Nkyerɛkyerɛ a Ɛkɔ Nkwa Mu
1 Hwɛ akomatɔyam ara a ɛyɛ sɛ wubehu sɛ Onyankopɔn Asɛm mu nokware a nkurɔfo hu no ma wɔn ani gye! Onyankopɔn ne n’atirimpɔw ho nimdeɛ a wobɛka akyerɛ afoforo no ma abotɔyam ampa. Nkyerɛkyerɛ a ɛte saa no betumi ama obi anya daa nkwa.—Yoh. 17:3.
2 Nea Enti a Edi Mu Sen Biara: Ɛnnɛ, ɛkame ayɛ sɛ wɔnam akwan horow so kyerɛ ade, na biribiara nni hɔ a wonsua ho ade. (Ɔsɛnk. 12:12) Nanso wɔrentumi mfa nimdeɛ a ɛte saa no ntoto “Onyankopɔn nneɛma akɛse no ho.” (Aso. 2:11) So wiase yi nhomasua aboa adesamma ma wɔabɛn Ɔbɔadeɛ no na ama wɔahu n’atirimpɔw? Aboa nkurɔfo ma wɔate nea ɛba yɛn so wɔ owu mu no ase, anaa nea enti a amanehunu abu so no? Ama nkurɔfo anya anidaso? So aboa ma abusua nhyehyɛe atu mpɔn? Dabida. Onyankopɔn nkyerɛkyerɛ nkutoo na ebetumi aboa yɛn ma yɛanya asetra mu nsɛmmisa a ɛho hia sen biara yi ho mmuae.
3 Onyankopɔn Nkyerɛkyerɛ ma yɛnya biribi a ebi nni wiase mu nnɛ—abrabɔ gyinapɛn a ɛkorɔn. Onyankopɔn Asɛm boa wɔn a wogye ne nkyerɛkyerɛ tom na wɔde bɔ wɔn bra no ma woyi nneɛma bi te sɛ nnipa mu nyiyim, abusua mu mpaapaemu ne ɔmampɛ fi wɔn koma mu. (Heb. 4:12) Aka nkurɔfo ma wɔakwati awudisɛm biara na ‘wɔahyɛ nipasu foforo.’ (Kol. 3:9-11; Mika 4:1-3) Bio nso, Onyankopɔn nkyerɛkyerɛ ama nnipa ɔpepem pii anya ahoɔden de ako atia nneyɛe ne suban a na ɛyɛ den ma wɔn sɛ wobegyae nanso ɛnsɔ Onyankopɔn ani no.—1 Kor. 6:9-11.
4 Dɛn Nti na Egye Ntɛmpɛ Seesei: Yɛn Kyerɛkyerɛfo Kunini no ama yɛahu nea mmere a yɛwɔ mu yi kyerɛ. Nsɛm a ɛyɛ ne bere mu de wɔ n’atemmusɛm a wɔahyɛ ho nkɔm no mu na ɛsɛ sɛ yɛbɔ ho dawuru wɔ wiase nyinaa. (Adi. 14:6, 7) Kristo afi ase redi hene wɔ soro dedaw. Ɛrenkyɛ wɔbɛsɛe wiase atorosom ahemman no pasaa. Na Onyankopɔn Ahenni ayɛ krado sɛ ɛbɛsɛe asase yi so ahenni nyinaa ma asa. (Dan. 2:44; Adi. 11:15; 17:16) Ne saa nti, ehia paa sɛ nkurɔfo hu Onyankopɔn Hene a ɔredi tumi nnɛ no, na woguan fi Babilon Kɛse no mu, na wɔde gyidi bɔ Yehowa din. (Dw. 2:11, 12; Rom. 10:13; Adi. 18:4) Ɛmmra sɛ yɛbɛyɛ nea yebetumi nyinaa de akyerɛkyerɛ afoforo ma wɔanya nkwa.