Da Koro Nhyiam Titiriw Dwumadi Foforo

‘Yɛ Nneɛma Nyinaa Esiane Asɛmpa no Nti’ ne da koro nhyiam titiriw dwumadi a ebefi ase August mu no asɛmti. (1 Kor. 9:23) Ahenni ho asɛmpa no ne asɛm a ɛho hia sen biara a wɔte no nnɛ. Dwumadi no bɛboa yɛn ma yɛahu hokwan soronko a yɛwɔ sɛ yekura saa asɛmpa a ɛyɛ anigye yi mu. Ɛbɛhyɛ yɛn den nso ma yɛakɔ so aka asɛmpa no a yenyae.—Aso. 5:42.

Dwumadi no bɛkyerɛ yɛn sɛnea yɛde yɛn teokrase ntetee bedi dwuma koraa sɛnea ɛbɛyɛ a yebetumi ayɛ pii wɔ ɔsom adwuma no mu. Yɛbɛte nsɛm a ebinom a wɔayɛ nsakrae ma wɔatrɛw wɔn som adwuma mu, a mmofra a wɔreyɛ nea wobetumi nyinaa de aka asɛmpa no ka ho, bɛka.—Fa toto Filipifo 2:22 ho.

Ɔkasa titiriw a ɔmantam sohwɛfo anaa Asafo ti no nanmusini bɛma no besi hia a ehia sɛ yɛkɔ so ‘fata sɛ nnipa a wɔde asɛmpa no ahyɛ yɛn nsa no’ so dua. (1 Tes. 2:4) Wɔbɛboa yɛn ma yɛahu sɛ sɛ yɛbɛkɔ so akura hokwan a yɛwɔ sɛ yɛbɛka asɛmpa no akyerɛ afoforo mu a, ɛsɛ sɛ yɛkɔ so du Onyankopɔn ahwehwɛde ne gyinapɛn ahorow ho wɔ yɛn nsusuwii ne yɛn abrabɔ mu. Wobesi nhyira horow a yenya fi eyi yɛ mu no nso so dua.

Mma saa dwumadi titiriw yi mpa wo ti so. Ɛsɛ sɛ wɔn a wɔahyira wɔn ho so foforo a wɔpɛ sɛ wɔbɔ wɔn asu wɔ da koro nhyiam titiriw no ase no bɔ ɔhwɛfo guamtrani no amanneɛ ntɛm ara. To nsa frɛ wɔn a wo ne wɔn sua ade nyinaa ma wɔnkɔ bi. Momma Yehowa nhyɛ yɛn den ma yɛnyɛ nneɛma nyinaa esiane asɛmpa no nti, na yɛnam so awie adwuma a ɛsen biara no wɔ bere tiaa bi a aka ma Harmagedon aba yi mu.