“Yehowa Adansefo?”

ATIFI hɔ asemmisa yi puei sɛ asɛmti bi wɔ Finnish kasa mu Bulletin of the University of Helsinki no mu. Na krataa bi a Ɔbenfo Jorma Palo kyerɛwee wɔ asɛmti no ase, na nsɛm a ɛwom no bi ne sɛ: “Mehwɛɛ yɛn sukuupɔn no nsɔano a wɔatintim wɔ yɛn Bulletin no anim no yiye. Mihuu Hebri kyerɛwsɛm bi wɔ ɔfã a ɛwɔ atifi no mfinimfini, na mibisaa me hɔho bi a ɔyɛ Yudani nea ɛkyerɛ. Sɛnea saa nhomanimfo a onim Hebri kasa no kyerɛ no, saa asɛmfua no kyerɛ ‘Yehowa’ wɔ Finnish kasa mu.”

Onyankopɔn din a na ɛwɔ Finland sukuupɔn yi nsɔano so no yɛɛ nnipa binom nwonwa. Nanso, nokwarem no, sukuupɔn no adi mfe 350, na bere a wɔhyehyɛɛ no, na wonim din Yehowa no yiye na nnipa pii de di dwuma wɔ Europa nyinaa. Wohu din no wɔ ɔman adan, sika, ne nsɔano ahorow pii a wɔyɛe wɔ saa bere no mu ho.​—Hwɛ brochure The Divine Name That Will Endure Forever no mu.

Wɔ yɛn afeha yi mu no, Kristoman mfa Onyankopɔn din nni dwuma bio, na pii werɛ afi kan anigye a na wɔwɔ wɔ ho no. Kuw biako pɛ na wɔde saa din kronkron no di dwuma wɔ ɔsom mu na wɔka ho asɛm kyerɛ, ma ɛne Awurade Mpaebɔ no mu adesrɛde a edi kan no hyia sɛ: ‘Yɛn Agya a ɔwɔ soro, ma wo din ho ntew.’ (Mateo 6:9) Enti na bere a wohuu din nɔ wɔ sukuupɔn no nsɔano no so no, Yehowa Adansefo ho adwene baa nkurɔfo adwenem ntɛm ara no.

[Mfonini Fibea wɔ kratafa 32]

Yliopisto