Asomafo Nnwuma
26 Agripa+ ka kyerɛɛ Paulo sɛ: “Wowɔ hokwan sɛ wuyi w’ano.” Ɛnna Paulo teɛɛ ne nsa+ fii ase yii n’ano+ sɛ:
2 “Nea Yudafo no de abɔ me sobo+ nyinaa, ɛyɛ me dɛ sɛ wo Ɔhene Agripa anim na merebeyi m’ano nnɛ da yi, 3 ne titiriw ne sɛ wunim amanne+ nyinaa ne akyinnyegye a ɛwɔ Yudafo mu. Ne saa nti mesrɛ wo, tɔ wo bo ase tie me.
4 “Nokwarem no, asetena+ a mifii ase fi mmofraase wɔ me man mu ne Yerusalem de, Yudafo 5 a wonim me dedaw fi mfiase no nyinaa nim, na wɔpɛ a wobetumi adi me ho adanse sɛ mebɔɔ me bra sɛnea yɛn som mu amanne+ te pɛpɛɛpɛ sɛ Farisini.+ 6 Nanso afei bɔhyɛ+ a Onyankopɔn de maa yɛn agyanom ho anidaso+ nti na migyina atemmu agua anim yi; 7 na yɛn mmusuakuw dumien no som no denneennen awia ne anadwo a wɔn ani da so sɛ wɔn nsa bɛka saa bɔhyɛ yi mmamu.+ Ɔhene, saa anidaso yi ho na Yudafo abɔ me sobo yi.+
8 “Dɛn nti na munnye nni sɛ Onyankopɔn nyan awufo?+ 9 Me nso, na midwen me mu sɛ ɛsɛ sɛ meyɛ nneɛma pii de ko tia Nasareni Yesu din; 10 na saa pɛpɛɛpɛ na meyɛe wɔ Yerusalem, na minyaa tumi fii asɔfo mpanyin no hɔ+ de akronkronfo bebree guu afiase;+ na sɛ wɔrekum wɔn a, mefoa so. 11 Na metwee wɔn aso mpɛn pii wɔ hyia adan+ nyinaa mu sɛnea wɔbɛka biribi de apo wɔn gyidi; na esiane m’ani a na abere wɔn so paa nti, mekɔɔ nkurow foforo so mpo kɔtaa wɔn wɔ hɔ.
12 “Bere a migu so reyɛ eyi a mede tumi ne ahyɛde a minya fii asɔfo mpanyin no hɔ rekɔ Damasko,+ 13 na eduu owigyinae no, Ɔhene, mihuu hann bi a ano yɛ den sen owia sɛ ahyerɛn fi soro atwa me ne wɔn a wɔne me rekɔ no ho ahyia wɔ ɔkwan no so.+ 14 Na bere a yɛn nyinaa hwehwee fam no, metee sɛ nne bi ka kyerɛɛ me Hebri kasa mu sɛ, ‘Saul, Saul, dɛn nti na wotaa me? Sɛ wokɔ so tu wo nan wɔ poma ano a, ɛbɛyɛ den ama wo.’+ 15 Na mekae sɛ, ‘Ɛyɛ wo hena, Owura?’ Na Awurade ka kyerɛɛ me sɛ, ‘Ɛyɛ me Yesu a wotaa no+ no. 16 Nanso, sɔre gyina wo nan so.+ Na eyi nti na mama woahu me, sɛ merepaw wo sɛ ɔsomfo ne ɔdansefo+ wɔ nea woahu ne nea mɛma woahu afa me ho nyinaa ho; 17 na megye wo nso afi ɔman yi ne amanaman a meresoma wo akɔ wɔn nkyɛn no nsam,+ 18 na woabue wɔn aniwa,+ adan wɔn afi esum+ mu aba hann+ mu, na wɔafi Satan tumi+ mu aba Onyankopɔn nkyɛn, na wɔanya bɔne fafiri+ ne agyapade+ wɔ wɔn a wɔnam me mu gyidi so atew+ wɔn ho no mu.’
19 “Enti Ɔhene Agripa, manyɛ anisoade a efi ɔsoro no ho asoɔden,+ 20 mmom no, mekasa kyerɛɛ wɔn a wɔwɔ Damasko+ kan ne afei Yerusalem,+ ne Yudea mantam nyinaa mu, ne amanaman+ no, sɛ wɔnsakra wɔn adwene na wɔmfa nnwuma a ɛkyerɛ adwensakra so nnan mmra Onyankopɔn nkyɛn.+ 21 Eyi nti na Yudafo kyeree me asɔrefie hɔ pɛe sɛ wokum me.+ 22 Nanso mmoa+ a manya wɔ Onyankopɔn nkyɛn nti na makɔ so atena hɔ abedu nnɛ a meredi adanse akyerɛ nketewa ne akɛse nyinaa yi; menkaa hwee, gye nsɛm a Adiyifo+ no ne Mose+ kae sɛ ɛbɛba no, 23 sɛ Kristo no behu amane,+ na esiane sɛ wɔadi kan anyan+ no afi awufo mu nti, wabɔ hann+ ho dawuru akyerɛ nkurɔfo yi ne amanaman+ no.”
24 Afei bere a ɔreka nsɛm yi de ayi n’ano no, Festo de nne kɛse teɛɛm sɛ: “Paulo, worebɔ dam!+ Adesua pii reyɛ ama woabɔ dam!” 25 Na Paulo kae sɛ: “Ɛnyɛ dam na merebɔ, Onuonyamfo Festo, na mmom mereka nsɛm a ɛyɛ nokware na aba wom. 26 Nokwasɛm ni, ɔhene a mede nnam rekasa akyerɛ no yi nim nsɛm yi mu yiye; na minim sɛ nsɛm yi mu biara nni hɔ a ahintaw no, efisɛ ɛnyɛ ade a wɔyɛe wɔ kokoam.+ 27 Ɔhene Agripa, so wugye Adiyifo no di? Minim sɛ wugye wɔn di.”+ 28 Na Agripa ka kyerɛɛ Paulo sɛ: “Aka bere tiaa bi na woama madan Kristoni.” 29 Ɛnna Paulo kae sɛ: “Sɛ me yam a, anka bere tiaa bi oo, bere tenten oo, ɛnyɛ wo nko, na mmom anka Onyankopɔn ayɛ wɔn a wɔretie me nnɛ yi nyinaa nso sɛnea mete yi, a mpokyerɛ yi nka ho.”
30 Na ɔhene no sɔree, na amrado no ne Bernike ne mmarima a wɔne wɔn tete hɔ no nso yɛɛ saa ara. 31 Na bere a wɔtwee wɔn ho no, asɛm a na wɔreka ara ne sɛ: “Onipa yi nyɛɛ biribiara a ɛsɛ sɛ owu+ anaa wogu no mpokyerɛ.” 32 Afei nso, Agripa ka kyerɛɛ Festo sɛ: “Sɛ ɛnyɛ sɛ onipa yi de asɛm no akɔdan+ Kaesare a, anka obetumi afa ne ho adi.”