Momma Mo Kanea Nhyerɛn!

AFEI de na bere aso sɛ akwakoraa no behu Mesia a wɔahyɛ ne ho bɔ no! Na Simeon nam ɔsoro adiyi so nim sɛ “ɔrenhu owu, gye sɛ wahu Yehowa Kristo no ansa.” (Luka 2:26, NW) Nanso hwɛ anigye ara a ɛbɛyɛ bere a Simeon kɔɔ asɔrefi hɔ, na Maria ne Yosef de abofra Yesu too ne nsa so no! Oyii Onyankopɔn ayɛ sɛ: “Awurade, afei woregya w’akoa kwan asomdwoe mu . . . efisɛ m’ani ahu wo nkwagye . . . ɔkanea a ɛbɛma amanaman so atew na ɛbɛhyɛ wo man Israel anuonyam.”—Luka 2:27-32; fa toto Yesaia 42:1-6 ho.

Efi Yesu asubɔ so wɔ bere a na wadi mfe 30 kosi ne wu mu no, ɔdaa ne ho adi sɛ wiase “hann.” Wɔ akwan bɛn so? Ɔnam Onyankopɔn Ahenni ne N’atirimpɔw ahorow ho asɛm a ɔkae so maa honhom mu hann hyerɛn kɛse. Afei nso ɔpaa atoro som nkyerɛkyerɛ horow ho ntama, na ɔdaa esum nnwuma ahorow adi pefee. (Mateo 15:3-9; Galatifo 5:19-21) Enti na Yesu betumi aka ma afata sɛ: “Me ne wiase hann.”—Yohane 8:12.

Yesu wui wɔ afe 33 Y.B. mu. So kanea no dumii saa bere no? Dabi! Bere a na Yesu da so ara wɔ asase so no, ɔka kyerɛɛ n’asuafo no sɛ: “Momma mo kanea nhyerɛn nnipa anim.” (Mateo 5:16) Saa pɛpɛɛpɛ na Yesu wu akyi no, n’akyidifo no maa kanea no kɔɔ so hyerɛnee.

Sɛ́ nnipa a wosuasua Yesu no, Kristofo a wɔwɔ hɔ nnɛ nam asɛnka adwuma no so da Yehowa hann adi. ‘Wɔnantew sɛ hann mma’ de da wɔn ho adi sɛ Kristofo abrabɔ ho nhwɛso pa.—Efesofo 5:8.