MMABUN BISA SƐ

Ɛsɛ Sɛ Mebɔ Asu Anaa?—Ɔfã 1: Nea Asubɔ Kyerɛ

Afe biara, mmerante ne mmabaawa a yɛde Yehowa Adansefo som tete wɔn no, bebree bɔ asu. Wo nso, woredwen ho sɛ wobɛbɔ asu anaa? Sɛ woredwen ho a, ɛnde, nea edi kan no, ɛsɛ sɛ wuhu nea ahosohyira ne asubɔ kyerɛ.

Ɛdɛn ne asubɔ?

Asubɔ a Bible ka ho asɛm no, yɛmfa nsu mpetempete nipa so kɛkɛ. Mmom, yɛde no wura nsu mu ma nsu no kata ne ho nyinaa. Saa ade no kyerɛ biribi a ɛho hia paa.

Sɛ worebɔ asu na yɛde wo wura nsu no mu saa a, ɛma obiara hu sɛ afei deɛ woremmɔ wo bra sɛnea wo ara wopɛ bio.
Sɛ yeyi wo fi nsu no mu a, ɛkyerɛ sɛ woafi abrabɔ foforo ase, na afei deɛ wobɛbɔ wo bra sɛnea Onyankopɔn pɛ.

Sɛ wobɔ asu a, woma obiara hu sɛ wugye tom sɛ Yehowa na ɔwɔ tumi sɛ ɔkyerɛ nea ɛyɛ papa ne nea ɛyɛ bɔne, na wo ara woahyɛ bɔ sɛ bere nyinaa wobɛyɛ nea Yehowa pɛ sɛ woyɛ.

Biribi a ɛsɛ sɛ wususuw ho: Adɛn nti na ɛsɛ sɛ wohyɛ bɔ wɔ baguam de kyerɛ sɛ wubetie Yehowa wo nkwa nna nyinaa? Hwɛ 1 Yohane 4:19 ne Adiyisɛm 4:11.

Ɛdɛn ne ahosohyira?

Ansa na wobɛbɔ asu no, ɛsɛ sɛ wudi kan hyira wo ho so ma Yehowa wɔ kokoam. Wobɛyɛ no sɛn?

Nea wobɛyɛ ne sɛ, wobɛbɔ mpae aka akyerɛ Yehowa sɛ wobɛsom no daa, na nsu mu oo, awia mu oo, wobɛyɛ nea ɔpɛ. Na sɛ nkurɔfo bɛyɛ dɛn oo, wɔbɛyɛ dɛn oo, wo deɛ, wobɛyɛ nea Yehowa pɛ.

Sɛ wobɔ asu a, ɛma nkurɔfo hu sɛ woahyira wo ho so wɔ kokoam. Ɛma nkurɔfo hu sɛ ɛnyɛ nea wopɛ na wobɛyɛ. Ɛkyerɛ sɛ wode wo ho ama Yehowa, enti nea ɔpɛ na wobɛyɛ.—Mateo 16:24.

Biribi a ɛsɛ sɛ wususuw ho: Sɛ wode wo ho ma Yehowa a, adɛn nti na w’abrabɔ yɛ papa? Hwɛ Yesaia 48:17, 18 ne Hebrifo 11:6.

Adɛn nti na asubɔ ho hia?

Yesu ka too hɔ sɛ obiara a ɔbɛyɛ ne suani no, ɛsɛ sɛ ɔbɔ asu. (Mateo 28:19, 20) Enti ɛnnɛ ne nnɛ nyinaa, ɛsɛ sɛ Kristoni biara bɔ asu. Nea ɛwom ne sɛ, Bible kyerɛ sɛ ɛsɛ sɛ yɛbɔ asu ansa na yɛanya nkwa.—1 Petro 3:21.

Nanso sɛnea adamfofa a abɛda wo ne Yehowa ntam no som bo ma wo ne ɔdɔ a wowɔ ma no no, ɛno na ɛsɛ sɛ epusuw wo ma wobɔ asu. Atenka a na odwontofo no wɔ no, ɛno bi na ɛsɛ sɛ wunya. Nea ɔkae ni: “Nneɛma pa a Yehowa ayɛ ama me nyinaa, dɛn na mede betua no ka? . . . Ɛbɔ a mahyɛ Yehowa no, metua.”—Dwom 116:12-14.

Biribi a ɛsɛ sɛ wususuw ho: Adepa bɛn na Yehowa ayɛ ama wo, na ɛdɛn na wode betua no ka? Hwɛ Deuteronomium 10:12, 13 ne Romafo 12:1.

Nea nkurɔfo ka ne nokwasɛm

NEA NKURƆFO KA — Mpanyimfo nko ara na wɔn ho akokwaw a wobetumi abɔ asu.

NOKWASƐM — Ɛnyɛ mfe dodow a obi adi na ɛkyerɛ sɛ ne ho akokwaw. Mmom sɛ obi dɔ Yehowa na wayɛ krado sɛ obetie no a, ɛno na ɛkyerɛ sɛ ne ho akokwaw. Wo deɛ, yɛnhwɛ Yosef, Samuel, ne Yosia sei. Bere a wɔyɛ nkwadaa mpo, wɔkyerɛe sɛ wɔn ho akokwaw. Nkwadaa a wɔwɔ hɔ nnɛ pii nso akyerɛ sɛ wɔn ho akokwaw.

Nea Bible ka: “Abofra mpo, wɔde ne nneyɛe na ehu no; ɛno na wɔde hu sɛ ne suban ho tew, na eye.”—Mmebusɛm 20:11.

NEA NKURƆFO KA — Sɛ wo nnamfo rebɔ asu deɛ a, ɛsɛ sɛ wo nso wobɔ asu.

NOKWASƐM — Ahosohyira ne asubɔ deɛ, ɛyɛ biribi a ɛsɛ sɛ obiara si ne gyinae wɔ ho, na ɛsɛ sɛ efi koma mu. Ɛnyɛ biribi a yɛyɛ de kyerɛ sɛ yɛanyin, anaa obiara rebɔ asu nti na ɛsɛ sɛ yɛn nso yɛbɔ asu. Afei nso, ɛnyɛ sɛ obiara rehwɛ kwan sɛ yɛbɛbɔ asu enti na ɛsɛ sɛ yɛbɔ asu.

Nea Bible ka: “[Onyankopɔn] man betu wɔn ho ama koraa.”—Dwom 110:3.

NEA NKURƆFO KA — Sɛ wommɔɔ asu a, wubetumi ayɛ nea wopɛ biara na woafa wo ho adi.

NOKWASƐM — Sɛ wunim nea Yehowa se ɛyɛ papa ne bɔne, na wommɔɔ asu mpo a, wubebu wo nneyɛe ho akontaa akyerɛ Yehowa.

Nea Bible ka: “Sɛ obi nim adepa na wanyɛ a, ɛyɛ bɔne ma no.”—Yakobo 4:17.

NYANSAHYƐ: Sɛ ɛyɛ den ma wo sɛ wubehyira wo ho so na woabɔ asu abɛyɛ Kristoni a, adɛn nti na wompɛɛpɛɛ wo mu nhwɛ nea enti a wusuro sɛ wobɛbɔ asu na wompɛ ano aduru? Sɛ wokenkan Questions Young People Ask—Answers That Work, Volume 2 nhoma no Ti 37 a, ebetumi aboa wo.