Bɔ Mpae Srɛ Yehowa Mmoa
1 Yesu sii hia a n’asuafo no hia Yehowa nhyira wɔ wɔn som adwuma no mu so dua kyerɛɛ wɔn. (Mat. 9:37, 38) Ayeyi ne aseda mpae a yefi komam bɔ ne adesrɛ ne nkotɔsrɛ a emu yɛ den di adanse sɛ yɛde yɛn ho to Yehowa so koraa sɛ ɔmmoa yɛn. (Fil. 4:6, 7) Kyerɛwnsɛm no hyɛ yɛn nkuran sɛ yɛmfa “mpaebɔ ne ɔsrɛ nyinaa” mmɔ mpae, na eyi fa yɛn som adwuma ho mpae a yɛbɔ nso ho.—Efe. 6:18.
2 Yeyi Yehowa ayɛ wɔ mpaebɔ mu wɔ ne su nwonwaso ne nneɛma a wayɛ no ho. Afei nso yeyi no ayɛ sɛ asɛmpa a yɛka no Fibea. Ɔfata sɛ yeyi no ayɛ efisɛ ne nkutoo na ɔma yetumi yɛ yɛn som adwuma no.—Dw. 127:1.
3 Sɛ yɛbɔ aseda mpae a, yɛde kyerɛ Yehowa apɛde ne n’atirimpɔw ho ntease a ɔde ama yɛn no ho anisɔ. So Ahenni nokware a yɛka kyerɛ afoforo no nyɛ hokwan? Yɛda Yehowa ase wɔ nea yetumi yɛ wɔ ɔsom adwuma no mu nyinaa ho.—Dw. 107:8; Efe. 5:20.
4 Srɛ a yɛsrɛ Yehowa sɛ ɔmmoa yɛn mma yennya nnipa a wɔbɛpene so ne yɛn asua Bible, na yɛama nokware no aka wɔn koma no fata paa. Sɛ yɛde adesrɛ a ɛte saa to Nyankopɔn anim a, ɛkyerɛ sɛ yegye tom sɛ ne nkutoo na obetumi ama yɛn som adwuma no asow aba.—1 Kor. 3:5-7.
5 Ná onuawa bi te nka sɛ ɔbea bi a ɔma no Ɔwɛn-Aban ne Nyan! daa no nkenkan nsɛmma nhoma no. Esiane sɛ na ɔmpɛ sɛ nsɛmma nhoma a ɛsom bo yi bɛsɛe kwa nti, ɔsrɛɛ Yehowa sɛ sɛ ɔbea no nkenkan na sɛ ɔde ma no a, ɔmma ɔmpopo ne ti. Bere foforo a onuawa no kɔɔ hɔ no, ɔbea no kunu kae sɛ: “Meda wo ase sɛ daa wode nsɛmma nhoma yi ba. Ɛyɛ a mekenkan, na m’ani gye ho paa.”
6 Yebetumi afi ahobrɛase ne komam abɔ Yehowa mpae sɛ ɔmmoa yɛn mma yentumi nnyina anibiannaso a nkurɔfo yɛ ne fɛw a wodi ano, na yenni nnipa ho suro biara so na ama yɛatumi akɔ so de akokoduru adi afoforo adanse. (Aso. 4:31) Sɛ yɛkɔ so de “mpaebɔ ne ɔsrɛ nyinaa” bɔ mpae bere a yefi osetie mu di ɔsom kronn akyi no a, yebetumi anya ahotoso sɛ Yehowa bɛboa yɛn.—1 Yoh. 3:22.