Sɛ Bible Ka Sɛ Wɔasan Awo Obi Bio a, Ɛkyerɛ Sɛn?

Nea Bible ka

Sɛ Bible ka sɛ ‘wɔasan awo obi bio’ a, ɛkyerɛ sɛ, onii no ne Onyankopɔn abenya ayɔnkofa soronko bi. (Yohane 3:3, 7) Wɔn a wɔasan awo wɔn bio no, Onyankopɔn gye wɔn de wɔn yɛ ne mma. (Romafo 8:15, 16; Galatifo 4:5; 1 Yohane 3:1) Sɛnea obi tumi kogye abofra bi wɔ mmara kwan so de no yɛ ne ba no, saa ara na sɛ wɔsan wo obi bio a, onipa no asetena sesa ma Onyankopɔn gye no bɛka n’abusua ho.—2 Korintofo 6:18.

Adɛn nti na wɔsan wo obi bio?

Yesu kaa sɛ: “Sɛ wɔansan anwo obi bio a, ɔrentumi nhu Onyankopɔn Ahenni no.” (Yohane 3:3) Enti sɛ wɔsan wo obi bio a, ɛkyerɛ sɛ, Onyankopɔn resiesie no ama ɔne Kristo akodi ade wɔ Onyankopɔn Ahenni no mu. Onyankopɔn Ahenni no, ebefi soro na adi tumi. Enti Bible ka “awo foforo,” anaa wo a wɔsan wo obi bio no ho asɛm sɛ, ɛma onipa no nya agyapade a “wɔakora so wɔ ɔsoro.” (1 Petro 1:3, 4) Wɔn a wɔsan wo wɔn bio no, Onyankopɔn ma wɔnya gyidi paa sɛ ‘wɔne Kristo bedi hene.’—2 Timoteo 2:12; 2 Korintofo 1:21, 22.

Sɛn na wɔsan wo obi bio?

Bere a Yesu rekyerɛkyerɛ saa asɛm yi mu no, ɔkaa sɛ, wɔn a wɔsan wo wɔn bio no, ‘wɔde nsu ne honhom bɛwo wɔn.’ (Yohane 3:5) Nea saa asɛm yi kyerɛ ne sɛ, wɔbedi kan abɔ wɔn asu wɔ nsu mu, na ɛno akyi no, wɔde honhom kronkron nso abɔ wɔn asu.—Asomafo Nnwuma 1:5; 2:1-4.

Yesu ne onipa a odi kan a wɔsan woo no bio. Wɔbɔɔ no asu wɔ Asubɔnten Yordan mu, na ɛno akyi no, Onyankopɔn de honhom kronkron sraa no, anaa ɔde honhom kronkron bɔɔ no asu. Saa kwan yi so na Onyankopɔn de honhom kronkron san woo Yesu bio ma ɔbɛyɛɛ Onyankopɔn ba a ɔwɔ anidaso sɛ ɔbɛsan akɔ soro. (Marko 1:9-11) Onyankopɔn nyanee Yesu fii awufo mu ma ɔbɛyɛɛ ɔbɔfo; wei maa anidaso a na Yesu wɔ no baa mu.—Asomafo Nnwuma 13:33.

Yesu akyi no, nnipa a wɔsan wo wɔn bio no, wɔn nso, wɔbɔ wɔn asu wɔ nsu mu ansa na wɔanya honhom kronkron.a (Asomafo Nnwuma 2:38, 41) Ɛno akyi no, wɔnya anidaso a edi mũ sɛ wɔbɛkɔ soro. Saa anidaso no, sɛ wɔwu a, Onyankopɔn benyan wɔn afi awufo mu ama aba mu.—1 Korintofo 15:42-49.

Asɛm a ɛnyɛ nokware a nkurɔfo ka fa wo a wɔsan wo obi bio ho

Asɛm a ɛnyɛ nokware: Obi betumi ama wɔasan awo no bio.

Asɛm a ɛyɛ nokware: Akwannya wɔ hɔ ma obi biara sɛ ɔbɛyɛ Onyankopɔn adamfo na wanya nkwagye. (1 Timoteo 2:3, 4; Yakobo 4:8) Nanso, wo a wɔbɛsan awo obi bio, anaa honhom kronkron a wɔde bɛsra obi no de, ɛwɔ Onyankopɔn nsam. Bible ma yehu sɛ, wo a wɔsan wo obi no, “ennyina nea obi pɛ anaa ne mmɔdenbɔ so, na mmom egyina Onyankopɔn . . . so.” (Romafo 9:16) Bible asɛm a ɛne ‘wɔsan wo obi bio’ no, yebetumi asan aka no sɛ, ‘wɔawo obi afi soro.’ Wei di adanse sɛ, sɛ́ wɔbɛwo obi bio anaa wɔrenyɛ saa no, ‘efi soro,’ anaa Onyankopɔn na ɔkyerɛ.—Yohane 3:3, ase hɔ asɛm.