Paul Ne Timoteo

Ná Timoteo yɛ onua aberante wɔ asafo a ɛwɔ Listra no mu. Ná ne papa yɛ Greeceni, ɛnna ne maame Eunike nso yɛ Yudani. Bere a Timoteo yɛ abofra no, ne nanabea Lois, ne ne maame Eunike kyerɛɛ no Yehowa ho ade.

Bere a Paul tuu kwan sɛ ɔrekɔka asɛmpa no nea ɛtɔ so mmienu a oduu Listra no, ohuu sɛ Timoteo dɔ anuanom no paa. Afei nso, na Timoteo yi ne yam boa anuanom. Paul too nsa frɛɛ Timoteo ma ɔbɛkaa ne ho wɔ n’akwantu mu. Paul tetee Timoteo nkakrankakra ma ɔno nso tumi kaa asɛmpa no yiye na ɔkyerɛkyerɛɛ yiye nso.

Honhom kronkron na na ɛkyerɛ Paul ne Timoteo baabi a wɔnkɔka asɛmpa no. Paul nyaa anisoadehu anadwo bi. Ohuu sɛ ɔbarima bi reka akyerɛ no sɛ ɔmmra Makedonia mmɛboa wɔn. Enti Paul, Timoteo, Silas ne Luka kɔkaa asɛm no wɔ hɔ na wɔtetew nsafo pii.

Ná Tesalonika nso wɔ Makedonia, na mmarima ne mmea pii bɛyɛɛ Kristofo wɔ hɔ. Nanso na Yudafo no bi ani bere Paul ne wɔn a wɔka ne ho no. Enti wɔkɔboaboaa basabasayɛfo bi ano ma wɔbɛtwee anuanom kɔɔ kurow no atumfoɔ anim. Afei wɔteɛteɛɛm sɛ: ‘Saa mmarima yi yɛ Roma aban no atamfo!’ Wei de Paul ne Timoteo nkwa too asiane mu, enti saa anadwo no ara wɔguan kɔɔ Beroia.

Ná nnipa a wɔwɔ Beroia no ho pere wɔn sɛ wɔbesua Onyankopɔn ho ade, enti Greecefo ne Yudafo a wɔwɔ hɔ no mu pii bɛyɛɛ gyidifo. Nanso bere a Yudafo bi fi Tesalonika bɛhaw adwene wɔ hɔ no, Paul fii hɔ kɔɔ Atene. Timoteo ne Silas tenaa Beroia hyɛɛ anuanom den. Eduu bere bi no, Paul somaa Timoteo ma ɔsan kɔɔ Tesalonika kɔboaa anuanom ma wɔgyinaa ɔtaa denneennen a wɔrefa mu no ano. Akyiri yi, Paul somaa Timoteo ma ɔkɔsraa nsafo ahorow pii na ɔhyɛɛ wɔn nkuran.

Paul ka kyerɛɛ Timoteo sɛ: ‘Wɔn a wɔpɛ sɛ wɔsom Yehowa no, wɔbɛtan wɔn ani.’ Timoteo gyidi nti, wɔtan n’ani, na wɔde no too afiase. N’ani gyee sɛ wanya hokwan a ɔde bedi Yehowa nokware.

Paul ka kyerɛɛ Filipifo no sɛ: ‘Meresoma Timoteo aba mo nkyɛn. Ɔbɛkyerɛ mo sɛnea mobɛnantew nokware kwan no so, na watete mo wɔ ɔsom adwuma no mu.’ Ná Paul gye Timoteo di. Wɔboom yɛɛ adwuma mfe pii sɛ nnamfo ne mfɛfo asomfo.