Wɔkyerɛ Bible Ho Nhoma Ho Anisɔ Wɔ Hungary

Ɔkyerɛkyerɛfo bi a ɔwɔ Balmazújváros kyerɛw Ɔwɛn Aban Asafo no baa dwumadibea a ɛwɔ Hungary sɛ: “Mahu nhoma bi a m’ani gyee ho. Sɛ ɛbɛyɛ yiye a, mesrɛ mo momfa biako mmena me. Ne din ne Me Nhoma a Ɛka Bible Mu Nsɛm.” Bere a sukuu panyin bi a ɔwɔ Budapest kenkan nhoma yi wiei no, ɔsrɛe sɛ: “Yɛbɛpɛ sɛ yɛkra Me Nhoma a Ɛka Bible Mu Nsɛm no 20 ma Mfitiase Sukuu Adesua Kuw a Ɛto so 6.”

Obi a ofi Balatonboglár a wakenkan Questions Young People Ask—Answers That Work nhoma no kyerɛwee sɛ: “Ná nhoma no kanyan adwene, na mmuae ahorow a egyina Bible so a wɔde ama wom no yɛ pɛpɛɛpɛ. Nhoma no boaa me yiye, na minyaa me nsɛmmisa ho mmuae. Mɛpɛ sɛ mɛhyɛ me gyidi mu den kɛse. Enti sɛ ɛbɛyɛ yiye a, mesrɛ mo, mommena me Bible ho nhoma ahorow.”

Yehowa Adansefo ani gye sɛ wɔbɛboa wɔn a wɔpɛ sɛ wonya Bible mu nimdeɛ pii no. Sɛ wopɛ sɛ wunya nhoma a yɛabobɔ din wɔ atifi hɔ no mu biara anaa obi ba wo fie ne wo besua Bible no a, kyerɛw Watch Tower Society, P. O. Box 760, Accra, anaa address a wɔahyehyɛ wɔ kratafa 5 no mu nea ɛfata.