Fa Yɛ Wo Botae sɛ Wobɛyɛ Bible Adesua
1 “Momma mo ani so nhwɛ mfuw no sɛ ahoa sɛ wotwa.” (Yoh. 4:35) Akyinnye biara nni ho sɛ, saa asɛm a Yesu Kristo kae yi fa tebea a Kristofo hyia nnɛ no ho.
2 Yɛda so ara nya nnipa komapafo a wɔpɛ sɛ yɛkyerɛkyerɛ wɔn Yehowa akwan. Yehu eyi wɔ nnipa foforo a wɔbɔ asu afe biara no mu. Sɛ wopɛ paa sɛ woyɛ Bible adesua a, dɛn na wubetumi ayɛ?
3 Fa Botae Bi Si W’ani So: Nea edi kan no, fa yɛ wo botae sɛ wubefi Bible adesua ase na woayɛ no daa. Sɛ worekɔ asɛnka a, ma wo botae no ntra w’adwenem. Esiane sɛ adwuma a wɔde ama Kristofo no yɛ ɔkyerɛkyerɛ ne asɛnka nti, ɛsɛ sɛ yɛn nyinaa bɔ mmɔden hwehwɛ hokwan pii de yɛ Bible adesua.—Mat. 24:14; 28:19, 20.
4 Nneɛma Foforo a Wubetumi Ayɛ: Ɛsɛ sɛ Ahenni dawurubɔfo biara fi ne komam bɔ mpae. Ɛtɔ bere bi a, yehyia nnipa a wɔabɔ mpae a wɔpɛ sɛ wɔte Bible no ase. Hwɛ nhyira ara a ɛyɛ sɛ Yehowa nam yɛn so hwehwɛ nnipa a wɔte saa na yɛkyerɛkyerɛ wɔn!—Hag. 2:7; Aso. 10:1, 2.
5 Onuawa bi bɔɔ mpae sɛ ɔpɛ sɛ ɔyɛ Bible adesua, na afei ɔde So Wobɛpɛ sɛ Wuhu Pii Fa Bible no Ho? kratawa no bi guu n’adwuma mu. Bere a ɔbea bi faa kratawa no biako, ɔkenkanee, na ofii ase sɛ ɔrehyehyɛ ɔfã a wɔagyaw wɔ akyi no, onuawa no ne no kasae na otumi fii Bible adesua ase.
6 Mfɛfo adawurubɔfo a wɔn ho akokwaw wɔ sɛnea wofi Bible adesua ase na wɔyɛ no betumi aboa wo ma woayɛ Bible adesua. Bɔ mpae fa hwehwɛ obi a wo ne no bɛyɛ Bible adesua, na fa biribiara a ebetumi aboa wo ma woadu botae yi ho no yɛ adwuma. Ebia ɛrenkyɛ, wubetumi ayɛ Bible adesua ma w’ani agye.