ yɛde krataa yi rekɔma Tesalonikafoɔ asafo a ɛwɔ Agya Nyankopɔn ne Awurade Yesu Kristo mu no:

Adom ne asomdwoeɛ nka mo.

2 Sɛ yɛbɔ mo nyinaa din wɔ yɛn mpaebɔ mu a, ɛyɛ a yɛda Onyankopɔn ase daa,+ 3 ɛfiri sɛ berɛ nyinaa yɛkae adwuma a mode gyidie yɛ, adwumaden a mode ɔdɔ yɛ, ne animia a yɛn Awurade Yesu Kristo mu anidasoɔ nti, mode gyina amanehunu mu+ wɔ yɛn Nyankopɔn ne Agya no anim no. 4 Anuanom a Onyankopɔn dɔ mo, yɛnim sɛ wayi mo, 5 ɛfiri sɛ asɛmpa a yɛka no, ɛnyɛ yɛn ano nko na yɛde ka kyerɛɛ mo, na mmom yɛde tumi ne honhom kronkron ne awerɛhyɛmu a emu yɛ den nso kaa ho, na mo ara monim sɛdeɛ yɛyɛɛ yɛn ho maa mo berɛ a na yɛwɔ mo nkyɛn no. 6 Na mosuasuaa yɛn+ ne Awurade,+ ɛfiri sɛ mode anigyeɛ a honhom kronkron maa monyaeɛ no gyee asɛm no wɔ amanehunu pii mu.+ 7 Enti moabɛyɛ nhwɛsoɔ ama agyidifoɔ a wɔwɔ Makedonia ne Akaia no nyinaa.

8 Nokwasɛm ne sɛ, ɛnyɛ Makedonia ne Akaia nko ara na Yehowa* asɛm no afiri mo hɔ atrɛ akɔduru, na mmom Onyankopɔn mu gyidie a mowɔ no atrɛ aduru baabiara,+ enti ɛnhia sɛ yɛka biribiara mpo. 9 Ɛfiri sɛ wɔn ankasa ka berɛ a ɛdi kan a yɛhyiaa mo no ho asɛm daa, sɛdeɛ motwee mo ho firii mo ahoni ho+ baa Onyankopɔn nkyɛn sɛ morebɛsom Onyankopɔn teasefoɔ ne ɔnokwafoɔ no, 10 na moatwɛn ne Ba a ɔfiri soro no,+ ne Ba a ɔnyanee no firii awufoɔ mu a ɔne Yesu, deɛ ɔgye yɛn firi abufuo a ɛreba no mu+ no.