Asɛmpa a Wɔbɛka Akyerɛ—Sɛ Ɔdawurubɔfo a Ɔkɔ Asɛnka Daa
1 Okuafo kɔ n’afuw mu daa kɔyɛ adwuma. Sɛ wankɔ daa a, dɛn na ɛbɛba? Sɛ́ Onyankopɔn “adwumayɛboafo” wɔ ne wiase nyinaa afuw no mu no, ɛmmra sɛ yɛn nyinaa bɛyɛ adawurubɔfo a wɔkɔ asɛnka daa, na ‘yɛapae Yehowa anisɔ afe ne yɛn Nyankopɔn aweredi da no.’—Yes. 61:2; 1 Kor. 3:9.
2 Yehowa Nyankopɔn ne Ɔsɛnkafo a ɔsen biara. (Gen. 3:15) Na ɔnam n’adiyifo so taa bɔ Israel man no kɔkɔ na ɔkyerɛ wɔn kwan. Sɛnea Yehowa kaa no no: “Matua ahema makasa makyerɛ mo.” (Yer. 7:13, 25) Te sɛ tete adiyifo no, so yɛn nso yɛpae mu ka Yehowa nkrasɛm a ɔwɔ ma yɛn da yi no daa?
3 Yehu nokwasɛm a ɛyɛ sɛ na Yesu Kristo kɔ asɛnka daa na na n’ani gye ne som adwuma no fã yi mu no wɔ n’adanse a ɛwɔ Yohane 4:34 no mu. Asomafo no nso yɛ nhwɛso pa wɔ asɛnka a wɔkɔ daa mu. Bere a wɔn atamfo sɔre tiaa wɔn denneennen mpo no, na wɔkɔ asɛnka daa. Nokwarem no, bere a wɔhwee wɔn na ‘wɔhyɛɛ wɔn sɛ wɔnnkasa Yesu din mu’ no, kyerɛwtohɔ a ɛwɔ Asomafo no Nnwuma 5:42 no kyerɛ sɛ “wɔannyae Yesu Kristo ho asɛmpa no ka ne kyerɛkyerɛ asɔrefi ne afi mu da biara.” (Aso. 5:40) Esiane asomafo nhwɛso yi nti, so ɛsɛ sɛ Yehowa Ɔdansefo bi yɛ ɔdawurubɔfo a ɔnkɔ asɛnka daa anaasɛ ogyae asɛnka kɔ koraa esiane mprempren anohyeto ahorow no nti?
SƐNEA YEHOWA BU NKWA
4 Ɛho hia sɛ yenya Yehowa adwene wɔ nkwa ho. Ɛyɛ kronn na enti ɛsom bo kɛse. (Yoh. 3:16; Hes. 33:11) Adwene a ɛte saa no kanyan yɛn ma yɛkɔ asɛnka daa.
5 So Yesu anka sɛ “anigye bɛba ɔsoro, ɔdebɔneyɛfo biako a ɔsakra n’adwene ho sen nnipa trenee aduakron akron a enhia wɔn adwensakra”? (Luka 15:7) Nanso “sɛ ɔsɛnkafo nni hɔ a,” ɛbɛyɛ dɛn na adesamma wiase no ate Onyankopɔn Asɛm a ɛde kɔ adwensakra mu no? (Rom. 10:14) Sɛ yɛkyerɛ sɛnea Yehowa bu nkwa no ho anisɔ, yɛma yɛn ani gye hokwan a yɛwɔ sɛ yɛbɛbɔ Onyankopɔn atirimpɔw ahorow ho dawuru, na yenya ɔdɔ ma Yehowa ne mfɛfo nnipa a, yɛbɛyɛ asɛmpa no ho adawurubɔfo a wɔyɛ nnam.
NEA ENTI A EBINOM NKƆ ASƐNKA DAA
6 Nea enti a ebinom nkɔ asɛnka daa no dɔɔso na ɛsonsonoe. Nea ɛde asɛnka a wɔnkɔ daa ba biara no, adawurubɔfo a wɔnkɔ asɛnka daa no ara na wonim no yiye. Wɔn a wɔsom Yehowa no nyinaa begye atom ntɛm ara sɛ asɛnka a wɔbɛkɔ daa ho akwanside ahorow nyɛ nea wontumi nniso da.—Fil. 4:13.
7 Sɛ wutu kwan a, mpɛn pii no ɛnyɛ den sɛ wubehu anuanom na wo ne wɔn abom akɔ asɛnka. Sɛ wunnim obiara anaasɛ Adansefo biara nni faako a wokɔ no a, dɛn nti na wommfa bɔnnɔ so adansedi nnyinasosɛm no nni dwuma sɛnea wɔakyerɛ wɔ asɛm “Wo, Nso, Wubetumi Adi Bɔnnɔ so Adanse ma Ayɛ Yiye” a epuei wɔ krataa yi nea ɛbaa June mu no nni dwuma? Wobetumi anya nyansahyɛ ahorow a eye wɔ Volume 33, No. 7, wɔ asɛm a ɛne “Ka Asɛm wɔ Afie Afie” no mu.
8 Sɛ woyare a, ɛda adi yiye sɛ nnamfo ne abusuafo bɛba abɛsra wo akyekye wo werɛ. Dɛn nti na wonka Mesia Ahenni nhyira horow no ho asɛm nkyerɛ wɔn? Ɔkwan a ɛte saa ara so no, sɛ wɔawo nnansa yi ara a, akyinnye biara nni ho sɛ amannifo bɛba abɛma wo afirim. Mpɛn pii no, nsrahwɛfo a wɔte saa no kamfo Onyankopɔn papayɛ ne sɛnea adebɔ yɛ nwonwa no kɛse. Eyi ma ɛyɛ nea ɛfata sɛ wobɛdan adwene akɔ Bible no so na woaka nsɛmpɔw te sɛ hia a ɛho hia sɛ wɔsom Onyankopɔn, wɔyɛ n’apɛde, akwankyerɛ a Bible no de ma wɔ mmofra ntetee ho, ne abusua asetra a ɛyɛ anigye a wobenya, ne nea ɛkeka ho no ho asɛm. Wonam saayɛ so betumi ayɛ nhyehyɛe ama moatoa nkɔmmɔbɔ no so daa. Nea ɛka ho no, ebinom yɛ nhyehyɛe ma wɔn Bible adesuafo no ba wɔn fi bɛyɛ wɔn dapɛn biara ofie Bible adesua no.
9 Mpanyimfo ne asafo mu asomfo nyinaa, titiriw no akuw so ahwɛfo no, mo kuw no hia mo mmoa. Momma mo ani nnye kuw no muni biara ho na ama moahwɛ ahu sɛ wɔkɔ asɛnka daa na eyi bɛma anigye a wɔwɔ wɔ ɔsom kronn mu no ayɛ kɛse.
10 Afoforo nyinaa fam no, afotu no fata: “Monnyɛ mmɔdenbɔ mu nyaa, monyɛ honhom mu hyew, monsom [Yehowa]!”—Rom. 12:11.