PETRO NHOMA A ƐTO SO ABIEN

1 Me, Simon Petro a meyɛ Yesu Kristo akoa ne ɔsomafo, merekyerɛw krataa yi akɔma wɔn a wɔnam Onyankopɔn ne yɛn Agyenkwa Yesu Kristo trenee so anya gyidi a ɛsom bo te sɛ yɛn de no ara:

2 Adom ne asomdwoe mfa Onyankopɔn ne yɛn Awurade Yesu ho nokware nimdeɛ+ so nnɔɔso mma mo, 3 efisɛ Onyankopɔn tumi nti yɛanya biribiara a ɛfa nkwa ne onyamesom pa ho,* na ɛnam Onyankopɔn ho nokware nimdeɛ so;+ ɔno na ɔde n’anuonyam ne ne papayɛ frɛɛ yɛn. 4 Ɔnam eyinom so ama yɛn bɔhyɛ akɛseakɛse a ɛsom bo,+ na bere a moatumi aguan afi wiase a akɔnnɔ bɔne ama aporɔw mu no, moafa eyinom so anya Onyankopɔn su no bi.+

5 Esiane eyi nti, mo nso monyɛ nea mubetumi biara+ mfa ɔbra pa+ nka mo gyidi ho, na momfa nimdeɛ+ nka mo bra pa ho; 6 momfa ahohyɛso*+ nka mo nimdeɛ ho, momfa animia nka mo ahohyɛso ho, na momfa onyamesom pa+ nka animia ho; 7 momfa onuadɔ nka mo nyamesom pa ho; onuadɔ no akyi no, munnya ɔdɔ+ mma obiara. 8 Na sɛ eyinom nyinaa wɔ mo mu na ebu so a, mode Awurade Yesu Kristo ho nokware nimdeɛ bɛyɛ adwuma. Ɛba saa a, morenyɛ mmerɛw anaa morenyɛ nnipa a wɔnsow aba.+

9 Na obiara a eyinom nni ne mu no, na n’ani afura, ɔmpɛ sɛ ohu hann no,*+ na ne werɛ afi sɛ wɔahohoro ne bɔne+ a wayɛ atwam no. 10 Enti anuanom, monyɛ nea mubetumi biara mma hokwan a moanya sɛ wɔafrɛ mo+ na wɔapaw mo no nni mu; na sɛ mokɔ so yɛ saa a, morenhwe ase da.+ 11 Nokwasɛm ni, ɛbɛma moanya hokwan kɛse akɔ yɛn Awurade ne yɛn Agyenkwa Yesu Kristo+ daa Ahenni+ no mu.

12 Eyi nti mepɛ sɛ daa mekae mo eyinom, ɛwom, munim, na mo ase nso atim wɔ nokware a ɛwɔ mo mu no mu. 13 Nanso mpɛn dodow a mewɔ ntamadan*+ yi mu de, mihu sɛ ɛfata sɛ mekaakae mo de kanyan mo,+ 14 na minim sɛ ɛrenkyɛ koraa na wɔayi me ntamadan yi agu hɔ sɛnea yɛn Awurade Yesu Kristo nso daa no adi kyerɛɛ me no.+ 15 Mɛkɔ so ayɛ nea metumi biara na sɛ mekɔ a, mo ankasa moakae eyinom.

16 Ɛnyɛ atosɛm bi a wɔanwene no anifere kwan so na yɛnam so kyerɛɛ mo yɛn Awurade Yesu Kristo tumi ne ne mmae no, na mmom yɛn ani kann na yɛde huu n’anuonyam.+ 17 Na onyaa nidi ne anuonyam fii Agya Onyankopɔn hɔ, bere a Onuonyamfo kɛse no kaa nsɛm te sɛ eyi* kyerɛɛ no no: “Oyi ne me Ba, nea medɔ no a magye no atom.”+ 18 Bere a yɛne no wɔ bepɔw kronkron no so no, eyi ne nsɛm a yɛte fii soro.

19 Enti nkɔmhyɛsɛm no, wɔama yɛahu sɛ edi mu paa; na eye sɛ moama mo ani aku ho sɛ kanea+ a ɛhyerɛn sum mu, kyerɛ sɛ, mo komam (kosi sɛ ade bɛkye ma adekyee nsoromma+ apue). 20 Nea edi kan koraa no, munim sɛ Kyerɛwnsɛm mu nkɔmhyɛ biara nni hɔ a ɛnam nnipa ntease so ba. 21 Na ɛnyɛ nnipa hɔ na nkɔmhyɛ fi ba,+ na mmom Onyankopɔn honhom kronkron+ na ɛmaa nnipa kasae.

2 Ne nyinaa mu no, atoro adiyifo nso sɔree wɔn mu, na saa ara na akyerɛkyerɛfo atorofo bɛsɔre mo mu.+ Wobewiawia wɔn ho abɛtetew akuw a edi awu, na wɔbɛka sɛ wonnim wɔn wura a ɔtɔɔ wɔn+ no mpo, na wɔn ankasa de ɔsɛe bɛba wɔn ho so ntɛm. 2 Bio nso, nnipa pii bɛbɔ ahohwibra,*+ na wɔn nti nkurɔfo bɛka nokware kwan no ho nsɛmmɔne.+ 3 Afei anibere nti, wɔnam adɛfɛdɛfɛsɛm so bedidi mo ho. Nanso wɔn atemmu a ɛda hɔ retwɛn wɔn fi tete+ no, ɛrenka akyi, na wɔn sɛe bɛba ɔkwan biara so.*+

4 Nokwarem, Onyankopɔn amma abɔfo a wɔyɛɛ bɔne+ no amfa wɔn ho anni; mmom ɔtow wɔn guu Tartarus,*+ na ɔde nkɔnsɔnkɔnsɔn kyekyeree wɔn guu sum kabii mu* de wɔn sie maa atemmu.+ 5 Na wamma tete wiase no amfa wɔn ho anni;+ mmom bere a ɔde nsuyiri bɛsɛee amumɔyɛfo wiase no,+ ɔkoraa Noa a ɔkaa trenee ho asɛm kyerɛɛ nkurɔfo+ no ne nnipa baason+ so. 6 Ɔmaa Sodom ne Gomora nkurow no dan nsõ de buu wɔn fɔ,+ na ɛbɛyɛɛ nea ɛbɛba daakye ho sɛnnahɔ maa amumɔyɛfo.+ 7 Na ogyee ɔtreneeni Lot+ a mmaratofo no ahohwibra* maa ne ho hiahiaa no no, 8 efisɛ da biara da, nneɛma bɔne a ɔtreneeni yi hui na ɔtee bere a ɔte wɔn mu no maa ne kra* a ɛteɛ no ho yeraw no. 9 Eyinom nyinaa kyerɛ sɛ Yehowa* nim sɛnea obegye wɔn a wɔde onyamesom pa tena ase no afi sɔhwɛ mu+ na wakora abɔnefo so ama atemmu da na wasɛe wɔn,*+ 10 ne titiriw no, wɔn a wɔde ayɛ wɔn adwuma sɛ wobegu nkurɔfo ho fĩ+ na wobu tumidi animtiaa*+ no.

Wɔyɛ anuɔdenfo, na wodi wɔn koko so asɛm; wonsuro anuonyamfo, na mmom wɔka wɔn ho nsɛmmɔne, 11 nanso abɔfo a wɔwɔ ahoɔden ne tumi sen wɔn mpo mfa kasatia mmu wɔn atɛn, efisɛ wɔwɔ obu ma Yehowa.*+ 12 Saa mmarima yi de, wɔte sɛ mmoa a wonni adwene a atenka na wɔde yɛ ade; wɔn de ara ne sɛ wɔbɛwo wɔn ma wɔakyere wɔn akum wɔn. Mmarima yi kasa tia nneɛma a wonnim.+ Ɔsɛe kwan a wɔn ankasa nam so no, ɛno ara na ɛde ɔsɛe bɛbrɛ wɔn, 13 na wobenya wɔn kwammɔne so akatua.

Afɛfɛde a wɔde begyigye wɔn ani awia ketee na wɔn ani gye ho.+ Wɔyɛ nkekae ne dɛm wɔ mo mu, na nea ɛyɛ wɔn dɛ* ara ne sɛ bere a wɔne mo bom didi no, wɔde atoro nkyerɛkyerɛ bɛdaadaa mo.+ 14 Wɔwɔ aniwa a awaresɛe ahyɛ no ma,+ na wontumi nkwati bɔne, na wɔto wɔn* a wɔn ase ntimii no brada. Anibere ahyɛ wɔn koma ma. Wɔyɛ mma a wɔadome wɔn. 15 Wɔafi ɔkwan a ɛyɛ tẽẽ no so; wɔadaadaa wɔn. Wɔafa Beor ba Baalam+ kwan so; ɔno na na ɔreyɛ bɔne de apɛ akatua,+ 16 nanso wɔdaa ne mmarato adi kyerɛɛ no.+ Aboa a ontumi nkasa de onipa nne kasae, na osiw odiyifo no nkwaseasɛm no kwan.+

17 Eyinom yɛ asubura a nsu nnim ne suwusiw a ahum kɛse bɔ no; wɔakora esum kabii so ama wɔn.+ 18 Wɔkeka nsɛm akɛse a mfaso biara nni so, na wɔde ɔhonam akɔnnɔ+ to nkurɔfo brada, na wɔbɔ ahohwibra* de twetwe wɔn a afei na wɔatetew wɔn ho afi nnebɔneyɛfo ho no.+ 19 Wɔhyɛ wɔn bɔ sɛ wɔbɛma wɔade wɔn ho, nanso wɔn ankasa yɛ ɔporɔw nkoa;+ efisɛ sɛ obi di ɔfoforo so a, onii no bɛyɛ n’akoa.*+ 20 Asɛm no ne sɛ, bere a wɔnam Awurade ne Agyenkwa Yesu Kristo ho nokware nimdeɛ so atetew wɔn ho afi wiase no fĩ ho+ no, sɛ wɔsan de wɔn ho kɔhyɛ nneɛma koro no ara mu ma ɛde wɔn yɛ nkoa a, ɛma wɔn tebea no sɛe koraa sen kan de no.+ 21 Sɛ wonnim trenee kwan no a, anka eye mmom sen sɛ wɔabehu na afei wɔatwe wɔn ho afi ahyɛde kronkron a wɔn nsa aka no ho.+ 22 Wɔma bɛ yi yɛ nokware sɛ: “Ɔkraman asan kɔ ne fe ho, na prako a wɔaguare no asan akɔyantam atɛkyɛ mu.”+

3 Adɔfo, eyi ne krataa a ɛto so abien a merekyerɛw mo, na merekaakae mo de akanyan mo adwene+ sɛnea meyɛe wɔ krataa a edi kan no mu no, 2 na moakae nsɛm a adiyifo kronkron no aka ato hɔ* no ne ahyɛde a Awurade ne Agyenkwa no nam asomafo* no so de too gua no. 3 Nea edi kan koraa, munhu sɛ awiei mmere no mu no, fɛwdifo bedi wɔn ankasa akɔnnɔ akyi abedi fɛw,+ 4 na wɔbɛka sɛ: “Ne mmae a wɔahyɛ ho bɔ no wɔ he?+ Hwɛ, efi da a yɛn agyanom wuwui* no, biribiara te sɛ nea ɛte fi bere a Onyankopɔn bɔɔ nnipa.”+

5 Na wɔboapa bu wɔn ani gu nokwasɛm yi so sɛ efi tete no, na ɔsoro wɔ hɔ, na Onyankopɔn asɛm nti, asaase fi nsu mu betim hɔ maa nsu twaa ho hyiae;+ 6 na ɛnam so na nsu yiri sɛee wiase a na ɛwɔ hɔ saa bere no.+ 7 Na ɛnam asɛm koro no ara so na wɔakora ɔsoro ne asaase a ɛwɔ hɔ seesei yi so ama ogya de retwɛn atemmu ne da a wɔbɛsɛe amumɔyɛfo.+

8 Nanso, adɔfo, mommma mo ani mmpa nokwasɛm yi so sɛ Yehowa* ani so no, da koro yɛ mfe apem, na mfe apem nso yɛ da koro.+ 9 Yehowa* nkyɛ ne bɔhyɛ ho+ sɛnea ebinom bu biribi sɛ ɛkyɛ no, na mmom ɔwɔ mo ho abotare efisɛ ɔmpɛ sɛ obiara bɛsɛe; nea ɔpɛ ne sɛ obiara bɛsakra n’adwene.+ 10 Nanso Yehowa* da+ no bɛba sɛ ɔkorɔmfo,+ na emu na ɔsoro bɛbobom kurududu atwam,+ na nneɛma a adɔ ayɛ kɔɔ no bɛnan, na asaase ne emu nnwuma bɛda adi.+

11 Esiane sɛ eyinom nyinaa bɛnan saa nti, munhu nnipa ko a ɛsɛ sɛ moyɛ; momma mo abrabɔ ho ntew na momfa onyamesom pa ntena ase, 12 bere a motwɛn na moma Yehowa* da a ɛreba no+ yɛ ntɛm wɔ mo adwenem* no; saa da no ogya bɛhyew ɔsoro asɛe no,+ na ogya a ano yɛ den bɛnan emu nneɛma! 13 Nanso sɛnea wahyɛ bɔ no, yɛretwɛn ɔsoro foforo ne asaase foforo,+ na emu na trenee bɛtena.+

14 Enti adɔfo, esiane sɛ moretwɛn eyinom nti, monyɛ nea mubetumi biara mma ommehu mo sɛ nnipa a nkekae ne dɛm biara nni wɔn ho na wɔwɔ asomdwoe.+ 15 Bio nso, mummu abotare a yɛn Awurade anya no sɛ nkwagye sɛnea yɛn nua ne yɛn dɔfo Paul de nyansa a wɔde ama no no kyerɛw mo no;+ 16 ɔkaa eyinom ho asɛm sɛnea ɔtaa yɛ wɔ ne nkrataa nyinaa mu no. Nanso emu nsɛm bi asete yɛ den, na wɔn a wonni nimdeɛ* na wɔn ase ntimii no kyinkyim no sɛnea wokyinkyim Kyerɛwnsɛm a aka no, na ɛde wɔn bɛkɔ ɔsɛe mu.

17 Enti adɔfo, esiane sɛ munim eyi dedaw nti, monhwɛ mo ho yiye na mmaratofo amfa wɔn nnaadaa no antwe mo ankɔ, na bere a mo ase atim* yi, moanhwe ase.+ 18 Daabida, na mmom monkɔ so nnyin wɔ yɛn Awurade ne yɛn Agyenkwa Yesu Kristo adom ne nimdeɛ mu. Ɔno na anuonyam nka no nnɛ ne daa. Amen.