Atoyerɛnkyɛm Bere Mu Mmoa Wɔ Afe 2021 Mu—Yennyaa Yɛn Nuanom Mu

Afe 2021 ɔsom afea no mu no, na COVID-19 yareɛ kodiawuo no gyina mu denneennen wɔ wiase baabiara. Asɛm a yɛato din, “Nea Yɛayɛ De Aboa Wɔn a Korona Ama Wɔn Ho Aka Mu” mu no, yɛkyerɛkyerɛɛ mu sɛ yɛde dɔlab ɔpepem pii na ɛboaa wɔn a yareɛ kodiawuo no maa wɔn ho kaa mu no. Afei nso, yɛtew Boayikuw a Ɛde Mmoa Ma Wɔ Atoyerɛnkyɛm Bere Mu bɛboro 950.

Hwɛ ahometesɛm! Bere a na yareɛ kodiawuo no redi yɛn nya no, na atoyerɛnkyɛm a efi nnipa ne nea emfi nnipa bebree nso reteetee yɛn nuanom wɔ wiase nyinaa. Atoyerɛnkyɛm bɛboro 200 a esisii nti, Nsɛm Ho Dwumadi Boayikuw a Ɛhyɛ Akwankyerɛ Kuw No Ase no penee so sɛ, sika a wɔatwa ato hɔ de reboa anuanom a COVID-19 yareɛ kodiawuo no ama wɔn ho aka mu no, wɔnsan ntwa dɔla ɔpepem 8 nka wo, na wɔmfa mmoa wɔn a atoyerɛnkyɛm ato wɔn no. Wo deɛ, yɛnhwɛ sɛnea yɛde wo ntoboa no aboa wɔn a atoyerɛnkyɛm mmienu bi a esii nnansa yi ama wɔn ho aka mu no.

Nyiragongo Bepɔw No Paee

May 22, afe 2021, Nyiragongo ogya bepɔw a ɛwɔ Democratic Republic of Congo no fii ase paee maa biribi hyehyeehye bi fii mu bae, na ɛsɛee afie, sukuu, ne baabi a wɔkora nsu. Nanso ɛnyɛ saa ade hyehyeehye no nko ara na ɛsɛee ade. Akyiri yi, nsõ bi a etumi kum nnipa nso fii bepɔw no mu tu baa Goma kurow no mu nna dodow bi. Saa bere no nyinaa, na asaasewosow nketenkete bebree bi nso nenam mu. Nnipa a ɛwɔ kurom hɔ bɛboro fã deɛ, wɔka kyerɛɛ wɔn sɛ womfi kurow no mu. Nnipa mpempem pii fii kurow no mu, na ebinom mpo kɔe ara kotwaa Rwanda hye no.

Wɔn a wotu fii kurow no mu no, na Yehowa Adansefo bɛyɛ 5,000 ka ho. Bepɔw a ɛpaee no sɛee ebinom afie, na bere a woguan fii kurow no mu no, ebinom nso kosii wɔn akyi kowiaa wɔn nneɛma. Atoyerɛnkyɛm bere mu boayikuw a ɛwɔ Rwanda ne Democratic Republic of Congo no kaa wɔn ho boom kɔboaa wɔn a wɔn ho aka mu no. Wei na Congo (Kinshasa) Betel ka faa Atoyerɛnkyɛm bere mu boayikuw no baako ho. Wɔkaa sɛ: “Kurow mu hɔ a na ayɛ bagyabagya no nyinaa akyi, boayikuw no fii ase kyekyɛɛ aduan, nsu, ntaade, ne nneɛma a anuanom no bɛda so. Wɔyɛɛ weinom nyinaa ansa koraa na aban no reka sɛ wonguan mfi kurow no mu.” Kurow baako bi a na anuanom bɛboro 2,000 aboa wɔn ano wɔ hɔ no, atoyerɛnkyɛm bere mu boayikuw foforo bi sisii tɛnt maa wɔn, na wɔkyekyɛɛ ade a yɛde bɔ yɛn hwene maa wɔn. Afei nso, wɔkyerɛkyerɛɛ anuanom ɔkwan a wɔbɛfa so abɔ wɔn ho ban sɛnea ɛbɛyɛ a COVID-19 yareɛ kodiawuo no ne kɔlera renyɛ wɔn.

Atoyerɛnkyɛm no sii a edii abosome mmiɛnsa no, na yɛn anuanom akyekyɛ ɛmo mmɔtɔ bɛboro 120 (anaa tɔn nsia), aburosiam mmɔtɔ bɛboro 120 (anaa tɔn nsia), anwa bɛyɛ ankorɛ 22 ne fã (anaa tɔn mmiɛnsa), ne nsu bɛyɛ ankorɛ 26 (anaa tɔn mmiɛnsa). Nea ɛbɛyɛ a asafo remmɔ ka pii nti, Betel ankra nnuan no amfi amannɔne. Mmom, wɔyɛɛ nhyehyɛe maa wɔtɔɔ nnuan no bebree wɔ ɔman no mu hɔ ara.

Bepɔw no paee no, ɛsɛee onuawa bi fie a na wasi no foforo. Enti ɔkaa sɛ: “Yɛn abam bui paa, na ebubuu yɛn.” Nanso bere a anuanom de nneɛma kɔmaa ɔne n’abusuafo, na wɔde Bible mu nsɛm hyɛɛ wɔn nkuran no, onuawa no kaa sɛ: “Yehowa adaworoma, yɛda so nya nea yehia. Yɛahu sɛ Yehowa sɔ yɛn mu, na ɔma yɛn adesoa yɛ hare.”

Venezuela Man No Sikasɛm Ayɛ Basaa

Venezuela man no sikasɛm atete-apansam mfe pii ni. Yɛn nuanom a ɛwɔ hɔ no refa ahokyere mu paa. Aduan ho ayɛ den, na nnipabɔnefo nso ama wɔn homene so paa. Nanso, Yehowa ahyehyɛde no kurakura wɔn.

Ɔsom afe a etwaa mu no, wɔde bɛboro dɔla ɔpepem 1.5 totɔɔ nnuan ne samina twaa kwan kɔmaa anuanom a wɔn ho akyere wɔn no. Venezuela Betel bɔɔ amanneɛ sɛ: “Ná ɛnna fam sɛ bosome biara, yɛde nnuan a emu duru bɛyɛ sɛmɛnt bag 544 (anaa tɔn 130) betwa kwan akɔ ɔman no mu baabiara akɔma anuanom a wɔn ho akyere wɔn no.” Nea ɛbɛyɛ a nnuan no rensɛe nti, na anuanom tɔ nnuan a etumi kyɛ ansa na asɛe. Betel amanneɛbɔ no toa so sɛ: “Ɛyɛ a yɛtɔ nnuan no pii enti wɔde ma yɛn atufoɔ-boɔ, na yɛtɔ no bere a abu ama ayɛ fo no. Afei, yɛpɛ kwan a yɛbɛfa so de akɔma anuanom a yɛremmɔ ka pii.”

Leonel ka Boayikuw a Ɛde Mmoa Ma Wɔ Atoyerɛnkyɛm Bere Mu no ho wɔ Venezuela. N’ani gye n’adwuma no ho paa. Ɔka sɛ: “Atoyerɛnkyɛm bere mu mmoa adwuma no, ɛyɛ adwuma soronko. Efi da a COVID-19 yare no kum me yere no, saa adwuma yi ara na ahyɛ me den paa. Daa na me nsa kura adwuma mu, na mihu sɛ nea meyɛ no boa anuanom a wɔakɔ ahokyere mu no. Ɛbɔ a Yehowa ahyɛ sɛ ɔrennya ne nkurɔfo mu no, me ara mede m’ani ahu.”

Onua bi a onyaa saa mmoa yi bi no, bere bi na ɔno nso ka boayikuw ɛboa wɔn a atoyerɛnkyɛm ato wɔn no ho. Ɔka sɛ: “Afei de, na me nso mihia mmoa. Ɛnyɛ nnuan ne ntaade nko ara na anuanom de maa yɛn. Anuanom boaa me ne me yere maa yɛn koma tɔɔ yɛn yam. Wɔhwɛɛ yɛn, wɔkyekyee yɛn werɛ, na wɔhyɛɛ yɛn nkuran.”

Atoyerɛnkyɛm no bi wɔ hɔ a, ɛmmɔ nkae; sɛ ɛbɛbɔ nkae mpo a, ketewaa bi. Nanso mpɛn pii no, Yehowa ahyehyɛde no tumi nya nneɛma, na wɔkɔkyekyɛ no ntɛm ma wɔn a wɔn ho aka mu no. Wo ntoboa a wode boa wiase nyinaa adwuma nti na weinom nyinaa tumi yɛ yiye saa no. Sɛ wokɔ donate.jw.org a, yɛakyerɛ akwan a wubetumi afa so ayi ntoboa. Sɛnea wuyi wo yam yi ntoboa no, yɛn ani sɔ paa.