Toa Yɛ Dɔla Awotwe

WƆ JOHN Crewdson nhoma The Tarnished Door no mu no, ɔpɛɛpɛe sɛnea atubrafo a wɔnam mmara kwan so ne nea ɛnyɛ mmara kwan so nyinaa rehyɛn United States, titiriw fi Mexico ho asɛm no mu. Emu nso na ɔka mogya a ɛwɔ U.S. mogya korabea ahorow mu no bi fibea.

Ɔka sɛnea U.S. Ɔhye so Banbɔfo kyere atubrafo a wɔnnam mmara kwan so no bi wɔ El Paso, Texas, denam wɔn mogya so no ho asɛm: “Beae a edi kan a ‘kurom banbɔfo’ kɔ ne mogya mmoawa ho dwumadibea bi a ɛbɛn twene no ho a ɛyɛ dwumadibea akron a ɛwɔ South El Paso a ɛtɔ mogya fi wɔn a wɔtra Mexico ɔhye no a toa yɛ dɔla awotwe​—ɛne da koro akatua a eye wɔ Juárez [wɔ Mexico] yɛ pɛ​—na afei wɔtɔn no dɔla 20 ma ayaresabea ne nhwehwɛmubea ahorow no mu biako no. Dwumadibea ahorow no bɔ dawuru wɔ wɔn mfɛnsere mu sɛ obi a ɔtaa ma mogya no betumi anya dɔla 81 ɔsram biara, na wɔ pii a wɔwɔ Juárez fam no, mogya korabea ahorow no ne wɔn sika fibea tititiw.

“Williams [a ɔyɛ Ɔhye so Banbɔ odwumayeni no] taa hu wɔn a wɔtwe mogya ma wɔ dwumadibea ahorow no mu a wofi Juárez ba mpɛn abien dapɛn biara na wɔayɛ saa mfe pii a wɔrebɛtɔn wɔn mogya.” Enti obiara betumi de n’ani abu mogya ko a wɔde regu mogya korabea ahorow no mu no.

Wɔ Kristofo a wɔkyerɛ obu ma kronn a mogya yɛ sɛnea Onyankopɔn bu no no fam de, wɔmpene saa mogya aguadi yi so. Tete Kristofo asafo no mu akannifo kyerɛwee sɛ: “Na ɛyɛɛ honhom kronkron no ne yɛn sɛ eye sɛ wɔmfa adesoa bi nto mo so, gye nea ehia yi ara, ɛne sɛ munyi mo ho mfi . . . mogya . . . ho; ɛno na sɛ muyi mo ho fi ho a eye.​—Yekyia mo.”​—Asomafo no Nnwuma 15:28, 29.